Read pokoot ISAYA 45 Bible Online

ISAYA 45 - pokoot bible

ISAYA 45

¹Lenchini ECHOTYON Sayras nyo kikïl kïlïkwï pöytoghin, “Kokoninyi owesyö rïntena koros cho mi tawungu, ikwönteghonyi pöytoghï ngöcherwekwa pö paytagh. Oyotunyi ante ECHOTYON ortïna kanastinekwa.

²Ani kegh nyo ontöghoghunyi, oporan kutïngkot ompö tawungu kïrumï or. Omïreghan kukotikwa pö taghöy kïlïkwï syawsyaw, atörotörön möröwekwa cho pö karïn kïmïrisyö.

³Okoninyi kaplawachtin cho mi wölo tuw, tïkwïn cho kikïwïnchï wölo tïghume atenkïtunönyi lö ochan ECHOTYON, Tororöt pö Israel nyo kurinyi ompö kaynengu.

⁴Kyokurinyi ompö kaynengu akokoninyi konyït nyo wow, akwompö mötworintenyan Yakopo, ompö pipö Israel nyo kyakïlan, kïrkegh menkïtanïnyinye.

⁵“Ochan ECHOTYON, amöminye anka. Möminye Tororöt anka kïpoto ani. Okoninyi owesyö kïrkegh menkïtanïnyinye.

⁶Nkïtu nyu chi tïkwïl kïngeta kongasis ntökwit ta, lö ochan ECHOTYON amöminye anka kokay.

⁷Oghan löpoyïn nko tuwïn, opchinan pich kisoyönöt nko nyarïl tïkwïl. Ani ECHOTYON nyo oghöy tïkuchoni löwïr.

⁸Nyi we yïm, ropönunö! Nya kïkonï poltoy ropa ighata man, nya kïyata ngwïnya atökïpita atoni sörunötö, akany kïpita tïkwïl ighata man. Ani ECHOTYON nyo oghöy choni.”

⁹ Ochech chi nyo mölöy kegh nko Ighintenyi, mönö nyo mölöy kegh nko egh nyo kigh nyinte! Tepöy so mönö ighinto tör lö, “Ighenyi ne?” Anta lenchï ighintenyi, “Ne nyu menkït kwigh kïgh nya!”

¹⁰Ochech chi nyo lenchini kwanta, “Kilö ne teyiyaninyi?” Anta lenchï kame, “Ne nyï kikïghenyi?”

¹¹Lentöy ECHOTYON, Tororöt pö Israel nyo Tïlil Ighintenyi, nyo sötöy osis cho tökïpkonöy, “Motïngkwanye man atepanïn kïgh paraku monechan, anta omwowanïn kïgh nyo mïchini aghan!

¹²Kyaghan ngwïny aghan ptangengmöt tökïmang orinyi. Kyoghïtan yïmwöy ompö owesyenyan, apöytonan asis nko arawa nko kokel.

¹³Ani kegh nyo kangetnet Sayras kwigh kïgh, atökupuntö machatenyan kïpïntö, akïsat tïkwïn cho kighachitu kuten. Oghïtonan or anka tïkwïl nyo wegho nyinte. Teköy nyinte ngat kanasyantenyan Yerusalem akutyak piköchan cho rötote. Möminye chi nyo kal nyinte anta nyo ketö ropöw tökwigh ighisyononi.” Mwoghöy ECHOTYON Kimuktoghin.

¹⁴Kïlenchï ECHOTYON pipö Israel, “Lïku nyinkwa sïkönöto koro Misri nko Etopya, akïlïku pipö Sepa cho koghöch sekeykökwa rïpokwa chane löt kïrötote. Kïtïngöy chane ompö tawunkwa akïcham lö, ‘Omikwa nko Tororöt pö man, amöminye Tororöt anka kïpoto nyinte.

¹⁵Nyoman ichinyi Tororöt nyo iwïngöy kegh, Tororöt pö Israel nyo söru pikachi.

¹⁶Lolïyonöy pich löwïr cho ighöy körkeyïntin, akïwir mïghötö chane löwïr.

¹⁷Wölo söru ECHOTYON pipö Israel ompö sörunöt nyo pö kokay. Mololïyönekwanye anta omïghyö kokay.’ ”

¹⁸Ompöwölo mwoghöy ECHOTYON, nyo kigh yïmwöy lö, nyinte kï Tororöt! Nyinte nyo kigh ngwïny kughyö kokay. Melö kigh ngwïnyinï kïlïkwï siriron, wölo kigh kïlïkwï wölo möngöy pich. Nyinte nyini lentöy, “Ochan ECHOTYON akï möminye anka.

¹⁹Melö kyangalanan ompö wïngat, anta awïngan moporwokwa möchutköchan. Melö kyomwochan pipö Israel kïyaranïn ompö wölo le siriron. Omwoghan ante ECHOTYON ngala man, omwoghan kenkïtu kïgh nyo tenate.”

²⁰Mwoghöy ECHOTYON lö, “Akwa puntoni ngwïny cho le ngötunön, aghamïtuna kegh apkan atökerwokwok! Wechï sölwöy pich cho ipsötoy körkeyïntin cho kikigha ket, akïsagh tororötin cho memukönye kïsörï pich!

²¹Opunö nyu ngalekwo ka kirwok, atat wölo omwowuntoy ngale. Ngo nyini kingor könyisyok tïkwïn cho itu? Ngo nyini kimwa ngalechoni tagh nya? Maninye so, ECHOTYON Tororöt nyo osöru pikachu? Möminye Tororöt anka kïpoto ani.

²²“Omïlonchenö wölo omitan, akwa pipö ngwïny kïmïkul atökesörwok! Ompöwölo ochan Tororöt amöminye anka.

²³Pö man mumenyan amelö wöghöko nyonikïny. Kyawalwalan kegh ompö mantanyan lö, ngwïnöy chi anka tïkwïl kïkïtïngo tawunyan akuwalwal lö terwanïn chane ngalechu.

²⁴“Mwoghöy chane ompö parakunyan lö, ‘Kïnyorchini man nko owesyö wölo mi ECHOTYON onkït,’ wölo wongu ompö arasï pich cho töghöy nyinte.

²⁵Otöninan ante ECHOTYON rïntagh monïngo Israel atökïkonanïn chane konyït.”