Read pokoot ISAYA 58 Bible Online

ISAYA 58 - pokoot bible

ISAYA 58

¹Mwoghöy ECHOTYON lö, “Oteghyenö tya! Omwochinö piköchan, pipö Israel ngaleko ngokikwa!

²Soghanïn chane kïtenö osis, akïmi kïlentöy kïtïng machat nyo wow kunkïtï ortïnechan akïrïp kirurutköchan. Mököy otönön chane kirurut cho tenote, akïmwoghöy lö kïngörokyini kïsoghanïn.”

³Tepöy pïchoni lö, “Ompö ne tökekïrurecha atökesagha lasiny akwanyï melö sïwïyi ECHOTYON? Ompö ne töketaghenacha kegh omisyö ato melö yongöy nyinte?” Nonchini nyu ECHOTYON chane, “Kömpölelye kï nyï, otini omitekwa okïruröy atasagha lasiny, omitekwa orïpotoy möchutkökwa, amitö otungo piko ighisyewutkökwo nïkisïntin.

⁴Keghakwa kïruratenkwa nyo pö saghat alïkuna pich cho köwköw cho le syölï akï poryeghï. Olentekwa so ighanïn kïrurata nyo lata nyoni alïman sowutkökwa?

⁵Kowongukwa otini okïrurekwa, akud mötöw le suswon, akarkar sarankwachtin, atö aryon kumelmel nyinte. Kïgh nyo lata nyoni so nyo okurokwa kïrurata saghat? Olentekwa ongörökan ompö kïgh nyo lenyoni?

⁶“Anyï kïrurat nyo omökan. Atyaka sïrïmtino kireyat nko mïchokino wököt, atyak pich cho kikïpïr kïpechï kegh.

⁷Apara omisyewutkökwo nko pich cho amate kömöy atach mey ompö kestonikwo. Oropchinö sïro pich cho chopöy, angarak piko arengwo.

⁸“Atökulïwï nyu löpoyïntönkwa le löpoyïn pö kiwasan, atökesop moyoykökwa lawel. Omitan nko akwa kïtenö osis atosörwokwa. Okörtonokwa ompö ororyenyan.

⁹Omölyöngunan ato asaghanïkwa. Ongitönan ato okuranïkwa. “Ato awangakwa wököt nko machey anka tïkwïl nyo pö arasï nko ngölyon anka tïkwïl nyo gha,

¹⁰ato apaghakwa pich cho sutyote atö omisyö kïmïchï pich cho tïng machat, kïwaghaka nyu tuwïn nyo kiwitakwa kïlïkwï löpoyïn pö pöghetkwen.

¹¹Ontöghoghwokwa nyu kïtenö osis, aghakwa opïghyenö tïkwïl cho karamach. Oripokwa, akonokwa owesyö. Okörekwa kegh nko par nyo mi pögh cho chang akarkegh nko kompa pögh nyo melö tengöy.

¹²Teköy ngat pikökwa wölo kirulyö könyisok. Teköy chane ngat kutoro koghichini kikïtowunö teksye nyo kipö könyisyok. Nkïtwekwa pich atoni lö pich cho tekotoy ngat nïyet cho kökikïrulyö akï pich cho wöghököy korïn cho kikewur kuten.”

¹³Mwoghöy ECHOTYON lö, “Ato okïrökwa asispa Sapato, ataghakwa magh ighisyewutkökwo asisoni, ato apïlilakwa asistanyan nyo tïlil, akonyïtanïn otini morutokwanye anta agh ighisyö anta angalan pat kïsamta asisoni,

¹⁴onyorunekwa nyu ngörekyö nyo kïnyoru ato kïpöghisyewanïn. Oghokwa kekonyïtenokwa ngwïny kïmïkul atongörekyenökwa ompö kor nyo kyotönön kukötönkwa Yakopo. Ani ECHOTYON nyo komwowï ngölyontonï.”