Read pokoot ISAYA 60 Bible Online

ISAYA 60 - pokoot bible

ISAYA 60

¹Ngeta, we Yerusalem ailïwï le asis, lïwchininyi ororyo ECHOTYON!

²Lumöy tuwïn koros pö ngwïny walaka, Wölo lïwchininyi löpoyïn pö ECHOTYON, akïrumuneninyi ororyenyi.

³Soru löpoyïntöngu pipö koros, pkonchini pöytoghï löpoyïntöngu nyo kayek.

⁴Topöne kamasungu köny tesïwena kïgh nyo mi kwigho. Kesup kegh piköku tökïpka kaw! Pkono werköku wölo low kïkösönu tipikwa le monïng.

⁵Osïwïyekwa kïyoni atongörekyenökwa tya. Odöngonyekwa aturonchö. Kipu sïkönöto koros wölo omitekwa. Kipuno mökosyononi koros cho lowöch, kipuno nanamtin antakwagh.

⁶Ghömu tamasay cho makïrar korenkwa, ay, mogho tamasay cho pkono koro Midyan nko Epa. Rotu löwïr cho pkono koro Syepa. Ipunyi koltin nko mankoy cho ngutoy cho onyïn, akï mwowu salat nyo pö ECHOTYON!

⁷Kïropkokwa kechir löwïr cho pö koro Kedar, oghekwa mökol cho pkono Nepaiot kïlïkwï amörostin, cho chömöy ECHOTYON. Minöy nyu ECHOTYON Konyi kïsïch ororyö nyo wow.

⁸Ne tïku chï piltoy le poltoy, akïmïlonchot le cheptuken cho körotï korikwa?

⁹Melin choni cho rotuno koros cho lowöch, akuntöghoghchini melino Tarsis. Yoku kaw moneku cho pkono wölo low. Ipu chane silpa nko koltinekwa, atökïkonyït ECHOTYON Tororötïngu, akïsal Tororöt pö Israel Nyo Tïlil, ompöwölo keghakwa osïkö ororyö.

¹⁰Mwochini ECHOTYON Yerusalem lö, “Teköy pich cho menkïtönyinye ngat nïyetweku, akïpöghisyewunyi pöytoghikwa. Kïrkegh kyachopinyi kong ompö nörekyenyan, wölo oporunyi ye nyu chomnyenyan nko kisyonötenyan.

¹¹Yotisyot ortïnekwa osis tïkwïl, mökörönye chi pöghet nko nangat, atökumï nyu pich kwipkokwa sïkönötengwa, ipu chane akupoyonu nko pöytoghikwa.

¹²Kiwuröy kor anka tïkwïl nyo töghöy kïpöghisyewokwa, ay, kiwuröy koroschoni lökarpïs.

¹³“Kipunyi ororyo Lepanon, kipu mpawtina saypras nko tarakit, atökemina Konyan nyo pö saghat kïpïchighit, akwigh kanasyantenyan kïsïch ororyö.

¹⁴ Pkonöy pipö ara pïchoni reyinyi kïkïtïngö tawungu ompö konyït, kïpka cho kisösinyi kïkïtïng akïsagh ompö kelyeku. Kurinyi lö, ‘Kanasyanta ECHOTYON,’ ‘Sayon,* kanasyanta Tororöt pö Israel Nyo Tïlil.’

¹⁵“Melö tökewirtoninyi ngat anta ghöchin pich. Kanasyan nyo kikesurö akegh kïlïkwï kïratyan. Oghinyi yetune aipïchighitï, kanasyanta ngörekyö kokay nko kokay.

¹⁶Pöghinyi pipö koros, pöghoninyi pöytoghï omisyo nyo karam. Inkïtunenyi nyu lö ochan ECHOTYON Sörunintengu, akï Ghetintengu, Tororöt pö Yakopo nyo awes.

¹⁷“Opunyi koltin nyo kötökoninyi taghoy, okoninyi silpa nyo kötokoninyi karïn, okoninyi mpawtin nyo kötokoninyi taghoy, okoninyi karïn nyo kötokoninyi koghïn. Melö tökureninyi ngat pöytoghiku. Oghan chane kïpayta ompö man nko ompö kalya.

¹⁸Melö tökelïmo korengu ngat kiteghata masat. Amelö tökutimtimöy korengu kiwurata ngat. Okörtoninyi aghetinyi le nïyat, isölaninyi ompöwölo kosörunyi.

¹⁹ “Melö tökïlïku asis löpoyïntöngu atole pöghet. Anta lïkwï arawa löpoyïntöngu ato le oghö. Ani ECHOTYON nyo olïku töpewengu nyo pö kokay. Lïwunyi löpoyïnto töroryenyan.

²⁰Wonyot osisweku cho pö nyarïl. Olïkunan ante ECHOTYON töpewengu nyo pö kokay. Töpewö nyo töpo nyo kogh kïtïl asis nko arawa.

²¹Ighöy piköku nyu tïkwïn cho tenote, mïlöy nyu chane kore kokay. Kyaghan chane akatkatan aghan kïrumtö ororyenyan ompö pich löwïr.

²²Yetu nyu cho mïnkech ompö akwa le pipö or okonga, kwawesit nyo mïnïng le kor nyo awes nyoman. Ochan ECHOTYON, akwotini ketï asisoni oghan nyu choni kwighisyö lawel!”