Read pokoot LAWIN 21 Bible Online

LAWIN 21 - pokoot bible

LAWIN 21

¹Atolapay kïlenchï ECHOTYON Musa, “Mwochinö tïsi werpö Aron lö, mosïmnyonö kegh chi nyo kama ompö kaporkökwo,

²kïpoto ato yonyi anta paponyi anta werïnyi anta cheptanyi anta werïngwa

³anta cheptöngwa nyo möngöy nko nyinte nyo tomönye kep

⁴amekany kusïmnyonö kegh tïlya ompö kensyö nyo kama.

⁵ “Mötöröröcha tïsï mötöwekwa anta silsil tamughayikwa anta mut porwöyikwa kuporï lokekwa.

⁶Lïku chane cho tïlilöch ompö ani amesïmnyonöcha kaynenyan, ompöwölo tötoy chane ropöwo omisyö ompö ani, kïlenyona kïmïchini kïtïlilitu.

⁷Mepönye chepkartayan anta nyo melö chepkïltït anta nyo kiketyak, ompöwölo tïlilöch tïsï ompö Tororötïngwa.

⁸Okonyïtekwa tïlilöch tïsï ompöwölo tötoy chane ropöwonto omisyö ompö ani. Ochan ECHOTYON nyo tïlil nyo otïlilokwa.

⁹Ato sïmnyon kegh chepö tïsin ompö chepkartanan, kï ketö paponyi arasï, kepelöy nyinte lökïr.

¹⁰“Ato Tïsin nyo Wow* ompö werkökwa nyo kikeyil atökulach sïro pö tïsintön, kïmelö pïstoy putechi kïtirirön anta pachpach sïrokachi kuporï lokechi.

¹¹Amöwetönye ato mi mïntïrïch, kïrkegh kö paponyi anta yonyi, atömesïmnyon kegh,

¹²anta lït Ema nyo mi ECHOTYON* kï sïmnyon. Ompöwölo mi mwaghay pö ECHOTYON mötïnyi. Ochan ECHOTYON.

¹³Ipöy nyinte chepkïltït.

¹⁴Mepönye korka nyo le mïsïk anta nyo kiketyak anta korka nyo kikesïmnyon ompö anta chepkartanan. Wölo ipöy korka nyo pö arengwa nyo le chepkïltït.

¹⁵Atömesïmnyon monechi ompö pikökwa, ompöwölo ochan ECHOTYON nyo otïlilan nyinte.”

¹⁶Atolapay kïlenchï ECHOTYON Musa,

¹⁷“Mwochinö Aron lö, mekany ntökungwïn montöngu kokay ompö pïnwöyikwa nyo melö lïpop kutö ECHOTYON ropöwo omisyö.

¹⁸Ompöwölo melö mi chi nyo melö lïpop nyo tötoy ropöw chi nyo le chepkarot anta nyo ngwolöy anta nyo kinyömïghö tokoch anta nyo kikudö ewu anta kel,

¹⁹anta chi nyo kinyamïn kel anta egh

²⁰anta nyo tïng kapyok anta kyarïngan kïtangoghit anta chi nyo le toler anta nyo tïng nkwich anta kapomparen anta nyo le latan.*

²¹Möminye chi nyo pö ara Aron nyo melö lïpop nyo ngwïnöy kutötöy ropöwo omisyö ompö ECHOTYON.

²²Muköy chichoni kwomöy omisyewut cho tïlilöch nko cho tïlilöch tya,

²³wölo mörikönye anankanay tïlil anta pusta ato kïpelo amöros, tömesïmnyon atay tïlil, ompöwölo ochan ECHOTYON nyo otïlilan chane.”

²⁴Kïngölonchï nyu Musa Aron nko werkachi nko pipö Israel löwïr lenyoni.