Read pokoot ISAYA 49 Bible Online

ISAYA 49 - pokoot bible

ISAYA 49

¹ Atera ngalechan akwa pipö punton cho lowöch akwa chona omöngöy koros cho lowöch! Kikïlanïn ECHOTYON kïtomö keyiyanïn akïkïlanïn alïkwï mötworintenyi.

² Kigh nyinte ngalechan kïngötipöchitu le chok nyo, akïwïngenanïn rurweto ewunyi. Kighanïn akarkegh nko kotöt nyo kikïsit akïwïnchanïn möronkinyi.

³Akïlenchanïn, “Ochikwa mötworichan pïchï pö Israel. Konanïn pich ororyö ompö akwa.”

⁴Atolapay olan, “Kasïngan apöghisyeghö owesyenyu kwïle wölo puryö kïgh nyo konyorwan.” Wölo kïrkegh kïlenyoni, oghönan ECHOTYON, poryewanïn nyinte onyorï mantanyu. Konanïn ropöwon ompö kïgh nyo oghan.

⁵Kikïlanïn ECHOTYON kïtomö keyiyanïn, akwighanïn alïkwan mötworintenyi nyo yoku pikachi, ataghamïtan pikachi Israel cho kitoyö kïmïlonchö. ECHOTYON nyo konanïn konyït, nyinte nyo le owesyenyan.

⁶ Kimwowanïn ECHOTYON lö, “Möghömönye pat lïkunanyi mötworintenyan, nyo isyolöy pipö Israel chi kingötï, wölo oghinyi tïkwïl lïkune löpoyïn pö pipö punton atökesörï nyu ngwïny kïmïkul.”

⁷Lentöy ECHOTYON, söruninto Israel, Nyinte nyo Tïlil, ompö nyo kïsösöy tya akïghöchini pipö punton, akï nyinte nyo le mötworinto pöytoghï, “Sïwïyinyi pöytoghï akïngetyinyi, sïwïyinyi kintöghoghï tïkwïl akï konyïtinyi.” Ighisyot lenyoni ompöwölo kakïl ECHOTYON mötworintenyi. Kemonöy Tororöt pö Israel nyo Tïlil kiyomisutkachi.

⁸ Akïlenchï ECHOTYON pikachi, “Kyomölyöngwokwa atanya kitökïchömunote, angarakakwa ompö asispa sörunöt. Otötonokwa olïkune muma* ompö pipö ngwïny löwïr. Apïswokwa ngat omïlonchenö korengwo, kor nyo kikechal akepïstö kïlïkwï siriron.

⁹Olenchinan pich cho le mampustin, ‘Ochikwa tyokote, opechinö kegh,’ alenchan pich cho mi tuwïn, ‘Apkana wölo mi löpoyïn!’ Nyoru omisyö ompö wölini kapa, kïrkegh kapa wölo le komos.

¹⁰ Momöcha kömöy anta maral. Melö pelöy asis amedonye kïgh yomo surkwen, ompöwölo ntöghoghchini nyinte nyo syonchini chane. Ntöghoghchini chane ntökwit kori pöghon.

¹¹“Oghan or nyo weröy kutïngkot, atanaran ara mït nyo weröy piköchan.

¹²Pkono piköchan koros cho lowöch, ngetuno walaka okumpö löt nko wölnö le to, kïngetunö walaka Aswan nyo mi okumpö tagh.”

¹³Otumö yïmwöy! Aitegh ngwïnya ompö ngörekyö! Akanya kuteghyö kutïngkotï ntökïkörerisyö otini tumöy! Soghsoghöy ECHOTYON pikachi, syonchini chane ompö kiwongunötengwa.

¹⁴Wölo lentöy pipö Sayon,* “Kikïpïtecha ECHOTYON, akikïwutyeghecha nyinte.”

¹⁵Yokyini nyu ECHOTYON chane lö, “Muköy so korka kïwutyegho montanyi nyo rerïyi, amacham montanyi nyo köyï? Kïrkegh köwutyeghö chane, wölo mowutyegheninyinye.

¹⁶Mowutyegheninyinye we Yerusalem! Kyakiran kaynatengu koghoghtineko ewunechan.

¹⁷“Karich kwitï pich cho pkonöy kïtekinyi ngat, kïmi pïchoni kiwurinyi kïpetöy.

¹⁸Syolö mö aitopöntö airos kamas nko kamas! Kötuyö piköku akïmi pkonöy wölo imitenyi! Kwam ECHOTYON muma lö, kïle otini söpöy nyinte, ikwolonyi kegh piköku le korka, nyo kwole kegh karichi cho pö koyögh.

¹⁹“Nyo pö nyoman kikenyar korengu, wölo ye kikïmarikit tya, ntömelö tökïnyoru piköku cho mïlonchot wölo möngöy. Kilowito nyu wölo imitenyi pïchoni kinyarinyi.

²⁰Mwowunyi piköku cho kikïyichï, koro pïnotön asistanka lö, ‘Marich koronï tya, kïmökecha kor nyo wow kemanga!’

²¹Atolapay atepan kegh nyu lö, ‘Ngo nyo kiyiywanïn monechï? Kemeghenanïn monïngö alïkwan sonö. Kikimïtanïn owö koro pïnotön wölo low, kï ngo nyu nyo kinam monechï? Kyongötwan onkït, kïpkana nyu onö monechï?’ ”

²²Kïlenchï Echotyon TORORÖT Kimuktoghin pikachi, “Osyolchinan ewunyu pipö punton le machey, atökuyokwï chane monekwa kïmïlisyö kestonikwa.

²³Lïku ompö akwa pöytoghï papotïn, kïlïkwï korï cho pöytoy yotïn. Kïtïngchinokwa chane akïkonyïtokwa, ipöy kegh ngwïny chane akïkïtïngchokwa. Atonkïtunökwanyu lö ochan ECHOTYON, akwanka nyo könöy kingörokut ompö ani kïmelö nyoru arasï.”

²⁴Imukenyi sörone tïkwïn chi nyo awes nya? Aimukenyi nyoman sörunone mampustin mori chi nyo kolkol nyo le mosin?

²⁵Mölyöngu nyu ECHOTYON lö, “Nka nyoni kïgh nyo igho, kïsöro askaryan mampustin akerit tïpö chi nyo kolkol. Oporyeghonan chi anka tïkwïl nyo poryeghenokwa asörunan monekwa ompö morikwa.

²⁶Oghan pich cho wöchokwa kïpar kegh chane, tömesyegho chane pörchö le pich cho kagha dipay.* Nkïtu nyu ptangengmötin lö ochan ECHOTYON, nyo sörwokwa akutyokokwa akunkïtï lö, ochan Tororöt pö Israel nyo awes.”