Read pokoot ISAYA 31 Bible Online

ISAYA 31 - pokoot bible

ISAYA 31

¹Heywey! Wechï kepotyö pich cho petöy koro Misri lö tökengarakech. Mito chane kutwoytoy kegh pipö Misri cho chang cho pö lïk nko karikwa cho pö poryot, cho lata: angoletin nko nkaritin nko askarin. Wölo metwoytocha kegh ECHOTYON, Tororöt pö Israel nyo Tïlil anta tep nyinte kungarak chane.

²Akwanyï ngöghom nyinte, ipu kiwurat amelö wöghököy ngalechi cho riru lö kichopöy kong mwokïyis nko pich löwïr cho körtoy chane.

³Pich pat pipö Misri, molenchï kegh tororötin chane. Pö ngwïnyinï angoletinekwa molenchï kegh pkono yïm. Kïkany ato ghïtö ECHOTYON ewunyi, kïrulyö nyu pipö punton cho owesöch akïrulyö tïkwïl chane cho kinyorunö kingarakat chane. Kiwuröy chane kwodeny.

⁴Ompöwölo kilenchanïn ECHOTYON, “Kïrkegh köriryö kiyokwïyi kyak akuteghyö lö ne, kïmemuköcha ntökwotyeghö ngötïny kupertegha pentanyi nyo kötïgh. Lata nyoni tïkwïl ompö ani, möminye chi nyo körtonanïn, tömakartan kutïng pö Sayon,* ochan ECHOTYON Kimuktoghin.

⁵Oköran kegh nko tarit nyo yentoy warechi ompö panchenyi, kïlenyoni wölo okörtonan ECHOTYON Kimuktoghin kanasyanta Yerusalem.”

⁶Akïlö ECHOTYON, “Omïlonchenö wölï omitan, pïchï pö Israel. Kaghwanïkwa ngokï, ataghanïn!

⁷Ompöwölo itu asis ato olöstokwa körkeyïntinekwo cho pö ngokï lömïs cho kyaghekwa kari ropïyen nko cho pö koltin.

⁸Kïpöro chokon pipö Asirya otini mito setat, wölo melö ompö chokoni pich. Pertegho pipö Asria wölini poryegho, kenam nyu chumwakayikwa akegh kïlïkwï sekey.

⁹Pertoy wowïntöngwa ompö mïghöt nyo wow akuwöghisyö opisatinekwa ntökucholchï penterenikwa wölini köporyegho.” Mwoghöy ECHOTYON nyo mi manyi Sayon akinögho Yerusalem, akï nyinte nyo pelo manyi atoni nyo pö amörostin.