Read pokoot LAWIN 14 Bible Online

LAWIN 14 - pokoot bible

LAWIN 14

²“Achï kirurut pö chi nyo kyam psenkwet ompö asisini tïsöy kegh nyinte. Kimïtyini tïsin

³nyo wetöy kurosöy. Ato kisöp ompö sömewononi kyam nyinte,

⁴kïmwatïta tïsin kenömï törit odeny cho sötöte cho melö sïmnyon akepï ket pö törokwö nko sïra nyo pïrir nko isop.*

⁵Atolapay nyu kïmwatïta tïsin ketïgh tarite anka ompö tör nyo mi pögh cho karamach

⁶akïcheng tarite nyay tökïsatat nko ket pö törokwe nko sïre nyo pïrir nko isop* akulut kisön pö taritanay kakïtïghchï töronay mi pögh cho karamach.

⁷Atolapay kwisö kïnyïl mut nko odeny chichay kitïsöy ompö sömew akïmwa lö melö tökïsïmnyon chichï. Atolapay kïpïstö tarite nyay satate kupiltö.

⁸Kïmwat nyu chichay sïrokachi akïrwach putechi cho pö möt akuwunö kegh pögh, kïtïsö nyu nyinte, muköy nyu kungwïn möngot, wölo mölïtönye emenyi ompö osis mut nko odeny.

⁹Kïrwak putechi löwïr cho pö möt nko tamughyenyi nko puto kamama nko putechi walaka löwïr ompö asisto mut nko odeny. Atolapay kïmwat sïrokachi akuwun kegh melö tökïsïmnyon nyu nyinte.

¹⁰“Nyini ketïta asisto mut nko sömök, kurewï wara kechir odeny cho le mökol nko nyo sakat akonga cho pö köny akonga löwïr akïlïpopöch nko kilen sömök cho pö pïsya cho kakikulkulyö nko mwaghpa orolwö nko lal akonga nyo pö mwagh.

¹¹Töni tïsin chichay kïtïsöy nko ropöwechi Ema nyo mi ECHOTYON.*

¹²Atolapay kïcheng tïsin wawe anka nyo le makal akutötö kïpöyit ropöwon nyo kïghoktegho ngokï nko lala mwagh atökïlïkwï ropöwon nyo kiwiswisöy ompö tawu ECHOTYON

¹³akïtïgh wawe ompö atay kïpörchini ropöwonto ngokï nko amöros nyo kïpelöy ompö atay tïlil. Ighöy lenyoni kïle ropöwon nyo kïghoktegho nko ropöwonto ngokï kïpöyitu tïsï. Tïlilöch choni tya.

¹⁴Atolapay kïcheng tïsin kisön pö wawanay akïnyïra yit wal nyo pö okumpö tagh nko morïn nyo wow nyo pö ewu tagh nko morïna kel nyo wow nyo pö tagh nyo pö chichay mököy ketïs.

¹⁵Atolapay kïcheng tïsin mwaghay kite kutö koghogh pö ewunyi pö löt

¹⁶akulut morïnenyi nyo pö ewu tagh mwaghay akwistö ompö tawu ECHOTYON kïnyïl mut nko odeny.

¹⁷Atolapay kïcheng mwada kite ompö ewunyi akïnyïra yit wal nyo pö okumpö tagh nko morïn nyo wow nyo pö ewu tagh nko morïna kel nyo wow nyo pö tagh nyo pö chichay mököy ketïs kïmi nko kisön pö wawanay.

¹⁸Kïcheng tïsin mwada nyinö köngötyï ewunyi akïnyïra möt pö chichay. Ighöy nyu tïsin lenyoni atökulinyö chichay nko ECHOTYON.

¹⁹“Tötoy nyu tïsin ropöwonto ngokï atökwigh linyot nyo pö chichay kitïsöy ompö sïmnyontenyi. Nyini kewanta kegh kïpar amöros nyo kïpelöy,

²⁰atolapay kutötö amöros nyo kïpelöy nko ropöwo pagh ompö ato kïpelo amöros. Ighöy nyu tïsin linyot ompö chichay atökïtïsö.

²¹“Wölo ato meywon chi nyo memukönye ntökïnyorï tïkuchï löwïr, kïcheng wawa kech nyo le makal kïpöyit ropöwon nyo kïghoktegho ngokï nko kilö akonga nyo pö pïsya tökegh linyot akwompö nyinte akitasta mwaghpa orolwö le ropöwo pagh nko lal nyo mi mwagh

²²nko chepïrïmpen odeny anta kayuntun odeny, le ato kemuk, pö akonga ropöwo ngokï, kïpö anka amöros nyo kïpelöy.

²³Ipchini nyinte tïsin ompö asispa mut nko sömök tökïtïsö kegh ompö kuka Ema nyo mi ECHOTYON.

²⁴Atolapay kïcheng tïsin wawanay nko lal nyo mi mwagh akutötö le ropöwon nyo kiwiswisöy ompö ECHOTYON.

