Read pokoot ISAYA 40 Bible Online

ISAYA 40 - pokoot bible

ISAYA 40

¹Mwoghöy Tororötïncha lö, “Asaghsagha asaghsagha piköchan!”

²Okilö pipö Yerusalem omwochinö lö, “Kikuwongwï chane nyo kikumuchö akakelöstoghchï ye chane ngokikwa. Kachopan kong chane kïmïchï ompö ngokikwa.”

³ Kakïlïm kut nyo teghöy lö, “Agha aramït wölo le surkwen ompö ECHOTYON! Oghïtenö or nyo pö Tororötïncha ompö wölo le siriron!

⁴Anyïghita mpöghogh anka tïkwïl, apor kutïng anka tïkwïl. Tökïwöghökisyö kutïngkotï kïlïkwï mpöghoghöy, tökegh kor wölo mïkaka kïtïlyönglyöngit.

⁵Atökeporï nyu ororyo ECHOTYON tökïsïwa pipö ngwïny kïmïkul. Nyinte ECHOTYON nyo keyomisï lenyoni.”

⁶Kakïlïm kut nyo teghöy lö, “Amtena lökoy!” Atepan lö, “Ne lökoye cho omtonan?” Kïlenchanïn, mwatïtena lö, “Karkegh ptangengmötin nko sus möngötucha nyo kogh kïsir tapïkoy pö wudïn.

⁷Silonchot suswö kïyomsot tapïkoyï, ato yonï ECHOTYON yomat kïkut chane. Melö dongöy pich kïsir sus.

⁸Silonchot suswö nyoman, poto ngölyonto Tororöt nyo ngötu kokay.”

⁹Ngeta we Yerusalem, aipus kutïng nyo kogh atemwatïtena lökoy cho karamach! Kurö ompö kut nyo pö kiteghat, we Sayon,* aimwatïta lökoyechï karamach! Ngalana nyi pat amewöghisyö. Mwochinö kanastina Yuda lö ngwïnöy Tororötïngwa!

¹⁰Ngwïnöy Echotyon TORORÖT atökïpayta ompö owesyö, akumïtu pikachi cho kakïsörï nyinte.

¹¹ Yokwïyi nyinte kechiryechi le mösöwon, ghömïtöy nyinte wareko kechiryechi akïkasan chane ompö puwayichi, akïrang kamati kïpa mut.

¹²Akïmi chi nya, nyo muköy ntökupima ewunechi nanam anta pima ewunechi yïm? Akïmi chi nyo muköy kïtökögho nyïngwïtyanta ngwïny kölöw anta pima kilen kutïngkot cho echön nko cho mïnkech?

¹³Akumuköy chi so ntökïmwochï ECHOTYON kïgh nyo ighöy? Ngo nyo netöy anta rur nyinte?

¹⁴Ngo nyo muköy kurur Tororöt tökunkïtï akïpköchï kïgh tökunet nyinte wölo kötö idoy tïkwïn?

¹⁵Lenye kwïle puntoni ngwïny ompö ECHOTYON, karkegh nko pögh cho kötökï kïnyïl akonga. Kwïskwïse koroswo ngwïny, ompö nyinte karkegh nko terïtyon.

¹⁶Meghömöcha kwempa Lepanon kenoghöy, amöghömöcha tyonko wöloni keghöy amörostin cho kïpelchini Tororötïncha.

¹⁷Kwïle puntoni ngwïny ompö nyinte.

¹⁸Kikongityot Tororöt nko ngo? Anta okörkeyitekwa nyinte nko ngo?

¹⁹Melö lenye nyinte körkeyïn nyo pötöy pich atökutang karïn cho lumo koltin akutongchï söremwokökwa kari ropïyen.

²⁰Kïlöy chi nyo le meywon ket nyo melö nïnöy akutö chi nyo le tïngan kwigh körkeyïn nyo mengonngonönye.

²¹Monkïtökwanye so? Kimömwowokwanye chi so otini le könyisyok? Tomönye so alïmakwa wölo kikida ngwïny?

²²Kigh nyinte nyini töpo ngacharunyi nyo mi wölnö le mïröt, poltoy parak. Karkegh pich cho möngöy ngwïny ompö nyinte nko kolyong. Kighïtö yïm le ananka le ema nyo kïmöngöy.

²³Nyinte nyo tyortoy pöytoghï cho owesöch akwigh chane kïlïkwï kwïle.

²⁴Kikongityot chane nko onkïy cho nyörkölöl cho kötökïpitöy ighin. Nyo otini kakutï ECHOTYON yomat, kïyomö akekutïta le mopö.

²⁵Ngo nyo kimuköy kekongityö nko ani? Ekïmi akonga nyo karkegh nko ani? Mwoghöy Nyinte nyo Tïlil.

²⁶Otopöne köny, wölnö le mïröt! Ngo nyini kigh kokel cho osïwïyekwa? Nkït nyinte nyini ntöghoghchini chane le pipö lïk lö tya chane tïkwïl, akïkuröy kaynötutkökwa löwïr! Wow tya owesyenyi, möminye ompö akong nyo potöy kokay!

²⁷Ompö ne nyu nya Israel, tengwïrngwïronenyi lö menkïtnye ECHOTYON kömpölelutköku anta nyany otini kakichopinyi kong ompö putintön?

²⁸Tomönye so nkïtunönyi? Akïtomönye lïmanyi so? ECHOTYON kï Tororöt pö kokay. Kigh nyinte ngwïny kïmïkul, melö meghöy mu anta aghach, möminye chi nyo nkïtu kinonutkachi.

²⁹Töni owesyö pich cho nyörkölöl nko cho kikwoghochö.

³⁰Sïköy nyörkölelyö pich, kïrkegh kötö kïmïnkech, oghochot pich, kïrkegh kö mïnkech.

³¹Wölo nyoru pich cho könönöy ECHOTYON owesyö. Piltegho chane köpepoy le sichtin, ryöghöy chane amelö oghochot. Petöy chane amelö oghochot.