Read pokoot ISAYA 63 Bible Online

ISAYA 63 - pokoot bible

ISAYA 63

¹Ngo chitö nyï ngwïno kanasyanta Posra ompö koro Edom? Ngo nyinte nyï loköy sïro cho pïchighöch, cho pïröch, mi kukelu ompö wowïnto owesyenyi? Ani ECHOTYON nyete, nyo otïng owesyö osörï.

²Kïtepsyö pich lö, “Kï kölö ne tökelokyï sïro cho pïröch lö tök, le chi nyo pïröy pögho sapipun tökegh kïlïkwï dipay?”*

³ Kïmölyöngwï ECHOTYON lö, “Kopïrön pipö punton le sapipun amelö kimi chi nyo kingwïn kungarakanïn. Kyonyerön chane ompöwölo kyanarekan. Nka nyoni kighömï kisönkökwa sïroköchan.

⁴Kyamwaghan lö kikwitïta ato kïsöru piköchan. Ketïta nyu ato kichopöy kong pungkökwa.

⁵ Kyotöngönchan otini kimasïwanye chi nyo kingwïn kungarakanïn. Wölo kikonanïn nörekyenyan nyakanat, arïntan nyu ante poryenyu.

⁶Kyatïkatïkan pipö punton kïmïkul ompö nörekyenyan, arïngarïngan chane, amïlchan kisönkökwa ngwïny.”

⁷Omwotïtonan köromnyo ECHOTYON, Osölan nyinte ompö tïkwïn cho keghwecha nyinte. Kesoyön nyinte pipö Israel kutö tïkwïn cho chang ompö kisyonötenyi nko chomnyenyi nyo pö kokay.

⁸Atolapay kïlö ECHOTYON, “Piköchan chane, melö lïsanïn.” Kïlenyona kisörunö chane

⁹nyarïltangwa. Melö ki malaykayan, wölo nyinte ECHOTYON nyo kisörï chane. Kisörï chane ompö chomnyenyi nko ompö kisyonötenyi. Kiripöy nyinte chane ato le tagh kïnomnyö,

¹⁰wölo kïpeny ngalechi akwigh nyinte kuwongwï ompö chane. Nka nyoni kilïkwï ECHOTYON punyontengwo nyo kiporyeghö chane.

¹¹Atolapay kunan nyinte osis cho kipö könyisyok, osiswo Musa, mötworinto ECHOTYON. Kïtep chane lö, “Köwö onö ye nyu ECHOTYON nyanya kisörï kintöghoghiko pikachi atanya kiweröy kwenu nanam? Köwö onö ECHOTYON nyanya kitö Musa Mïkulöwunyi nyo tïlil,

¹² nyanya kintöghoghchï ompö ewunyi nyo awes akwigh tïkwïn cho echön kuwerï Musa?

¹³Nyanya kipesyö pögho nanam akuntöghoghchï pikachi kuwer pögh ori atökïsïkï kegh öroryö nyo pö kokay?” Ompöwölo kintöghoghchï ECHOTYON, kuwer chane pögh ori le angoletin cho weröy kor wölo le surkwen ompö kelyekwa akï melö pïtyot.

¹⁴Kïle ato kïrongöy tïch wölo wow suswon, kutö ECHOTYON pikachi kimïny lenyoni. Kintöghoghchï pikachi akutö konyït kaynatenyi.

¹⁵Topönö ngwïny ompö yïm, we ECHOTYON, aitopön ompö wölini le möngengu ompö tïlilyengu nko töroryengu. Köwö onö sïngatengu nyo wow ompö acha? Köwö onö owesyengu? Köwö onö chomnyengu nko kisyonötengu? Inanecha.

¹⁶Ompöwölo ichinyi paponcha, kïrkegh kïmenkïtechanye kukötinecho ompö Apraam nko Yakopo, wölo nyi, we ECHOTYON nyo ichï paponcha. Nyi nyaye isörwecha kïnomnyö.

¹⁷Kölö ne tepïstechanyi kechumponchenö ompö ortïneku? Kölö ne teghechanyi kesïköcha möt nyo wow ntökewöghökisyeghecha ortïneku? Mïlena ompö kisyonöt nyo pö mötworiku cho kipöghisyeghunyi nko ompö pich cho kökilïkwï cheku kïtenö osis.

¹⁸Kitukecha piköku cho tïlilöch, pungköcho ompö osis cho ngörï. Kitïkatïk chane kongu nyo tïlil.

¹⁹Keghwechanyi le ato kimelö kichinyi pöytoghintencha, le ato kitomönye kelïkunacha piköku ato le tagh.