Read pokoot ISAYA 62 Bible Online

ISAYA 62 - pokoot bible

ISAYA 62

¹Mosisanye ompö ngölyon nyo swongöy Sayon* mosisanye ntökïtenö kesörï nyinte, akulïwï rïntaghtanyi le kitömöwon nyo nöghöy oghö.

²Sïwïyi pipö punton, we Yerusalem lö kerïntenyi! Sïwïyi pöytoghikwa löwïr ororyengu akïmïnchinyi kaynat nyo rel, kaynat nyo konu ECHOTYON nyinte.

³Ilïkunenyi akope nyo pïchigh ompö ewu ECHOTYON, kopiyo paytagh ompö mori Tororöt.

⁴Melö tökekuroninyi ngat lö, “Nyo kikepïstö,” anta kïkurö korengu, “Korka nyo kikechal.” Kïkuro kaynengu nyo rel, “Nyo ngörökyini Tororöt,” kekurö korengu, “Nyo kiketar.” Ompöwölo ngörökyini ECHOTYON, akeyitöy nyinte le santeto korengu.

⁵Ompöwölo le ato ipöy mïrönö chepkïltït, kwipinyi tïkwïl nyinte nyini kighinyi. Kïle ato ngörökyini chi pö kensyö korkenyi nyo kep, kïngörökyininyi tïkwïl Tororöt.

⁶Kotönön ripï nïyetweku, we Yerusalem, cho mömïchinicha kïsisyö pöghet anta nangat. Mïchini kunonchï chane ECHOTYON kiyomisutkachi atömöwutyeghö nyinte.

⁷Mömïchininye kutö chane nyinte kimïny ntökïtenö kupintit ngat kanasyanta Yerusalem akwigh kïlïkwï kanasyan nyo oror ompö ngwïny kïmïkul.

⁸Kam ECHOTYON muma nyo ngwan, ay, kam nyinte muma ompö ewunyi nyo pö tagh lö, “Melö totönan ngat paghekwa kïlïkwï omisyö pungkökwa amelö tökïgheghöy pich cho le to dipaykakwa,* cho kyonyorukwa ompö kighotikwo.

⁹Wölo omekwa cho kyasïnga akatkat ail atolapay asalakwa ECHOTYON. Ogheghekwa dipay* ompö kiroryo Konyan nyo pö saghat, akwa cho kyorip apïtï sapipunechoni.”

¹⁰Akwa pipö Yerusalem olïtunö sanypa kanasyan, agha ara mït nyo weru pikökwa cho mïlonchot kaw! Agha are nyo wow nyo puryö koghïn! Otönö macheytin tökïsïwa pipö koros.

¹¹ Lechini ECHOTYON pipö ngwïny kïmïkul, omwochinö pipö Sayon lö, “Ngwïnöy ECHOTYON kïsörwokwa, akungwïnöy nko pich cho kikïsörï nyinte.”

¹²Kïkurenokwa, “Pipö Tororöt cho tïlilöch,” akekuronokwa, “Pich cho kösörï ECHOTYON.” Kïkuro Yerusalem, “Kanasyan nyo kacham Tororöt,” akekuro, “Kanasyan nyo melö kipïstö Tororöt.”