Read pokoot LAWIN 20 Bible Online

LAWIN 20 - pokoot bible

LAWIN 20

¹Kïlenchï ECHOTYON Musa,

²“Mwochinö pipö Israel, kïtïgh chi nyo pö Israel anta ton nyo töni montanyi Molek. Wiro pich nyinte koghïn.

³Otöghan nyinte akepesyot nko pikachi, ompöwölo ketö montanyi Molek. Kesïmnyon Konyan akurat kaynenyan nyo tïlil.

⁴Ato igh kegh piko kore lö, masïwacha kïgh nyo kegh chichoni,

⁵otöghan nyu chichoni nko katanyi nko chane löwïr cho karïp ngalechi kutö monekwa Molek. Akepesyot chane nko pikökwa.

⁶“Ato wö chi wölo mi chemöwostin nko ponï, otöghan nyinte akepesyot nko pikachi,

⁷Otïlilitö kegh nyu, ompöwölo ochan ECHOTYON Tororötïnkwa.

⁸Orip kirurutköchan, ompöwölo ochan ECHOTYON nyo otïlilokwa.

⁹“Chi anka tïkwïl nyo chïpöy paponyi anta yonyi ketïghöy akwomöy nyinte kisönkachi.

¹⁰“Ato rï chi nko korketo pöröryenyi, ketïghöy chane kwodeny.

¹¹Ato rï chi nko rïwöy nko korketo kwanta, kï kerat kwanta. Kïtïghöy chane kwodeny akwomöy chane kisönkökwa.

¹²Ato rï chi nko korketo werïnyi, ketïghöy chane kwodeny ompöwölo katakalan chane akwomöy chane kisönkökwa.

¹³Ato rï chi nko mïrön anka le ato korka, kegh chane kwodeny takalnan. Kïtïghöy chane kwodeny akwomöy chane kisönkökwa.

¹⁴Ato ip chi työ nko yonyi tïkwïl kepelöy chane löwïr, ompöwölo kegh takalnan, atömökïmi chi su nyo ighöy kïgh nyo lata nyoni ompö akwa.

¹⁵Ato rï chi nko tyony ketïghöy nko tyontö.

¹⁶Ato mukyï korka kïrï nko tyony, ketïghöy korketö nko tyontö akwomöy chane kisönkökwa.

¹⁷“Ato ip chi cheptöngwa anta cheptöngwa nyo pö kot anka kï takalnan nyoni akepesyot chane ompö tawu pikökwa, ompöwölo korï nko cheptongwa, omöy nyinte ngokichi.

¹⁸Ato rï chi nko korka nyo töpo yona, kepesyot chane kwodeny nko pikökwa ompöwölo melö karïp kirurut pö tïlilïn.

¹⁹“Merï nko chepto ompö yongu anta sankengu, ompöwölo takalnan nyoni, Omöy chane ngokikwa.

²⁰Ato rï chi nko korketo mamatanyi kikurat mamatanyi, Omöy chane ngokikwa akïmeghot mösïch monïng.

²¹Ato ip chi korketo werïngwa, kï sïmnyon nyoni, ompöwölo kerat werïngwa. Meghot mösïch monïng.

²²“Kïlenyona orip kirurutköchan nko ngalechan löwïr atömötaghak koronï omïtyinokwa.

²³Metöp nterïp otöptino puntonichï oyonan ye ompö tawunkwa, ompöwölo kigh chane tïkuchï löwïr nkanyï ye nyu köghöchanïn chane.

²⁴Wölo komwowokwa lö, ‘Omïtekwa kor nyo okonokwa kïlïkwï nyinkwa, kor nyo chang chö akï wow kumata,’ ompöwölo ochan ECHOTYON Tororötïnkwa nyo kyaghakwa asisituna nko pich walaka.

²⁵Kïlenyona nyu opesyenö tyonkïn nko törit cho melö sïmnyon nko cho le sïmnyon. Okïr kegh mam tyonkïn anta törit cho kyoghitön ompö akwa lö sïmnyon. Ato amakwa olïkukwa sïmnyon.

²⁶Alïkuna cho tïlilöch ompö ani, ompöwölo ani ECHOTYON, ochan tïlil. Ani nyo kyangotokwa asisituna nko pich walaka atalïkuna chichan.

²⁷“Ato mïrön anta korka nyo le chemöwosyon anta ponin ketïghöy. Kïwiro koghïn chane akwomöy chane kisönkökwa.”