Read pokoot ISAYA 33 Bible Online

ISAYA 33 - pokoot bible

ISAYA 33

¹Heywey, ochech pich cho le mosï, akï puryö chi nyo kamas chane anta wïchtö! Wölo itïtoy söröm masatengwa nko wïchtoghtöngwa, chane kegh cho wonyegho masat nko wïchtogh.

²Isyonchecha, we ECHOTYON. Nyi nyo kikönecha. Kartecha yekon anka tïkwïl, aisörwecha ompö osiswo nyarïl.

³Pertoy pungköcha ato chögh poryot aimitenyi ingörokecha, toyot pipö punton atolïm chöghöto poryot.

⁴Nkorchini akïchengchï kegh pöröw cho kïpöruno chane le talam.

⁵Wechï töror ECHOTYON! Pöytoy kïgh anka tïkwïl. Nyïghitöy Sayon* man nko kitenat

⁶akutö pich chïchïmat. Ghetöy pikachi osis löwïr akutö chane ngöghomnyö nko chïreryö. Kuwagh chane ECHOTYON kï kaplawachtangwa nyo wow.

⁷Kursyegho wölo le sany pikökwa cho le nyökon lö tökenyorunö kingarakat. Riryot tya pikökwa cho ripöy kalya cho ghyongchini korengwa ompö kor nyo pö tontön.

⁸Kikïwowit tya tapan ortïn cho echön nyo melö tökïmi chi nyo tökuweröy. Kïrkegh kelö kïmutöy mis, kïmelö tökerïpöy. Kelö kipï söwï, kesas. Mökïminye chi nyo tökekonyïtöy ngat.

⁹Melö tökengoröy paren ngat, kikechal. Kikïyomö wudïnö cho mi Lepanon. Kikewuwö mpöghoghyo Syaron nyo akwagh kïlïkwï surkwen. Rörökyot sökö cho mi koro Pasyan nko cho mi kutïng pö Karmel.

¹⁰Mwochini ECHOTYON pipö punton kïmïkul lö, “Ongetan ye nyu, oporunan wölo ochan awes kïlïkwï.

¹¹Kopechikwa atat tötut cho puryö tösunöt. Ighöy tötutchoni kïgh anka tïkwïl nyo oghekwa kïlïkwï kwïle. Karkegh mïkulöwunyan nko ma nyo nöghöy, nyo wonyokwa.

¹²Ochïntokwa le koghïn cho kakïpel atökegh kïlïkwï choka, akarkegh nko kato cho kakïpel kïlïkwï aryon.

¹³Akanya kïlïm pich tïkwïl cho lekïtöch nko cho lowöch tïkwïn cho kaghan atö kunan chane wölo wow owesyenyan kïlïkwï.”

¹⁴Wöghisïyi mwokïyis cho mi Sayon. Potonchot chane ompö nyökoryö, akïmi kïlentöy, “Karkegh kirwoko Tororöt nko ma nyo nöghöy kokay. Ekïngo ompö acha nyo muköy kïngötuno ma nyo lata nyoni?”

¹⁵Ingötunenyi ato imwaghanyi ngaleku, aigh cho pö man. Mepöghisyeghö owesyengu ipïr pich cho le mey, amekany keropïn. Megh ghömïchö nko pich cho tötöy rïmö anta cho ighöy tïkwïn walaka cho ghach.

¹⁶Atemuka onyorunö ato tïghume, akarkegh nko pich cho ghïpchegho ghat nyo awes. Onyorunekwa omisyö nko pögh cho ogheghöy.

¹⁷Osïwïyekwa ngat pöytoghin ato pöytoy ompö pïchighyö akughïtoy ewunyi kïghömï woptin löwïr.

¹⁸Melö towöghekwa ngat kwöghi surï cho kisetunö koroswe walaka nko pich cho kisemokwa. Lïku choni ngal cho kikuwer cho kinonöy.

¹⁹Melö tosïwïyekwa ngat pipö pïnot cho köromöch cho ngölonöy ngal cho sis cho molïmekwanye.

²⁰Atopöne Sayon köny, kanasyantanï kyomocha ichontin cho tïlilöch. Otopöne Yerusalem, kanasyan nyo tïghume, nyo kïnyorunocha kalya. Nyo kikongityot nko ema nyo melö tökenotegho nyo melö tökengwïsöy wudöwechi ngat amelö tökïngötyot pörköyichi kokay.

²¹Wölo porwecha ECHOTYON ororyenyi ompö atoni. Kïmöngecha kor nyo mi lalwatïna cho yintoy nko champilwoy cho yintegho pögh, wölo mömicha melinö cho köromöch cho pestegho parakungwa.

²²Ompöwölo ECHOTYON nyo tïlwecha ngalecho akï nyinte nyo pöytonecha. Nyinte nyo le pöytoghintencha. Sörwecha nyinte.

²³Kïrkegh kïlö kïlentöy pich kïchoröy tïkwïn cho kösönöy melinö, kïlïku kwïle ompöwölo melö tyokisyot sïrokö cho kötöy melin! Kïpörunecha sïkönöt kïmïkul nyo kömeno kegh pungköcha. Chongitu pöröwechoni tya ntökemï keporchï ompö pich cho ngwolsot. Nyinte ECHOTYON onkït nyo lïku pöytoghintencha. Pöytonecha nyinte akïghetecha.

²⁴Melö tökelïmöy chi ngat nyo ngölon kichïr ompö korencha, akelöstoghchini pich löwïr ngokï.