Read pokoot ISAYA 3 Bible Online

ISAYA 3 - pokoot bible

ISAYA 3

¹Ompöwölo osïwïyekwa lö karich kïchenga Echotyon, ECHOTYON Kimuktoghin Yerusalem nko Yuda kïgh anka tïkwïl nko pich löwïr cho tïgho kegh chane tïkwïl,

²kïchengo chane angoletinekwa nko pikökwa cho pö lïk nko kirwokikwa nko werkoyikwa nko pikökwa cho ngoröy ngal nko poyikwa,

³kïmi nko echotkökwa cho pö lïk nko kintöghoghi kokwotïn kïmi nko pipö siasa nko chi anka tïkwïl nyo le werkoyon nyo rosöy kwanyan nko chesoköytin cho ngöghomöch lasiny.

⁴Ighöy ECHOTYON karachïna cho tökïle sölwöy kïpayta pich.

⁵Ngöroköy kegh chi anka tïkwïl osiswechoni ompö chitö anka. Melö konyïtöy chumwak poyikwa, amelö yongöy pich cho chumpönote pikökwa cho echön.

⁶Pkonöy osiswö ato kïlöy pich chito arengwa akïlenchï, “Kenyorunyi kïnye kïgh nyo iloköy, kïlenyona kighecha nyi lïkune pöytoghintencha osiswo kömpölelyö.”

⁷Wölo mölyöngu nyinte lö, “Melö ani! Momukanye ongörokokwa, ompöwölo motïngetanye owesyö anta sïro. Okïr kegh, motöp lö oghanïn pöytoghintengwo!”

⁸Ompöwölo kikerultö Yerusalem akengany Yuda! Ompöwölo tököy ECHOTYON kïgh anka tïkwïl nyo mwoghöy chane akwighöy nyo kigh chane kïtagh töroryenyi nyo kïlchini chane.

⁹Kïsïwïyegho tokochwekwa lelutkökwa. Ighöy chane ngokikwa kesïwïye le cho pö pipö Sodoma. Wechï nyarïl ompö chane! Kepchï kegh nyarïl akunkït!

¹⁰Omwochinö pipö man lö ongörekyenö, tenöy ngala ompö chane, ompöwölo ngörökyini chane akweko ighisyewutkökwa.

¹¹Poto mwokïyis cho wongu ompöwölo kïghokyini chane tïkwïn cho kighchï pikö walaka.

¹²Reyöy monïngo piköchan akïpöytoy korï chane. Heywey pikachu, kopïsikwa kintöghoghikwa kïlïsakwa, amelö tonkïtunekwa wölo otöngöy.

¹³Karich kughyö ECHOTYON atökïmut ngal, ghyongöy nyinte atökurwokyï pich.

¹⁴Ipchini ECHOTYON kirwok poy nko kintöghoghiko pikachi. Rwokyini chane atoni lö, “Akwa cho kyam parenyan nyo pö sapipun, kakïnyorchï tïpö mey korikwa cho kyoritökwa.

¹⁵Otïngetekwa man ne, omungö piköchan apïr pich cho le mey?” Mwoghöy Echotyon TORORÖT Kimuktoghin.

¹⁶Lentöy ECHOTYON, “Arose köny wölo nisonchot koru Yerusalem kïlïkwï! Syolöy chane sörunöyikwa otini pestoy, akïmi kïngölono konyïn, pestotoy ompö kinisanat tökelïm karïn cho chöghsot cho kilïwo aghisay atay le kutïng nko cho chöghyegho kowo monion.

¹⁷Wölo ochopan chane kong arwakan mötöwekwa kïlïkwï palurtin achengan sïro kudong kïchïrutöch.”

¹⁸Itu asis nyo chengo Echotyon koru Yerusalem kïgh anka tïkwïl nyo kwolo kegh chane, karïn cho ngighchini kowo monion nko cho loköy ompö mötöwekwa nko ompö kotwonikwa,

¹⁹nko ompö ewunekwa. Chengo nyinte chane sïro cho yeno kegh mötöw

²⁰akïcheng kopïyenikwa nko tïkukwa cho pöghisyegho ompö chesoköynön cho rötini ewunekwa nko atay witöy angwa mu

²¹akïchenga kaimoris cho mi morikwa nko sörunöyikwa.

²²Chengo chane sïrokökwa cho karamach cho pö tuyotïn nko sampun nko sïrö cho koghöch cho kilumo kegh nko mïlot cho kïrorchini ropïyen

²³nko sïro cho körtoy por cho pö ori cho melö körtoy porwöy nko kitampayeni katani nko cho kilumo mötöw nko anankis cho koghöch cho yeno pich mötöwekwa.

²⁴Itu nyu asis ato, nyinö köteyilo kegh pich mwagh nyo anyïn, kworöritu chane, nyinö kötöroto kegh mu angwoy kïrata kegh pörköy, nyinö köteghöy putekwa kïpïchighitu, kïlïkwï palurtin, akïnyinö köteloköy sïro pö katani, kulak sarankwachtin. Wöghöko pïchighyengwa kïlïku arasï!

²⁵Kïpöröy pipö kanasyan cho le mïrön lömïs, wonyot chane tïkwïl ompö poryot.

²⁶Riryot ortïna kanasyan akuteghyö, kikongityot kanasyante asisoni nko karka nyo kakityaka sïro kïtöpö kïchïrut.