Read pokoot ISAYA 54 Bible Online

ISAYA 54 - pokoot bible

ISAYA 54

¹ Lentöy ECHOTYON, “Tumö korka nyo meyiy, tumö aitegh tya ompö ngörekyö korka nyo mekïgh! Isïkenyi ye nyu monïng cho chang kïsir korka nyo kensyote!

²Pöroyitö ema nyo imöngenyi, aikoghit pörköy cho rötöy aiparta wöwe kwongeröchitu!

³Inoteghonyi söremwoktineko korengu ompö woptine löwïr. Kiyokyini piköku koroswekwa löwïr cho möngöy puntonï walaka. Kinyïghitöy pich kanastin cho tïryolöch otï le ye.

⁴Mewöghisyö ompöwölo menyorunenyinye arasï ngat, amelö telolïyonenyi. Iwutyeghonyi arasï nyo pö nörekyengu nko tanganytangu nyo kisïch otini kilïkunyi mïsïk.

⁵Karkegh Ighintengu nko santengu, kïkuro nyinte ECHOTYON Kimuktoghin. Sörunyi Tororöt pö Israel nyo Tïlil pöytoghinto ngwïny kïmïkul nyinte.

⁶“Ikörenyi kegh, we Israel nko korka nyo kötö kepöy nyo ketyak santenyi, nyo mi nko nyarïl nyo wow. Wölo kurinyi ECHOTYON ngat akïlenchininyi,

⁷Kyopïstinyi nyo tangogh pat, wölo oyokunyi kaw ompö chomnyogh nyo wow.

⁸Kyawïngeninyi tokochunyu nyo le kite, wölo oporunyi chomnyenyu kokay. Mwoghöy ECHOTYON Ghetintengu.

⁹ “Karkegh osiswechete nko osiswo Noa, ato kyaman muma lö, melö tökewuro ngwïny pögh ngat. Kaman yenyu muma lö, melö tonörekyininyi ngat, amelö toteghchinyi.

¹⁰Ompöwölo kïrkegh kupotyö kutïngkotï lö weng, akenategha kutïngkot cho mïnkech, kïmewonyotnye chomnyenyan ompö nyi. Okomönan kiyomisötenyu nyo pö kalya nko nyi kokay.” Mwoghöy ECHOTYON nyo chöminyi lenyoni.

¹¹ Mwoghöy ECHOTYON lö, “Heywey, Yerusalem nyo ichï wongunote akï puryö chi nyo soghsoghinyi! Otekoninyi ngat koghïn cho pö olyot nyo wow.

¹²Otekonan wölo kïripsyegho koghïn cho pïröch, atekan ortïneku koghïn cho kwerkwersot, atekan nayat nyo witinyi koghïn cho pïchighöch.

¹³ “Ante kegh nyo onetöy piköku, atö chane mökosyö nko kalya.

¹⁴Ighinyi man chïchïma, ilowitunonyi nyarïl nko otyogh.

¹⁵Ato poryegheninyi chi, kïporyegheninyi nyinte amelö ani nyo ochömchini. Melö rïntoninyi chi anka tïkwïl nyo poryegheninyi.

¹⁶“Ani nyo oghöy kitongin nyo ighöy wölo kïpelo karïn akutang kari lïk, akwani tïkwïl nyo kagh kinyorin nyo pöröy pich.

¹⁷Wölo medonekwanye kïgh karichoni. Onyorunekwa kïgh nyo omwochini pïchoni rwokyinokwa. Oghetan mötworichu, atö chane rïntagh.” Mwoghöy ECHOTYON.