Read pokoot LAWIN 17 Bible Online

LAWIN 17 - pokoot bible

LAWIN 17

¹Kïlenchï ECHOTYON Musa,

²“Mwochinö Aron nko werkachi nko pipö Israel löwïr lö, anyï ngölyon nyo kamwa ECHOTYON.

³Ato pörchï chi nyo pö Israel egh anta wawa kech anta aran ompö kiror

⁴amepïnye kuka Ema nyo mi ECHOTYON* le ropöwon ompö ECHOTYON kï kikïlel nyinte, mïchini kepesyö chichoni nko pikachi.

⁵Keröte nyete ompö pipö Israel lö, möroptocha amörostinekwa ompö wuw, wölo ipchini tïsin atö kïropta ompö kuka Ema nyo mi ECHOTYON le ropöwo pöghisyö.

⁶Iso nyu tïsin kisönkö ato kïpelo amöros ompö kuka Ema nyo mi ECHOTYON akïpel sunetkö kïngutö nyo anyïn ompö ECHOTYON.

⁷Atömökïpörchini chane amörostinekwa oy akwighchï ECHOTYON nyo gha. Lïku nyete kirurut nyo pö kokay ompö pïnwöyikwa.

⁸“Kipesyot chi nko pikachi nyo pö kö pö Israel anta ton nyo möngöy nko chane nyo tötoy amöros nyo kïpelöy anta ropöwon anka tïkwïl ompö ECHOTYON amelö ompö kuka Ema nyo mi ECHOTYON.

¹⁰“Ato ghegh chi nyo pö Israel kisön anta ton nyo möngöy nko chane, otöghan nyinte akïmïchini kepesyö chichoni nko pikachi.

¹¹Mi söpon kisön, kïlenyona nka nyoni kömwowokwa ECHOTYON lö kïmïltoy kisön ompö ato kïpelo amöros atökïcheng ngoki pich, ompöwölo kisön cho ighöy linyot.

¹²Nkanyï kolenchan pipö Israel motöp ntam peny nyo mi kisön, kïrkegh ton nyo möngöy nko akwa.

¹³“Ato wetöy chi pö Israel sakas anta ton nyo möngöy nko chane akïnyorï tyony anta tarit nyo kyomöy kïmïchini kïpïstö kisönkö kïpa ngwïny atolapay kïtïpö nyïngwïny.

¹⁴Mi söpon pö ighan anka tïkwïl kisön, kïlenyona nka nyoni kimwochï ECHOTYON pipö Israel lö, motöp ntam peny nyo mi kisön. Ato am chi kepesyöt nko pikachi.

¹⁵“Akï chi nyo pö Israel anta ton nyo möngöy nko akwa, nyo omöy peny pö meghan anta nyo kam tyony kuwunöy sïrokachi akuwun kegh, akïlïku sïmnyon ntökwimön.

¹⁶Wölo ato melö kewun sïrokachi anta wun portanyi, kïnömöy nyinte ngokichi.”