Read pokoot ISAYA 34 Bible Online

ISAYA 34 - pokoot bible

ISAYA 34

¹Arikuna pipö punton löwïr! Aghamïtuna kegh atalïma lökoy. Akanya kungwïn yete chi anka tïkwïl nyo möngöy ngwïny atökïlïm.

²Ompöwölo tïng ECHOTYON nörekyö nyo wow ompö pipö punton kïmïkul. Könörekyï nyinte pipö punton löwïr cho pö lïk ompö nörekyö nyo ngwan kerwokyï chane kiwurat lömïs.

³Melö kïtïpöy porwoyikwa, wölo nïniegho wölini kewonyeghö akworöröchitu, pïröchitu kutïngkotï ompö kisön.

⁴ Kiwuröy asis nko arawa nko kokel kïlïku terïtyon. Pertoy yïmö le kartasïyan nyo kakïmaman, törengu kokel le sökö cho chïnuno ket pö sapipïyon anta nyo pö moköngwö.

⁵ Ompöwölo kakïsat ECHOTYON chokenyi ompö yïm nyo pöro Edom atolekït, atökïpar pich cho kikurwokyï kepar kuwonyö.

⁶Pïriritu chokenyi ompö kisönkökwa akuyila ompö sunetkökwa, le kisön pö kechir nko ngaror nko sunet pö söromoyi mökol cho kighoy amörostin. Ighöy ECHOTYON amöros ompö kanasyanta Posra. Yengöy nyinte kyak cho chang ompö koro Edom.

⁷Pïtyot pich le soyen nko ngartin. Akïpïriritu ngwïnya ompö kisön akïsïkönon ompö mwagh.

⁸Ato mi nyu ato söru ECHOTYON Sayon* akutökyï pungkachi ghöyityengwa.

⁹Wöghökisyot lalwatïna Edom kïlïku manka, akïwaghaka nyïngwïtyante kïlïkwï koghïn cho nöghsot. Akïwöghöko kore kïmïkul kïlïku manka nyo nöghöy.

¹⁰ Nöghöy korononi nangat nko pöghet. Ngetuno ighot korononi kokay. Lïku kïratyan ompö pïnway löwïr, akï möminye chi nyo lentöy tatïka kel korononi ngat kokay.

¹¹Pöyitu korononi sirören nko chamasinchen. Ighöy ECHOTYON korononi ngat kïlïku surkwen, kïle wölo kilata otini le towunöt.

¹²Mörumunye pöytoghintö nyo pöytoy korononi, wonyot kintöghoghichi löwïr.

¹³Pituno kato nko takalaw woptin löwïr wölo möngöy pöytoghï nko nïyet cho kïripo kanastin, akïmang chepkonöw nko cheptusonkoltin.

¹⁴Pestegho wöloni tïpö wudïn, akïngitoncheghö oy wöloni. Ngwïnöy chepö chepkïyun oghökwen wöloni kïyöröy wölo mungo.

¹⁵Teköy sirörenï panchenikwa wöloni atökïyichï adöstinekwa akulalang akunget warekwa akïripö chane wöloni. Tuyechini mötonywö kwakonga akonga wöloni.

¹⁶Ayare köny kitapu ECHOTYON, asomön ngala tyonkïn cho söpchot atasïwena kïgh nyo mwoghöy. Möminye kïgh ompö chane nyo le ompö akonga ompö tyonchoni nyo melö mito, möminye nyo le ompö akonga nyo rörchini chitöngwa. Ompöwölo kïgh nyo kamwa ECHOTYON kwighöy lenyoni. Akï nyinte ECHOTYON nyo tuyot chane.

¹⁷Nyinte ECHOTYON nyo porchini chane koroswekwa atökutö anka tïkwïl ompö chane karerantangwa. Möngöy chane korononi ompö pïnwöy tïkwïl atökïlïkwï nyingwa kokay.