Read pokoot ISAYA 53 Bible Online

ISAYA 53 - pokoot bible

ISAYA 53

¹ Ngo nyo keghan ngalechï kakïmwowecha? Akï ngo nyo muköy kunkïtu lö, ECHOTYON nyo kegh ngalechete?

²Ompöwölo kiyetï le ket nyo kapit, le ket nyo tortoy ighinkachi kïpa ngwïny ompö kor nyo tïyame. Kimötïngnye ororyö nyo kitökïsorecha, akimötïngnye pïchighyö nyo kimïlecha.

³Kikïsasacha nyinte aketagh, kimïkukönö nyinte nyarïl nko ngwonïn. Melö kimito chi nyo kilentöy taros nyinte, melö kikiyitöcha nyinte lö kigh.

⁴ Nyoman kiwongunö nyinte nyarïl nyo kile nyincha, akwip kichïrutköcha. Akimitecha kenonöy lö kitorchï Tororöt nyinte kiwongunöt.

⁵ Wölo kikitwarï kïkarerana por mungö nyinte ngokicha, kikïmungö ngokï cho kikighacha. Kakïsöpchecha ompö kichopat nyo kiwongunö nyinte, akesöpchchecha nyu ompö kitwarunatenyi.

⁶ Kïkörecha kegh löwïr nko kechir cho kepotyö köwö chi anka tïkwïl ompö acha orenyi. Wölo ketö ECHOTYON parakunyi ghöyityo chi anka tïkwïl ompö acha.

⁷ Kikinyaril kong, wölo kwip kegh ngwïny, amelö kiyat kutinyi, le kech nyo kïkötöy kïpetöy keyengöy, kisï le kech nyo kïpetöy kemutöy putechi, puryö ngölyon nyo kingwïna kutinyi.

⁸Kikïnam akerwokyï, akikimïtuna chela akemït kïwö kïma. Melö kimi chi nyo kinan kïgh nyo gha nyo kigho ompö nyinte. Kikïpar nyinte ompö ngokiko piköchan.

⁹ Kikitö pïrïm nko mwokïyis, kikitïp nyinte nko pich cho le monkor, Kïrkegh melö kimi kïgh nyo gha nyo kigha anta ngölyonto putintön nyo kimwa.

¹⁰Wölo ki machata ECHOTYON kuwongwï nyinte. Kïlïkwï meghenyi amöros nyo ipu lastaghpa ngokï. Sïwïyi asïyech piko arenyi akïtöpö osis cho chang, akulïtito machata ECHOTYON ompö ewunyi.

¹¹Lentöy ECHOTYON, “Nyini kewonyö söpon pö kiwongunöt, nyoru nyu mötworintenyan ngat ngörekyö. Nkïtu lö melö kiwir wuw kiwongunötenyi. Ompö ngöghomnyenyi ighöy mötworintenyan nyo ighöy man pich keyityï man. Kösönöy nyinte nyörilwok pö pich cho chang alöstoghchinan chane ngokikwa ompö nyinte.

¹² Kïlenyona otöninan nyinte kïtöpo ato töror, atökupar pöröw nko pich cho owesöch. Ompöwölo kichamta kegh nyinte kepar, akïcham keyitïtö nyinte akonga nko mwokïyis. Kikasan nyinte ngoki pich cho chang, akïsoghchï chane tökelöstoghchï ngokikwa.”