Read pokoot LAWIN 15 Bible Online

LAWIN 15 - pokoot bible

LAWIN 15

¹Kïlenchï ECHOTYON Musa nko Aron,

²“Omwochinö pipö Israel lö, ato chi anka tïkwïl nyo kanam kisononï kï sïmnyon.

³Nyï kï kirurut nyo pö sïmnyontönenyi ato köpkono portanyi pïrutït anta kökikïmuryö kï sïmnyon.

⁴Pöröy anka tïkwïl nyo korï nyinte anta kïgh anka tïkwïl nyo kötöpö nyinte kïlïku sïmnyon.

⁵Chi anka tïkwïl nyo swongöy pöröyenyi kï mwötöy sïrokachi akuwun kegh akïlïku sïmnyon ntökwimön.

⁶Wunöy chi anka tïkwïl sïrokachi akuwunö kegh pögh nyo töpo ato katöpo chi nyo kanam kisononï akïlïku sïmnyon nyinte ntökwimön.

⁷Mwötöy sïrokachi akuwun kegh chi anka tïkwïl nyo swongöy chichay akïlïku sïmnyon nyinte ntökwimön.

⁸Ato ngwïtyï chichay chi nyo melö sïmnyon, kuwunöy chichoni sïrokachi akuwun kegh akïlïku sïmnyon ntökwimön.

⁹Lïku sïmnyon menyon anka tïkwïl nyo kïrötyini angole kïtöpö chichay.

¹⁰Lïku sïmnyon chi anka tïkwïl ntökwimön nyo swongöy kïgh nyo kötöpö chichay anta kip kïyoni akuwunöy sïrokachi akuwun kegh.

¹¹Ato swany chichay chi amelö kewunote morichi, kuwunöy chichoni sïrokachi akuwun kegh akïlïku sïmnyon ntökwimön.

¹²Ato swany chichay tör anka kïtïkon ketïghöy töre wölo kiwunöy nyo le otupö ompö pögh.

¹³“Nyini kösöp chichay kanam kisononï, kïpöghön osis mut nko odeny, atolapay kuwun sïrokachi akuwun portanyi ompö pögh cho rotöy kïtïsö nyu nyinte.

¹⁴Nyini nyu ketomtö asisto mut nko sömök kwip chepïrïmpen odeny anta kayuntun odeny kuka Ema nyo mi ECHOTYON* akutö tïsin.

¹⁵Atolapay kutötö nyu tïsin akonga kïpöyit ropöwonto ngokï kïpöyit anka amöros nyo kïpelöy. Ighöy nyu tïsin lenyoni atökulinyö chichay nko ECHOTYON.

¹⁶“Ato am chi menyon, kuwunöy portanyi löwïr akïlïku sïmnyon ntökwimön.

¹⁷Kiwunöy sïra anka tïkwïl nko menyon nyini köpechï sïma akïlïku sïmnyon ntökwimön.

¹⁸Ato rï chi nko korka kuwunöy kegh kwodeny akïlïku chane sïmnyon ntökwimön.

¹⁹“Ato töpo yona korka, kïlïku sïmnyon osis mut nko odeny akï chi nyo swongöy nyinte kïlïku sïmnyon ntökwimön.

²⁰Lïku kïgh anka tïkwïl nyo sïsïnöy nko nyo töpo nyinte sïmnyon ompö osiswechoni.

²¹Chi nyo swongöy pöröyenyi,

²²anta kïgh kïtïkon nyo töpo nyinte

²³kuwunöy sïrokachi akuwun kegh akïlïku sïmnyon ntökwimön.

²⁴Akwoto rï chi nko korka ompö osiswechi cho töpo yona, kïlïku sïmnyon nyinte osis mut nko odeny, akïlïku sïmnyon pöröy nyo körï chichoni.

²⁵“Ato yit korka osis cho chang, amelö atay töpo yona anta töpo yona kïtïl atay le ngat, kïlïku sïmnyon ompö osiswechini tökuyitöy löwïr le ompö osiswechi cho töpo yona.

²⁶Lïku sïmnyon pöröy anka tïkwïl nyo rïwöy nyinte nko kïgh anka tïkwïl nyo töpo nyinte ompö osiswechoni.

²⁷Lïku sïmnyon chi nyo swongöy tïkuchï, mwötöy sïrokachi akuwun kegh.

²⁸Wölo ato kisöp nyinte kumpur osis mut nko odeny, nyini kemuchö kïmelö tökïsïmnyon.

²⁹Nyini ket asisto mut nko sömök kïnam chepïrïmpen odeny anta kayuntun odeny akwipchï tïsin ompö kuka Ema nyo mi ECHOTYON.

³⁰Atolapay kutötö nyu tïsin akonga kïpöyit ropöwonto ngokï kïpöyit anka amöros nyo kïpelöy. Ighöy nyu tïsin lenyoni atö kulinyö kokonay nko ECHOTYON.

³¹“Kïlenyona mwochinö pipö Israel lö, orip kegh mosïmnyon Ema nyo mi ECHOTYON ompö kwenunkwa atömomeghö.”

³²Chete kï kirurut nyo pö chi nyo kanam kisononï nko chi nyo kam menyon

³³nko ompö korka tïkwïl nyo töpo yona nko mïrön anka tïkwïl nyo rïwöy nko korka nyo le sïmnyon.