Read pokoot LAWIN 19 Bible Online

LAWIN 19 - pokoot bible

LAWIN 19

¹Kïlenchï ECHOTYON Musa,

²“Mwochinö pipö Israel lö otïlilitunö, ompöwölo ochan tïlil ECHOTYON Tororötïnkwa.

³Konyïtö chi anka tïkwïl papongu nko yongu, aikïr Sapato.* Ochan ECHOTYON Tororötïnkwa.

⁴“Mowöghökisyö atang wölo mi körkeyïntinö anta oghchï kegh tororötin cho kipötöy. Ochan ECHOTYON Tororötïnkwa.

⁵“Ato otönikwa ECHOTYON ropöwonto pöghisyö orip kirurutköchan atachaman ropöwontenkwa.

⁶Kyomöy pentö asisini kotötekwa anta asïyech tökwoghö akepel lökïr nyo köngötï ntökwit asisto sömök.

⁷Kïkïröy ato kyam ompö asispa sömök, melö tökïtïlil, amökechömönye.

⁸Kipesyot nko pikachi chi anka tïkwïl nyo omöy kwomöy nyinte ngokichi, ompöwölo kesïmnyon kïgh nyo tïlil nyo pö ECHOTYON.

⁹“Ato olöy paghekwo, mol ntökwit nyini le söröm amakwaghata rarakan.

¹⁰Amopït sapipunekwo ompö par lö tïwöywöy amakwagh akwe cho köchïntoy. Opïsyinekwa chona mey nko to. Ochan ECHOTYON Tororötïnkwa.

¹¹“Mochorsyö anta imwagh putintön anta ilïsisyö.

¹²Mewalwal kegh ompö kaynenyan ompö putintön, irat kaynenyan. Ochan ECHOTYON Tororötïnkwa.

¹³“Menyang pöröryengu anta imasa kinyi ametöptö ropïyeni mötworin ntökwitïta asïyech.

¹⁴Mochïp cho mingote anta itö kïgh tawu chepkarot nyo kwötöy nyinte, wölo konyïtanïn. Ochan ECHOTYON Tororötïnkwa.

¹⁵“Merop kamas ompö kirwokutköku. Mesyonchï cho le mey anta iwagh sïkön. Irwokyï pöröryengu ompö man.

¹⁶Amengalansategha piköku, ilïkwï kïyole putin amemwagh söwintöno putintön nyo muköy kïpar pöröryengu. Ochan ECHOTYON.

¹⁷“Merey werïngwo ompö mïkulöwungu, wölo asata ngalekwo nko nyinte atömamïn ngokï.

¹⁸Metökisyö anta ipö kegh sikong nko piköku, wölo chama pöröryengu le wölo ichömtonyi kegh nyinte. Ochan ECHOTYON.

¹⁹“Irip kirurutköchan. Amekany kïrïsyö twaku nko walaka cho melö tïch amelechï parengu kösïgh tororyon odeny cho sisinchö amelach sïra akonga nyo kikïnapa usin odeny cho sisinchö.

²⁰“Ato rï chi nko korka nyo le sekeyon nyo kakyolchï chitö anka, wölo tomönye kutötö kïgh anta ketyakta kïwö, kïnyoru chane sitöt, wölo melö kïtïghöy kïma, ompöwölo kimelö tyakat sekeyontononi.

²¹Rewu nyinte makal nyo le ropöwontenyi kuka Ema nyo mi ECHOTYON* nyo le ropöwon nyo kïghoktegho ngokï.

²²Atolapay kwighchï tïsin nyinte linyot ompö makalanay akelöstoghchï ngokichi.

²³“Nyini katakwa koro Kanan akatkat ket löwïr kïtïkon cho kyomöy, okïr nyu mam akwe ompö könyis sömök otini körïr, ompöwölo tökïsïmnyon.

²⁴Nyini ketomtö könyito angwan kïmelö tökïsïmnyon akwechï löwïr, akïlïku ropöwo kwolöt ompö ani.

²⁵Wölo ato amakwa akwe ompö könyito mut kuyinöy tya akwe walaka. Ochan ECHOTYON Tororötïnkwa.

²⁶“Metöp ntam peny nyo mi kisön anta ipöghisyeghö pönut.

²⁷Ametörör mötïngu anta imut tamughyengu.

²⁸Mewat kolö ompö chi nyo kama anta imut sorim. Ochan ECHOTYON.

²⁹“Mepïsyï tipiku kïlïkwï chepkarten, atömölïtï chepkartanan kor akïnyïghï ghöyityö.

³⁰Irip Sapato aikonyït Konyan. Ochan ECHOTYON.

³¹“Mewö wölo mi chemöwostin anta ponï, atömelïkwï sïmnyon. Ochan ECHOTYON Tororötïnkwa.

³²“Ongetyï pich cho kayositu akonyït chane. Atekanïn ompö konyït, ochan ECHOTYON.

³³Ato möngöy ton korenkwa moghchï nyo gha.

³⁴Lenye ton nyo möngöy nko akwa chitönkwa acham nyinte le akwane kegh, ompöwölo kyochikwa tïkwïl to ompö koro Misri. Ochan ECHOTYON Tororötïnkwa.

³⁵Metöp ntegh nyo gha ompö kirwokut nko ompö kipimut anta kiyitut.

³⁶Ipöghisyeghö kipimöw nko kiyitut cho pö man. Ochan ECHOTYON Tororötïnkwa nyo kyamïtunenekwa koro Misri.

³⁷Irip kirurutköchan löwïr. Ochan ECHOTYON.”