Read pokoot ISAYA 44 Bible Online

ISAYA 44 - pokoot bible

ISAYA 44

¹Lentöy ECHOTYON, “Atera ngalechan, akwa pipö Yakopo cho ochï mötworichan, atera pipö Israel cho ochï kïlankachan!

²Ochan ECHOTYON nyo kyaghakwa, kyangarakakwa kïngetunö otini kikïyiyokwa. Mewöghisyö, akwa pipö Yakopo mötworichu, piköchan cho kakïlan achömonan kegh.

³“Ompöwölo oyinan pögh kor wölo tïyame, aghan kor nyo le siriron kuyintegha pögh. Omïlchinan mïkulöwunyan moneku, amïlchan kisoyönutkachu yiyengu.

⁴Chumu chane le sus cho kakïropönchï, anta le ket cho pito sörömu lalwa nyo yintoy.

⁵“Mwoghöy atoni chi anka tïkwïl lö, ‘Opoyan ECHOTYON.’ Mwoghöy anka lö, ‘Okuro ompö kaynata Yakopo.’ Kirchini anka ewunyi lö, ‘Pö ECHOTYON,’ akuyit kegh lö ochï akonga ompö pipö Israel.”

⁶Mwoghöy ECHOTYON Kimuktoghin, nyo pöytoy akïghetöy Israel lö, “Ochan nyo pö tagh, achan nyo pö löt, Tororöt nyo le nyinte onkït, möminye anka kïpoto ani.

⁷Ngo nyo lentöy okörökegh nko ani nya? Akanya kungwïn nyinte kïmwa ngalechi ompö tawunyan. Akï ngo nyo kimï könyisyok kïngor tïkwïn cho kighisyö? Nya kïmwowï tïkwïl tïkwïn cho tökïsis kwighisyö.

⁸Mowöghisyö, we pikachu! Onkïtökwa kïngeta otini le awïyay nko nyete le ye lö kyangoran tïkwïn cho ighisyot achikwa söwichan. Ekïmi tororöt anka nya? Ayo, mi ghatya anka nya? Tomönye alïman nyu nyona!”

⁹Kwïle pich tïkwïl cho soghöy körkeyïntin cho kikipat akïsagh tororötin cho pïchighöch. Köryote akï sölwöy pich cho soghöy tororötin cho lata choni.

¹⁰Melö nyiwu kïgh ato ketany karïn kïlïkwï körkeyïn akesagh le tororöt!

¹¹Lolïyonöy chi anka tïkwïl nyo soghöy körkeyïn. Pich pat choni ighöy körkeyïntin. Akanya kïpka chane ka kirwok, wöghisïyi chane tya akuwongwï ompö arasï.

¹²Chengöy kitongintö karïn akutö paraku ngeset, atolapay kulïwö ewunyi nyo awes kïkongityö nko körkeyïn nyo kömököy nyinte. Omöy kömöy akwam maral akwaghach otini mito kïsïngöy lenyoni.

¹³Chengöy ket kipötinto mpawtin akupim, atolapay kukud kïkarkegh nko körkeyïn pö chi, körkeyïn nyo pïchigh nyoman akutö konyi.

¹⁴Pö odeny kïtörö wuw tarakit atökïpöghisyeghö anta ketït anka nyo aghïgh anta saypras. Anta kïlchï kegh ketït anka nyo pö wuw akïkatkat, akïkany rop tökïpit akïyetï.

¹⁵Chengöy chi ket akwigh kareran kïlïkwï kwen, kwigh kareranta anka kïlïkwï körkeyïn. Pöghisyegho kareranto ketoni kïyïwöy akwigha omisyenyi, kwigha kareranta anka kïlïkwï tororöt nyo soghöy.

¹⁶Noghöy nyinte kwenka walaka akïpela panyechi akwam ntökïpïghyö. Yiwöy manyi, atolochï kïlö, “Wechï karam mayï akï lalang!”

¹⁷Atolapay kïpöghisyeghö kwente nyinö köngotï kïlïkwï tororöt nyo soghöy, atolapay kungïrukyï akïsagh. Soghöy lö, “Ichinyi tororötïnyan wey, sörwante!”

¹⁸Sölwöy pich cho lata choni lö ne nya? Köröy chane konyikwa nko mötöwekwa atömöpköchï man chane.

¹⁹Mötïngnye sïkunöt chi nyo ighöy körkeyïn nyo muköy kunkïtu lö, “Kanaghan kwente kareran, agha omisyenyu, apela panyechu, atolapay aman. Atolapay aghan kwente nyinö körkeyïn nyo kïsoghöy. Anyï ye omitan okïtïnchini ketï kikipat!”

²⁰Karkegh nyinte ato kinam nko chi nyo omöy aren. Kegh nyinte kinonutkachi cho pö sölwontön kïchumpön ntömökïminye or nyo kingöroköy nyinte. Memukönye ntökïchömchï kegh lö körkeyïnoni nömo nyinte ewunyi kïmelö tororöt nyonikïny.

²¹Lentöy ECHOTYON, “Nana we Yakopo ngalechï, nana we Israel lö ichinyi mötworintenyan. Kyaghinyi atepöghisyewanïn, amelö owutyegheninyi, we Israel.

²²Kamistan ngokiku kïtuyö le polta. Mïlena wölo omitan, ompöwölo ani nyo kosörwokwa.”

²³Otumö yïmwöy ompö ngörekyö! Otumö tïkwïl wölnö le ngwen! Otumö kutïngkotï nko ket löwïr cho mi wuw! Ompöwölo kösörï ECHOTYON Yakopo akïnyorchini nyinte ororyö koro Israel.

²⁴Lentöy ECHOTYON, sörunintengu, nyo kighinyi ompö muyeto yongu, “Ochan ECHOTYON nyo kyagh tïkwïn löwïr. Ani onkït nyo kyoghïtö yïmwöy, aghan ngwïny onkït ompö owesyenyan kegh.

²⁵Owöghökan werkoyi putintön kïlïkwï sölwöy, aghan kïlïkwï kwïle ngorut pö pich cho topönöy kokel. Otöghan lö melö man ngala pich ngöghomöch, aporwan lö kitö sölwontön ngöghomnyengwa.

²⁶Wölo atongor kïgh mötworintenyan, ato kayontan chi kïnganyta tötutköchan, oghan ngalechoni nko tötutkö kïpïntö nyo mötïny. Omwochinan ante Yerusalem lö, ‘Möngöy pich ngat oringu,’ amwochan kanastina Yuda lö, ‘Kïtekokwa ngat kïrkegh kö kyowïryekwa.’

²⁷Ani nyo ongölonchini nanamtin lö, ‘Otenyenö!’

²⁸ Olenchinan pöytoghin Sayras, ‘Ichinyi mösöwontenyan nyo intöghoghchini piköchan, nyi nyo ilïtitöy möchutköchan löwïr. Ighenyi ketek ngat Yerusalem atöketor teksyo Kö pö Tororöt.’ ”*