Read pokoot ISAYA 37 Bible Online

ISAYA 37 - pokoot bible

ISAYA 37

¹Otini lawel kilïm pöytoghintö Esekia ngalechay, kïkarer sïrokachi ompö nyarïl akulach sarankwachtin akïwö kïlït Kö pö ECHOTYON Tororöt.

²Nyinte Elyakim nyo kiwowö kö pö pöytoghin kïmi nko Syepna nyo kile kikirin nko tïsï cho echön. Kïpa chane wölo mi werkoyon Isaya wero Amos. Akiloköy chane sarankwachtin tïkwïl.

³Kïpa akïlenchï, “Kamwa Esekia lö, ‘Pö asete nyarïl, kakichopecha kong akesïch arasï. Kïkörecha kegh nko korka nyo kïghöy, wölo nyo mötïngnye owesyö kumï kïlusyö.

⁴Muko lö kikïlïm ECHOTYON Tororötïngu ngala Rapsyake nyo köyonï pöytoghintö Asirya kungwïn kumwagh Tororöt nyo satate. Malïm sonye ECHOTYON Tororöt akïmuny pïchoni löwïr ompö kimwosyengwa nyo kalïm nyinte. Kïlenyona soghchinö pich cho köngötï.’ ”

⁵Otini kinyorï Isaya ngalechay pö pöytoghin Esekia,

⁶kuyokyï pïchay lö, “Mwowunyi ECHOTYON lö mekany kwotyeghenin pipö Asirya otini lenchinokwa melö ngörokokwa nyinte.

⁷Töni ECHOTYON wowïntöngwa mïkulögh atökïlïm nyinte ngala putintön cho ighöy nyinte kïmïla ntökwit korenyi atökwigh ECHOTYON kepar ompö wöloni.”

⁸Kïkany kunkïtï Rapsyake lö kingeta pöytoghinto Asirya Lakis akïwö kïporyeghö kanasyanta Lipna, kïwö kutang wölini.

⁹Kïlïm pipö Asirya lö kikïsetï lïko Misri cho kintöghoghchini Tiraka pöytoghinto Etopya atökïporyeghö chane. Nyini kilïm ngalechini, kïyonta kut kïlenchï Esekia

¹⁰pöytoghinto Yuda, “Mekany kïlïsak Tororötïngwo nyoni otighonekwa kegh lö mörïntonye pöytoghinto Asirya Yerusalem.

¹¹Kyalïmakwa wölo kida pöytoghi Asirya koros löwïr cho kiporyö tïkwïl. Olentekwa so kïchïwïtöy?

¹²Kipar piköcha akuwur kanastina Kosan nko Aran nko Resep akïpar pipö Peteden cho kimöngöy Telasar akï puryö tororötïngwa nyo le ompö akonga nyo kisörï chane.

¹³Mito onö pöytoghï cho pö kanastina Amat nko Arpad nko Separpaim nko Ena nko Ipa.”

¹⁴Kïchenga pöytoghintö Esekia palalyantanay pïchoni kikïyonï akusomön. Atolapay kïwö akïlït Kö pö Tororöt* akutö palalyantanay tawu ECHOTYON,

¹⁵akïsagh lö,

¹⁶“ECHOTYON Kimuktoghin, Tororöt pö Israel nyo impuruno ngacharungu nyo mi paraku kerupim,* nyi onkït nyo ichï Tororöt nyo ipöytoy pöyunötin löwïr cho pö ngwïny. Kighanyi ngwïny nko yïm.

¹⁷Lïmwecha ye nyu, we ECHOTYON, aisïwa kïgh nyo kegha ompö acha. Ikany kïlïm yitiku tïkwïn löwïr cho kamwa Senakerip atökïchïpinyi nyo ichï Tororöt nyo satate.

¹⁸Kinkïtöcha tïkwïl, we ECHOTYON lö kikïpar pöytoghi Asirya akunyar pipö punton cho chang akwigh koroswekwa kïlïkwï kïratis,

¹⁹akïpel tororötinekwa cho kimelö ki tororöt nyonikïny, wölo ki körkeyïntin cho kikigha ket nko koghïn cho kipata ewuno pich.

²⁰Kïlenyona, ye nyu, we ECHOTYON, Tororötïnyo, sörwecha kechïwïtyeghenö ewuno pipö Asirya atökunkïtï pipö punton tïkwïl lö nyi onkït nyo ichï Tororöt.”

