Read pokoot ISAYA 56 Bible Online

ISAYA 56 - pokoot bible

ISAYA 56

¹Mwochini ECHOTYON pikachi lö, “Arïpakwa man akutenote, ompöwölo tomönye kite angwïnan osörwokwa.

²Osoyönan pich löwïr cho ripöy asispa Sapato,* cho melö sïmnyonöy asisoni. Osoyönan tïkwïl pich cho meghöcha tïkwïn cho ghach.”

³Merokonye kïlö chi nyo le pïnotyon nyo kakutuyö kegh nko pipö ECHOTYON, “Möpïswanïnye ECHOTYON osoghan nko pikachi.” Amerokonye chi nyo kakelat kunan lö, memukönye nyinte kïlïku akonga nko pipö Tororöt ompöwölo mökumukönye nyinte ntökïsïch monïng.

⁴Lenchini ECHOTYON chi nyo lata nyoni, “Ato ikonyïtaninyi otini mesïmnyonönyinye asispa Sapato, aighanyi tïkwïn cho ochöman ompö kighanat, aikaman mumenyan,

⁵kïnyorunenanïn kïgh nyo karam kïtïl monïng cho le wor nko tipïn, amelö kïwutyegho nyinte.”

⁶Akïlenchini ECHOTYON ngat pich cho le pïnot cho kakutuyö kegh nko pikachi, akïcham nyinte akïpöghisyechï nyinte, akïrip asispa Sapato, akïrip mumenyi,

⁷ “Omïtwokwa ntatukwa kutïng pö Sayon,* kutïngtönyan nyo tïlil, aghakwa ongörekyenö ompö Konyan nyo pö saghat, atakan amörostin cho otöninekwa ato kïpelo amörosechan. Ompöwölo kïkuro Konyan kö pö saghat nyo pö pich löwïr.”

⁸Kikuyomisï Echotyon TORORÖT nyo kimïtuna pikachi Israel kïpkana pïnotön, lö tökumïtu nyinte asïyech pikö walaka kïtuyö nko chane.

⁹Kömwochï ECHOTYON pipö punton cho le to kïpka le tïpö wudïn atökuwany pikachi,

¹⁰ompöwölo köryote ripi Israel, sölwöy chane, karkegh chane nko kukïdin cho memuköcha kupkongsïyi cho rusot pat akïmi kurwotïtoy cho möro kong rïwön.

¹¹Karkegh chane nko kukïdin cho le chemutïn, cho möminye omisyö nyo mïchini! Möminye kïgh nyo sïku kintöghoghchini. Ighöy chi anka tïkwïl ompö chane le ato kömököy, akïyörchini kegh wölo siktoy tösunötenyi.

¹²Mwochini kegh ptamasischoni lö, “Apkana kepe keyaratena dipay* atökeghegha cho ngwonöch cho teno cho kakimuköy kegheghe! Körköyitu asïyech ko asisete, akï köromitu tya ompö!”