Read pokoot ISAYA 66 Bible Online

ISAYA 66 - pokoot bible

ISAYA 66

¹ Mwoghöy ECHOTYON lö, “Ngacharunyan wölnö le yïm akï kelto ngacharunyan ngwïnya. Kï kö nyo nen nyu nyo omukekwa otekwanïn? Akï yonö ato oghwanïkwa atamangan?

²Ani kegh nyo kyagh wölnö le mïröt kïmïkul! Ochan ngarakate ompö pich cho ipöy kegh ngwïny akïkötoy lelutkökwa akuwöghanïn akïterwanïn ngalechu.

³“Ighöy pich le wölo kömöktoy. Karkegh ompö chane ato kapar egh akwigh kïlïkwï amöros anta tötö ptangengmöt kïlïkwï amöros. Ato ketötö wawa kech anta karïng katpa kukïy. Ato ketötö pagh cho kïroptoy anta kisön pö nkïruwen. Ato ketötö mankoy cho ngutoy cho onyïn anta sagh körkeyïn. Pïlilöy chane nyoman ortïn cho kïrïpöy ato kïsoghöy.

⁴Kïlenyona opchinan kiwurat nyo nyoruno tïkuchini otyegho chane, ompöwölo puryö chi nyo kingitön otini kyokursyan anta lïm ngölyontenyan otini kyongölonchan.”

⁵Atere nyu chona opotonchot, ateköy ECHOTYON, kïgh nyo mwowokwa nyinte lö, “Wöchokwa pikökwa walaka ompöwölo oghönanïkwa amelö tïngenokwa kïgh chane. Ngemokwa chane kïlentöy, ‘Akanya kuporï ECHOTYON töroryenyi kïsörwokwa atökesïwenacha ato oturönchokwa.’ Wölo chane cho sïköy arasï!

⁶Atera kiteghat nyo kïlïmo kanasyan! Ngwïno kiteghatanoni Kö pö Tororöt.* Kechop kong ECHOTYON pungkachi nko nyoni pö kiteghatanoni!

⁷ “Karkegh kanasyantenyan nyo tïlil nko korka nyo lusïyi kïtomö kuchir.

⁸Akïmi sonye chi nyo lata nyoni nya? Kikïsïwa ngo tïkwïn cho lata choni? Kïyiyöy korï so asis akonga? Akeyiyöy pipö punton so panini lawel? Wölo melö kïghöy Sayon* nyo kogh kïtomö kïyï monechi.

⁹Molenchï kegh opunan pikachu ntökïrik otini kakïyiyöy atolapay ocholchan atoni tomö keyï.” Mwoghöy ECHOTYON.

¹⁰Ongörekyenö aturonchö nko Yerusalem, akwa chona ochömöy kanasyantanï! Ongörekyenö nko nyinte tïkwïl cho kyosönönchï!

¹¹Atongörökyenö nyu le monïng nyo chïchïnöy kitïneto kame.

¹²Mwoghöy ECHOTYON lö, “Okonokwa perur nyo pö kokay. Yinu sïkönöto pipö punton wölo omitekwa le lalwa nyo rotöy kömöy nko pengat. Okörekwa kegh nko monïng nyo pöghöy kame, akïnömo ewunechi ompö kïpesöyichi.

¹³Osoghsoghokwa, ompö Yerusalem le ato soghsoghöy korka montanyi.

¹⁴Ongörechokwa ato asïwekwa kïyoni kwigha. Konokwa owesyö nko porwöy cho karamach. Atolapay onkïtukwa nyu lö ani ECHOTYON nyo ongöroköy pich cho tekanïn, wölo oporchinan nörekyenyu punkachu.”

¹⁵Ompöwölo ECHOTYON nko ma. Wegho nyinte köpepoy pö chepkiriri otini ngwïnöy kuchopöy kong pungkachi.

¹⁶Pöro chane ma nko chok. Wongöy pipö ngwïny kïmïkul cho tökïle mwokïyis akï chang cho kïpöröy atoni.

¹⁷Mwoghöy lö, “Karik sörömu pich cho tïlilo kegh sowut pö pipö punton akïsagh, pich cho tuyot akutïlil kegh atökïpa paren, akwam panya nkïruwen nko mïr nko tïku walaka cho kïkïröy.

¹⁸Onkïtön kinonutkökwa nko ighisyewutkökwa. Ongwïnan ataghamït pich pipö punton löwïr. Sïwïyi nyu otini kötuyö chane, kïgh nyo muköy owesyenyan kwighöy

¹⁹akunkïtï lö ani nyo kachop kong chane. “Wölo otukan walaka ompö chane atayontan kïpa wölo mi puntonï cho lowöch, cho tomöcha kïlïm kaynatenyan anta sïwa wowïntönyan nko owesyenyan, petöy koro Tarsis nko Lipya nko Lud kïmi nko pich cho nkït kïwutïtoy kotï, akïpa ntökwit Tupal nko Akaya. Mwotïtoy pïchoni walaka wowïntönyan.

²⁰Yoku chane pikökwa cho kitoyechï koroswechoni atökïpkana puntonichoni akïkonanïn kïlïkwï ropöw. Mïtu chane kïpkonöy kutïngtönyan nyo tïlil nyo mi Yerusalem, pkono chane angoletin nko sïkïröy nko tamasay nko nkaritin cho kichutöy kïkongityö nko ato ipu pipö Israel ropöwo pagh Konyan ompö tïkwïn cho tïlilöch.

²¹Oghan walaka ompö chane kïlïku tïsï kïlïkwï walaka pipö Lawi.

²² “Kïle wölini ghyongtoy ngwïnya nyo rel nko yïm nyo rel ompö owesyenyan, kughyongtoy lenyoni pïnwöyikwa.

²³Pkonöy puntonï löwïr kïsoghenanïn Yerusalem ato kighöy Ichon pö Relïn pö Arawa nko Sapato* anka tïkwïl. Mwoghöy ECHOTYON.

²⁴“Sïwïyi chane otini petöy mïntïruch pö pich cho kipeny ngalechan. Mömeghsocha mökukwa kokay, amemisonye ma nyo pelöy chane. Ghöchini chane pipö ngwïny löwïr.”