Read pokoot LAWIN 10 Bible Online

LAWIN 10 - pokoot bible

LAWIN 10

¹Kïcheng werpö Aron Nadap nko Apiu keronytinekwa akutö ma ori atolapay kutö tïkwïn cho ngutoy cho onyïn cho kïpelöy le ropöwon ompö ECHOTYON. Wölo melö kitïlil, ompöwölo melö kimwochï ECHOTYON chane kutötö.

²Kungwïna ma wölo mi ECHOTYON panini akuwany chane lömïs, kïmeghö chane ompö tawu ECHOTYON.

³Kïlenchï Musa Aron, “Kimwowï ECHOTYON ngalechï otini kilö, ‘Mïchini kïkonyït pich löwïr cho pöghisyeghwanïn tïlilyenyan aporchinan chane ororyenyan.’ ” Kïsï Aron lasay.

⁴Kïkur Musa Misyael nko Elsapan, werpö Usiel papoto Aron nyo mïnïng akïlenchï chane, “Apkana yi, osïtö porwöyi werkökwo kutang kiroryo kanasyan, kunaka Ema mi ECHOTYON.”

⁵Kïlenyona kïpka chane akïsït kïtïng sïrokökwa cho koghöch kïlïtöy kiror, lenyini kömwochï Musa.

⁶Atolapay kïlenchï Musa Aron nko werkachi Eleasar nko Itamar, “Mopïstö putekwo kïtirirön amakarer sïrokökwo, kuporï lö omikwa lok atömomeghö atömönörekyï ECHOTYON pich löwïr. Wölo muköy kïriryö pipö Israel walaka löwïr ompö chane cho kewanya ECHOTYON ma.

⁷Manaka kuka Ema nyo mi ECHOTYON* tömomeghö, ompöwölo kikeyilenokwa mwaghpa ECHOTYON.” Kïlenyona kwigh lenyini kimwa Musa.

⁸Kïlenchï ECHOTYON Aron,

⁹“Meghegh kumïn anta dipay* nyi nko werköku, otini olïtöy Ema nyo mi ECHOTYON tömomeghö. Nyete kï kirurut ompö pïnwöy cho tökïpkonöy.

¹⁰Topesyenö cho tïlilöch nko cho melö tïlilöch nko cho le sïmnyon nko cho melö sïmnyon

¹¹ainet Israel kirurut löwïr cho kimwochï ECHOTYON chane ompö kuti Musa.”

¹²Kïlenchï Musa Aron nko werkachi odeny cho kingötï Eleasar nko Itamar, “Achenga ropöwo paghechay köngötunö ropöwechay kitöni ECHOTYON ompö ma ama kamasu ato kïpelo amöros nko makatyan nyo puryö mumar, ompöwölo tïlil tya.

¹³Amena ato tïlil, ompöwölo karerantangu nko werköku ompö omisyö nyo kïropchini ECHOTYON, ompöwölo kökïmwowanïn lenyoni.

¹⁴Wölo imukenyi nko moneku ome take nko kïpestö nyo kakiwïswis. Omekwa ompö ato tïlil ompöwölo kikekoninyi nko moneku le karerantankwa ompö ropöwo pipö Israel cho pö pöghisyö.

¹⁵Mïchini kepï kïpestö nko take nyo kiwïswisöy otini kitötoy sunet le ropöwonto omisyö ompö ECHOTYON. Lïku nyete karerantangu nko moneku, lenyini kimwa ECHOTYON.”

¹⁶Nyini kitep Musa paraku artanay pö ropöwonto ngokï, kïlïm lö kikepel lökïr. Kïnörekyï Musa Eleasar nko Itamar werpö Aron cho kingötï akïtep lö,

¹⁷“Kalïkwï ne tömamekwa ropöwonto ngokï ato tïlil? Ompöwölo tïlil tya, kikïkonokwa achenga ngoki pich löwïr otini oghekwa kilinyot ompö tawu ECHOTYON.

¹⁸Kïle wölo mepnye chi kisönkö kutang tïlil, kitö omokwa arte ato tïlil, lenyini kyamwaghan.”

¹⁹Kuyokyï Aron Musa lö, “Antö kaman ropöwonto ngokï kötöngörököy ECHOTYON ompö nyoni? Ompöwölo ketö pich ECHOTYON asete ropöwekwa pö ngokï akwipï amörostöngwa nyo kipelöy. Wölo kïrkegh kïlenyoni kï ketwanïn ngalechï ghach.”

²⁰Kïlenyona nyini kalïm Musa ngalechï, kïmïchï nyinte.