Read pokoot ISAYA 39 Bible Online

ISAYA 39 - pokoot bible

ISAYA 39

¹Kilïm ato ngata osiswechoni Merodak Paladan wero Paladan pöytoghinto Papilon lö kikasa pöytoghintö Esekia, kïlenyona kutö pich palalyan nko ropöw kwipchï.

²Kïtak Esekia pïchay akuporchï chane wölo kisïkön nyinte kïlïkwï silpa nko koltin nko köröstin cho kïpelöy kïngutö nyo anyïn nko mwowöy cho ngutoy cho onyïn nko karichi löwïr cho pö lïk. Melö kimi kïgh nyo kituch nyo melö kiporchï chane.

³Atolapay kïwö werkoyon Isaya wölo mi pöytoghintö Esekia akïtep lö, “Kapkana onö pïchï akemwochinyi ne chane?” Kuyokyï Esekia lö, “Kapkana chane kor nyo low nyoman koro Papilonia.”

⁴Kïtep ngat lö, “Akïne nyo kasïwa chane ompö kongu?” Kuyokyï lö, “Kasïwa chane tïkwïn löwïr. Möminye kïgh nyo melö koporchan chane ompö korichan.”

⁵Kïlenchï Isaya pöytoghintonay, “Mwoghöy ECHOTYON Kimuktoghin lö,

⁶‘Itu osiswö cho kïchengeninyi kïgh anka tïkwïl ompö kongu, kïgh anka tïkwïl nyo kirorunyi papotïneku kaplawach ntökwit nyete le ye. Kipöy koro Papilonia tïkuchoni löwïr amelö mito kïgh nyo le ompö akonga nyo kituköy.

⁷ Kïrongöy ompö chini le moneku kegh akepa kelat atökïpöghisyechï pöytoghinto Papilonia ompö konyi.’ ”

⁸Kuyokyï Esekia werkoyon Isaya lö, “Karamach ngalechoni kemwowunyi kömwowï ECHOTYON.” Kimwa nyinte lenyoni ompöwölo kisïkï lö möminye tapan nyo itu otini tökïsöpöy nyinte.