Read pokoot ISAYA 36 Bible Online

ISAYA 36 - pokoot bible

ISAYA 36

¹Kiporyeghö Senakerip pöytoghinto Asirya kanastina Yuda cho kikïtek nïyet akïrïnta ompö könyi taman nko angwan nyo pö paytaghpa pöytoghin Esekia.

²Atolapay kïyonta pöytoghinto Asirya Rapsyake kïngeta Lakis kïwö Yerusalem nko lïk nyo wow nyo kiwö kïrirchï pöytoghin Esekia kïsyol ewun. Kitöpunö opisanoni nko pikachi atolekïtö kö pö pögh nyo kimi wölo le parak ompö aramït nyo kipöghisyegho nöpï cho pö sïro, atole kompö pögh nyo kosuno ngarpïl nyo mi ato le parak.

³Atolapay kïyonta pich kïkur pöytoghin Esekia, kïpa opisatin sömökï kïtaroch nyinte. Kintöghoghchï Elyakim wero Ilkia nyo kighyongchini köyoni pö paytagh nko Syepna nyo kikiröy ngala kokwotïno poy nko Yoa wero Asap nyo kikomönöy ngal cho kikemut ompö kokwotïn.

⁴Kïlenyona kïlenchï Rapsyake chane lö, “Omwochinö Esekia lö tepöy pöytoghinto Asirya nyinte lö, kïgh ne nyï imontonyi kegh nya?

⁵Ilentenyi so ngal opïn cho muköy kutö chi owesyö kïrïnta ompö poryot ntökunka nyï kesasanyi ngalechan?

⁶ Kïrkegh kolentekwa osïko kingarakat koro Misri, wölo karkegh nyona nko chi nyo tökönöy solyon nyo mïro akïpar ewunyi. Lata nyoni Parao, pöytoghinto Misri ompö akwa ato atwaytekwa kegh nyinte.

⁷“Anta omökekwa omwowanïn lö, ‘Otwoytokwa kegh ECHOTYON Tororötïngwo nya?’ Memukonye ompöwölo kiwur Esekia ato kïpelo amörostin cho pö ECHOTYON, atanya kimwochï pipö Yuda nko cho pö Yerusalem kïsagha ato kïpelo amöros nyo mi Yerusalem onkït.

⁸Apkana angalana nko echotyontenyan pöytoghinto Asirya. Okonokwa angoletin 2,000 ato oyörukwa pich cho pegho kïtenö choni.

⁹Imukenyi lö ne töpone löt wölo mi opisa nyo pö Misri lö tökungarakïn kïkonïn nkaritin nko angoletin?

¹⁰Ilentenyi so koporyeghan korenkwa, awur amengarakanïn ECHOTYON? Ki ECHOTYON nyini kimwowanïn oporyeghö koronete, awur!”

¹¹Atolapay kïlenchï ompö Elyakim nko Syepna nko Yoa Rapsyake, wowïnay pö Asirya, “Kaykay ngölonwecha mötworiku ompö ngala Aram, ompöwölo melö kinkïtöcha ngala pipö Yuda, mi pïchï mi nayat löwïr kïteröy.”

¹²Kïmölyöngwï nyinte lö, “Ilentenyi so nyi nko pöytoghintenkwa opïn nyo köyonwanïn pöytoghintenyu angwïn omwochï ngalechï? Ewo, kangwïnan atangalan nko pïchoni mpuröy wöloni le nayat tïkwïl, pich cho tomöcha kite kwam pïyekwa akïgha sökösekwa nko akwa tïkwïl.”

¹³Atolapay kughyö Rapsyake, akutegh ompö kuti pipö Yuda lö, “Atera ngala aryang, pöytoghinto Asirya.

¹⁴Karirwakwa nyinte lö makany kïlïsak Esekia, memukönye nyinte ntökïsörwokwa.

¹⁵Amopïsyï nyinte kïlïsakwa lö ngörochekwa ECHOTYON. Molenchï kegh sörwokwa ECHOTYON, amokön lö yodoy nyinte pipö lïko Asirya atömanam kanasyantenkwa.

¹⁶Mater ngala Esekia! Kömwowokwa pöytoghinto Asirya lö, ongetunenö kanasyantanï akonï kegh. Pïswokwa nyu nyinte pöroyïn ama sapipuneko ketiko parenikwo nko makany, aghegh dipaykökwo* aghegha kori pöghonikwo,

¹⁷ntökïtenö kuporwokwa pöytoghintö kore anka nyo karkegh nko korenkwa nyo kapkanekwa, kor nyo pito sapipun cho osïkokwa dipay akïmi pagha nkanun cho kigho makatin.

¹⁸Wölo mopïsyï Esekia kïlïsakwa lö sörwokwa ECHOTYON. Mito so tororöt nyo le ompö akonga nyo pö punton nyo muköy kisörunö pich pöytoghinto Asirya?

¹⁹Mito ye onö tororöt pö Amat nko nyo pö Arpad? Mito onö tororöt pö Separpaim nko nyo pö Ena nko nyo pö Ipa? Mito chi nyo kimï kïsörï Samaria.

²⁰Oyï ato kimï tororöt nyo le ompö akonga nyo pö puntonichoni ntökïsörunö korengwa pöytoghintencha? Kïne nyo ighokwa anana lö muköy ECHOTYON kïsoru Yerusalem?”

²¹Kisisyö pïchay kïrïp kegh nko ngölyonto pöytoghin Esekia nyo kökimwochï chane. Melö kimölyongwï ngölyon nyo le ompö akonga.

²²Atolapay kïkarer sïrokökwa ompö nyarïl Elyakim wero Ilkia nko Syepna nko Yoa wero Asap, akïmïlonchö wölo mi pöytoghintö Esekia akulokonu sïro cho kikörerisyö akïmwochï nyinte ngalechay Rapsyake.