²¹Atolapay kïyonta Isaya wero Amos kut wölo mi pöytoghin Esekia lö, “Lentöy ECHOTYON Tororöt pö Israel, kalïman somötengu nyo kesomönyi paraku Senakerip pöytoghinto Asirya,

²²anyï nyu ngölyon nyo mwochini ECHOTYON Senakerip, ‘Roröchininyi akïsösinyi pipö Sayon.* Pirpiro mötöweka lötungu pipö Yerusalem.

²³Ngo nyï imwoghenyi airoröchini? Ngo nyï isyolchinenyi kut akï ngo nyinte nyini ingwïryelenyi lenyoni? Ani Tororöt pö Israel nyo Tïlil!

²⁴Kesasanyi Echotyon kuwerï mötworiku aimenönyi lö, Ompö nkarinechan cho chang, karïntan Lepanon, ntowongwï kutïngkot löwïr cho koghöch. Kotörön keti tarakitkachi cho koghöch akïlchan kegh keti saypras cho pïchighöch. Kolïtön ompö wudö wölnö kidïrö.

²⁵Ani ngo, nyo kyawas kori pöghon aghegh pögho koros walaka. Kityaka kelyekwa lïkenyan lalwa Nile kïyam.

²⁶“ ‘Tomönye so lïmanyi lö ani nyo kyatat choni otini le könyisyok? Nka nyï ye kaghan kwitïta. Kyokoninyi owesyö para kanastin kïrulyö cho kikïtek nïyet.

²⁷Melö kitïng pich owesyö cho kimöngöy kanastinechoni. Kikigh chane kwotyö akïtangany. Ki karkegh chane nko suswo paren anta ratak cho kipita pörkö, nyo otini kela asis nyo kutuno yomat kongasis, kïsilonchö.

²⁸“ ‘Wölo onkïtön kïgh anka tïkwïl ompö nyi. Kïgh nyo ighenyi nko wölo iwetenyi. Onkïtön wölini wow kïlïkwï sïngiryengu ompö ani.

²⁹Konkïtwan wölini wow sïngiryengu ompö ani nko wölini kekwoltenyi kegh kïlïkwï. Nyo omwowunyi ye nyu otömölinyi sör angasyaminyi kut, ayodinyi mïlena aranini kingwïnenyi.’ ”

³⁰Atolapay kïlenchï Isaya pöytoghin Esekia, “Anyï macheypa kïgh nyo igho, iyomenyi könyinete nko könyinïna pakani pagh cho pitöy opïn, wölo iletonyi kösïgheku ompö könyi nyo rïptoy aikas pagheku aikatkat keti sapipun aiyam akwekwa.

³¹Tösisyot pich cho ngötuno koro Yuda akïpit le ket cho setöy ighinkökwa akïlïtöy ngwïny lasiny atökïyiyï akwa.

³²Ompöwölo ngötuno pich Yerusalem akïngötunö kutïng pö Sayon, ompöwölo ECHOTYON Kimuktoghin nyo kamach kwigha lenyoni.

³³“Anyï kïgh nyo kamwa ECHOTYON lö igho ompö pöytoghinto Asirya lö, ‘Melö tökïlïtu nyinte ngat kanasyantanï anta wutï kotöt nyo le ompö akonga kwitï kanasyan. Mömicha pipö lïk cho tïng longoy cho riku kanasyantanï. Akïmömicha nïyetwö cho töketeköy kuwit kanasyante.

³⁴Mïlo nyinte aranoni kingwïna amelö lïtu nyinte kanasyan nyonikïny. Ani ECHOTYON nyo kamwagh.

³⁵Okörtonan kanasyantanete, aghet ompö könyït pö kaynatenyan nko ompö kiyomisöt nyo kyomwochan mötworintenyan Daudi.’ ”

³⁶Kïwö oghononi malaykayanta ECHOTYON wölo kimöngöy pipö Asirya akïpar pipö lïk 185,000. Nyini kiyech atole asïyech, kelö kïtopön kimeghö chane löwïr!

³⁷Kïchïchïka nyu pöytoghintö Senakerip akïmïla kutang Ninawi.

³⁸Kimi asistanka ato kisogho nyinte koto tororötanyi Nisrok, kïpara chokon werkachi odeny, Adramelek nko Syareser akupertoy kutang koro Ararat. Kuker nyinte werïnyi nyo kïkuro Esaradon kïpayta.