Read pokoot ISAYA 42 Bible Online

ISAYA 42 - pokoot bible

ISAYA 42

¹ Mwoghöy ECHOTYON lö, “Anyï mötworintenyan nyo kotönön owesyö, nyinte nyini kyakïlan, akï nyinte nyo ongörokyinan kanyïghitan nyinte mïkulöwunyu akï nyinte nyo ipchini man pipö punton löwïr.

²Melö teghöy anta chögh rira ompö ortïna kanasyan.

³Mörïngönye nyinte solyon nyo kikukömpolö anta mis kitampi nyo kikulingata. Ipchini pich löwïr kirwoko man.

⁴Mömeghönye mu anta wonyeghö nyakanat ntökïtenö kutö man ngwïny. Köngöy koroswö cho lowöch kinetutkachi ompö kikönöt nyo wow.”

⁵ Kigh Tororöt yïmwöy akughïtö, kighïtö ngwïny akutö tïkwïn löwïr cho möngöy orinyi. Kitö pich kimïny cho möngöy wöloni mwochini ye nyu ECHOTYON Tororöt mötworintenyi lö,

⁶ “Ochan ECHOTYON, nyo kokurinyi ompö man, onömotoninyi egh aripinyi. Otötoninyi le muma* ompö pich ailïkwï löpoyïn ompö pipö punton,

⁷ateyata konyi chepkarotin, aiyatïta pich cho kikïkörchï chela cho mi wölo tuw, kïpechï kegh.

⁸“Ochan ECHOTYON, kaynenyan nyoni, motöninanye chitö anka ororyenyu. Amelö kitöni salatenyan körkeyïntin cho kipötöy.

⁹Kikïpïntö ye ngala cho kyangoran. Omwowokwa ye nyu tïkwïn cho relach kïrkegh otini tomöcha kwighisyö.”

¹⁰Otumchinö ECHOTYON tum nyo rel otumchinö ngwïnya kïmïkul salatenyi! Asala nyinte akwa cho opegho nanam, asala tïkwïn löwïr cho mi nanam ori, otumö koroswö cho lowöch nko löwïr cho möngöy koroswechoni!

¹¹Nya kïsal Tororöt wölo le kew nko kanastinechi, akanya kïsal nyinte pipö Kedar. Akanya kïsal nyinte pich cho möngöy kanasyanta Sela, nya kuteghyö ompö ngörekyö ompö kutïngkot parak!

¹²Nya kutö ECHOTYON salat nko ororyö, pich tïkwïl cho möngöy koros cho lowöch!

¹³Setöy ECHOTYON lïk le nyakan omöy sirmoy le chi, le atay chïlöy kegh pich. Kutöy nyinte kontï nyo kurchini pich poryot. Ighchini pungkachi ngal cho echön.

¹⁴Mwoghöy Tororöt lö, “Kyasisan lasay ompö osis cho chang akimoyokyanye pikachu ngölyon. Wölo ketïta nyu ye ato oghan kïgh, oriran le korka nyo kïghöy.

¹⁵Owuran kutïngkot cho echön nko cho mïnkech, aghan sus nko ket kïyomö. Owöghökan lalwatïn kïlïkwï surkwen akïtenyö ngörpil.

¹⁶“Ontöghoghchinan pikachu cho köryote, kuwer ortïn cho kimenkïtcha chane. Owöghökan tuwïn ompö chane kïlïku löpoyïn, aghan kor wölo weröy chane kïtïlyönglyöngit. Kiyomisutköchan choni, alïtitan nyo mötïny.

¹⁷Susöy kegh pich akïnyorï arasï cho ghönöy körkeyïntin cho kikigha morïn, pich cho lenchini körkeyïntino koltin, ‘Ochikwa tororötinecha.’ ”

¹⁸Mwoghöy ECHOTYON lö, “Alïma kïgh pïchï mingote! Arosïtena lasiny cho ochï köryote!

¹⁹Ekï ngo chi anka nyo karote kïsir mötworintenyan, akïmingate kïsir chi nyo oyontonan?

²⁰Kyalïmakwa pipö Israel ngal cho chang wölo möminye kïgh nyo kenyiwekwa! Otïngetekwa yitïn cho olïmo ngal, wölo puryö kïgh nyo kalïmakwa.”

²¹ECHOTYON kï Tororöt nyo mököy kösörwokwa, nka nyoni kikus kirurutkachi nko kinetutkachi, akomököy nyinte pikachi kïkonyïtöy.

²²Wölo ye kakïchora pikachi tïkwïn, akekörchï chane wölo tuw aketorchï chelen. Karkegh nko tïkwïn cho sökosöy tyompö wudïn, akïpuryö nyo söru chane. Kakïnam wölo melö mi chi nyo lentöy, “Osörunö!”

²³Ngo ompö akwa nyo yotöy yitïnyi atökïlïm ngalechï? Oterekwa kïngeta ye kutang tagh ayang ngal nya?

²⁴Ngo nyini köpïsyï pipö Israel mori pungkökwa? Melö so ki ECHOTYON nyini kikighchicha ngokï? Melö kikïtïpicha kïrïp kegh nko machatenyi anta kïterchï nyinte kinetutkachi cho kikonecha.

²⁵Nka nyoni kimungenecha sïngiryenyi, akwighecha kewongunenö owesyo poryot. Kimïlchï koro Israel kïmïkul nörekyenyi nyo nöghöy le ma, wölo melö kipköchecha lö ne nyo kigha amenetechanye ngölyontononi kïgh nyonikïny.