²⁵Tïghöy nyu tïsin wawanay akïcheng kisön tïkwïte akïnyïra chichay yit wal nyo pö okumpö tagh nko morïn nyo wow nyo pö ewu tagh nko morïna kel nyo wow nyo pö tagh.

²⁶Atolapay kïcheng tïsin mwaghay kite kutö koghogh pö ewunyi nyo pö löt

²⁷akulut morïnenyi nyo pö ewu tagh mwaghay akwistö ompö tawu ECHOTYON kïnyïl mut nko odeny.

²⁸Atolapay kïcheng mwada kite ompö ewunyi akïnyïra yit wal nyo pö okumpö tagh nko morïn nyo wow nyo pö ewu tagh nko morïna kel nyo wow nyo pö tagh kïmi nko kisön pö wawanay.

²⁹Kïcheng tïsin mwada nyinö köngötyï ewunyi akïnyïra möt pö chichay. Ighöy nyu tïsin lenyoni atökulinyö chichay nko ECHOTYON.

³⁰Tötoy nyinte chepïrïmpen anta kayuntun le ato kemuk,

³¹pö akonga ropöwonto ngokï, kïpöyit anka amöros nyo kïpelöy nko ropöwo pagh. Ighöy nyu tïsin lenyoni atökulinyö chichay nko ECHOTYON.

³²Chete kï kirurut cho pö chi nyo kam psenkwet akï memukönye ntökïnyorï ropöwon nyo tïso kegh.”

³³Kïlenchï ECHOTYON Musa nko Aron,

³⁴“Nyini katakwa koro Kanan nyo kyokonokwa amïla atönön rirïm ko ompö korononi,

³⁵kïmïchini kïwö chito kot kïmwochï tïsin lö, ‘Lentöy chi mi kïgh nyo lenye rirïm konyan.’

³⁶Kïmwatïta tïsin kerit tïku löwïr sany kïtomö kïwö nyinte kura rirïm, atömölïkwï tïku cho mi ori sïmnyon. Atolapay kïlït nyinte ori, kura köyay,

³⁷kïnyïl ato kinam rirïm nïyetkö kïmölökon cho nyörilöch nko cho pïröch cho kilït ori.

³⁸Kïwö nyu tïsin kïlït sany atolapay kïkar köyay ompö osis mut nko odeny.

³⁹Atolapay kungwïn ngat tïsin asisto mut nko odeny akura. Ato kighömï rirïmchay nïyetkö,

⁴⁰kïmwa tïsin keponchos koghi koyay chona kinam rirïm akewirchï ato le kasïma ompö kanasyan kiror

⁴¹akïmwatïta kengongogh koyay okumpö ori löwïr akïcheng nyïngwichay kakïngongogha nayat akep kepa kemïlchï kasamïchay.

⁴²Atolapay kechengwï koghïn walaka aketö walay kikïponchos akechengwï nyïngwïny walaka kemala wölay kikïngongogh ompö köyay.

⁴³“Ato rumï ngat rirïm ompö koyay otini kikeponchos koghi akengongogh akemal,

⁴⁴kïwetöy tïsin kurosöy. Ato kighömï rirïm kot kï kikïlïkwï sïmnyon.

⁴⁵Kïngongöy köyay nko keti nko koghi löwïr nko nyïngwïtyante nyini kikïmala akwip nyinte kasamïchay.

⁴⁶Akï chi nyo kölït köyoni kï karat, kïlïku sïmnyon ntökwimön

⁴⁷akï chi nyo körï ngwïny anta omisyeghö köyoni kïmwötöy sïrokachi.

⁴⁸“Wölo ato ngwïn tïsin kuros kot ato möghömïnye rirïm kot, otini kikemal, kïmwatïta nyu tïsin lö melö sïmnyon ompöwölo kingeta rirïm.

⁴⁹Chengöy nyu törit odeny cho tïso kot nko ket pö törokwö nko sïra nyo pïrir nko isop.

⁵⁰Atolapay kïtïgh tarite anka ompö tör nyo mi pögh cho karamach

⁵¹akecheng törokwe nko isop nko sïre nyo pïrir nko taritanay tökïsötat akulut kisönchay pö taritanay nyay kakïtïgh mi pöghechay karamach akwisö köyay kïnyïl mut nko odeny.

⁵²Kïlenyona kutïsoy nyinte kot kisönchay pö tarit nko pöghechay karamach nko taritanay satate nko ket pö törokwö nko isop nko sïre nyo pïrir.

⁵³Atolapay kïpïstö taritanay satate kupiltö kutang wuw sanypa kanasyan. Ighöy nyu tïsin lenyoni atökutïlil köyay, akï tïlilitu lenyoni.”

⁵⁴Chete kï kirurut cho pö psenkwet nyo rumuno

⁵⁵nkwich nko kutunat nko tasus nko cho pö rirïm cho rumuno sïra nko kö.

⁵⁶

⁵⁷Chete kï kirurut cho poru sïmnyon kïgh anta melö sïmnyon.