Read pokoot ISAYA 64 Bible Online

ISAYA 64 - pokoot bible

ISAYA 64

¹Kölö ne tötomönye kareranyi wölnö le mïröt, airökwï ngwïny? Nyo kötösïwïyinyi kutïngkotï akïpotonchö ompö nyökoryö.

²Kötöpotonchot le pögh cho kutu ompö nökögh. Nyonö, ateporchinö punköku owesyengu, ategha pipö punton kïpotoncheghö tawungu!

³Kimi ato kingwïnanyi, aigh tïkwïn cho pö otyogh cho melö kikikönecha. Kisïwinyi kutïngkotï akïpotonchö ompö nyökoryö.

⁴ Möminye chi nyo le ompö akonga nyo kikïsïwa anta lïm Tororöt nyo kikongityot nko nyi, nyo ighchini tïkwïn cho pö töngönchin pich cho köninyi.

⁵Itokenyi pich cho ngöreksot otini ighöy tïkwïn cho pö man, chane cho nonöy wölo imöktonyi chane kïtïpisot. Kinarekanyi ompö acha, wölo kikiletacha tagh kegh ngokï, kïrkegh kinarekanyi lö ne, wölo kikïtasacha tagh kegh tïkwïn cho ghach. Kïngeta otini le awïyay.

⁶Kïchicha löwïr mwokïyis, kïrkegh keghacha tïkwïn cho kakïsïwïyi lö karamach, ki ghach tïkwïl! Kïlatecha sökö cho silonchot akïkutïta yomat akwompö ngokicha.

⁷Akï möminye chi nyo wöghöko akïsaghinyi. Möminye chi nyo ngwïnöy wölo imitenyi atökengarak. Anyï ye kewïngenyi kegh wölo kïmitecha, aipakadecha akwompö ngokicha.

⁸Wölo ichinyi paponcha, we ECHOTYON. Kïlatecha mönö ilatenyi ighinto tören. Kighechanyi,

⁹kïlenyona mesïwa nyo gha ompö acha anta irwokwecha ompö ngokicho kokay. Kïchicha piköku, syonchecha wey.

¹⁰Kalïkwï surkwen kanastineku cho tïlilöch, kalïkwï Sayon* surkwen kïlïkwï Yerusalem kïratyan.

¹¹Kikuwur ma kongu nyo tïlil, wölo kisogho akïsöleninyi papotïnecha. Kikïlïkwï kïratis wölo kikïchömecha löwïr.

¹²Ato kikwitïta atoni ye, o ECHOTYON, tesisenyi? Möminye kïgh nyo ighenyi, isisenyi pat, aipïstecha kewongunö kïtïl owesyencha so?