Read pokoot ISAYA 35 Bible Online

ISAYA 35 - pokoot bible

ISAYA 35

¹Ngörököy wölo le wuw nko wölo le ompölyon, turönöy wölo tïyame akïpito tapïkoyï wölo le surkwen.

²Ngongöy möt tapïkoyï ompö chongïn, lïliyöy akïtum ompö ngörekyö. Ororitu le kutïngkoti Lepanon, akïnyorï okwoghyö le nyo pö pareni Karmel nko Syaron. Sïwïyi chi anka tïkwïl ororyo ECHOTYON akïsïwa wowïntanyi nko owesyenyi.

³Tönö owesyö morïn cho kikwoghochö aitö owesyö kutïngöy cho potonchot ompö nyörkölelyö.

⁴Olenchinö chi anka tïkwïl nyo kima mu, “Alïkuna nyökon, mowöghisïyi! Ngwïnöy Tororöt kïsörwokwa, akungwïn kuchop kong pungkachi.”

⁵ Atakemï kegh konyi chepkarotin kurosïta, akegh cho mingote kïyotisyö yitïn.

⁶Komtoy cho ngwolsot akudanga. Teghyot pich ompö ngörekyö cho le kïmanytin, ompöwölo yintegho pögh kor wölo le surkwen,

⁷lïku nanam, ngoyomwö nyo köpelo pich tïwayway akïlïku kori pöghon korö wölo tïyame. Pito soltinö nko suswo pelöw wölo kirusot chepkonöw.

⁸Akïrumuno atoni or nyo wow, or nyo kïkuro, “Ara Tïlilyö.” Mewerönye chi nyo le sïmnyon aranoni, amepotyeghocha sölwöy aranoni.

⁹Mömicha ngötunywö cho kïsöchini wöloni, amewerönye aranoni tyonkïn cho köromöch. Wölo weröy pich cho kakïsörï ECHOTYON kïpoto.

¹⁰Mïlisyot pich kösörï ECHOTYON Sayon,* pkonöy kïtumonu ompö ngörekyö nyo wow Ngöreksot chane kokay. Roryot chane akïngörekyö, ompöwölo kangeta chane nyarïl nko ngwonïn kokay.