Read pokoot LAWIN 1 Bible Online

LAWIN 1 - pokoot bible

LAWIN 1

¹Kïkur ECHOTYON Musa, ompö Ema nyo mi ECHOTYON* akïlenchï,

²“Lenchinö pipö Israel, ato töni chi anka tïkwïl ECHOTYON amöros, kwipuno okwot pö tïch anta kechir anta ngaror.

³Tötoy egh nyo lïpop nyo pö amöros nyo kïpelöy, akïkat kïwö kuka Ema nyo mi ECHOTYON atökïcham ECHOTYON nyinte.

⁴Könoghöy nyinte ewunyi mötïto egh nyo le amöros atökïlinyö nko ECHOTYON.

⁵Pöröy eghoni ompö wölo mi ECHOTYON, akïcheng werpö Aron cho le tïsï kisönkö akwisö kuwit kïghömï ato kïpelo amöros ompö kuka Ema nyo mi ECHOTYON.

⁶Atolapay kïyeng akïtanatan,

⁷lochini nyu tïsï kwen ato kïpelo amöros akunagh ma,

⁸akïcheng panyechay nko mötït nko sunetkö akukana kwenchay mi ma.

⁹Köytoy nyinte kwanka akïmwata pögh ngortine, atolapay kïpel tïsin panye löwïr ompö ato kïpelo amöros le ropöwon nyo ngutoy nyo karam ompö ECHOTYON.

¹⁰“Tötoy nyinte kwagha anta makal nyo lïpop ato pö ropöwontenyi kech anta aran.

¹¹Pörchini ato kïpelo amöros okumpö löt ompö wölo mi ECHOTYON, atolapay kïcheng tïsï kisönkö akwisö kuwit kïghömï ato kïpelo amöros.

¹²Tönotonöy nyinte panye kïmïnkech, atolapay kïcheng tïsin panyechay nko motït nko sunetkö akukana kwenchay mi ma.

¹³Wölo köytoy nyinte kwanka akïmwata pögh ngortine, atolapay kutö nyu tïsin ECHOTYON panye löwïr akïpel ompö ato kïpelo amöros le ropöwon nyo ngutoy nyo karam ompö ECHOTYON.

¹⁴“Tötoy nyinte chepïrïm anta kayuntï ato pö ropöwontenyi tarit.

¹⁵Ipu tïsin ropöwonte kïrich ato kïpelo amöros atolapay kuryan kat kïngat akïpel mötït akïpïrchï kisönkö kuwit kïghömï ato kïpelo amöros.

¹⁶Atolapay kïcheng kötömoghyon nyo mi sïghiny, akïlölökyï ato kïpelo amöros okumpö kongasis wölo kiyini aryon.

¹⁷Chengöy nyinte tarite akïkarer kïmi nko köpepokö, wölo melö köreröy kïlïkwï odeny. Atolapay kïcheng tïsin akïpel tarite kïmïkul ompö ato kïpelo amöros le ropöwon nyo ngutoy nyo karam ompö ECHOTYON.