Read pokoot LAWIN 22 Bible Online

LAWIN 22 - pokoot bible

LAWIN 22

¹Atolapay kïlenchï ECHOTYON Musa,

²“Mwochinö Aron nko werkachi, kïripö kegh ropöwo pipö Israel cho tïlilöch cho kitïlilwanïn chane atömesïmnyon kaynenyan nyo tïlil. Ochan ECHOTYON.

³Ato rik pipö ara Aron cho le sïmnyon ropöwo pipö Israel cho tïlilöch cho kitïlilwanïn chane, kepesyot nko pikachi. Ochan ECHOTYON.

⁴“Momönye chi nyo pö ara Aron ropöw cho tïlilöch, nyo amat sömewo psenkwet anta nyo pkono pïrutït portanyi, ntökïtenö kïtïlilit nyinte. Ato swany tïsin kïgh nyo le sïmnyon anta nam mïntïrïch anta chi nyo kam menyon

⁵anta swany chi nyo le sïmnyon anta tyony,

⁶kïlïku sïmnyon ntökwimön, amomönye ropöw cho tïlilöch, kïpoto ato wun kegh.

⁷Tïlilitu nyu nyinte otini köröytö asis akumï kwam ropöw cho tïlilöch, ompöwölo omisyenyi nyoni.

⁸Momönye pempö tyony nyo kama anta nyo kam tyony atömesïmnyon kegh. Ochan ECHOTYON.

⁹“Kïlenyona mïchini nyu kïrïp tïsï ngalechan atömam ngokikwa cho pö sïmyontönengwa akïmeghö. Ochan ECHOTYON nyo otïlilan chane.

¹⁰“Momönye chi nyo pö sany ropöw cho tïlilöch, kö tonto tïsin nyo möngöy tïkwïl anta chi pö kasï.

¹¹Wölo muköy sekeyonta nyo kal tïsin nko chane cho kakïyichï kayoni ntökwam omisyononi.

¹²Ato ip chi pö sany chepö tïsin, kïmemukönye cheponi kwam ropöw cho tïlilöch,

¹³wölo ato ma ponto kokononi anta kityak akï puryö monïng akïmïla katangwa, kumuköy kwomöy omisyononi.

¹⁴“Ato am chi pö sany ropöw cho tïlilöch amelö ompö kwötyin, kïtösöy akonga ompö mut nyo pö olyenyi atolapay kutö tïsin.

¹⁵Mömïchininye kusïmnyon tïsin ropöw cho tïlilöch cho ketö pipö Israel ECHOTYON,

¹⁶kïpïsyï chi pö sany kwam akwipchï chichoni ngokï. Ochan ECHOTYON nyo otïlilokwa.”

¹⁷Atolapay kïlenchï ECHOTYON Musa,

¹⁸“Mwochinö Aron nko werkachi nko pipö Israel lö, ato tötoy chi nka tïkwïl nyo pö Israel anta ton chane ropöwontenyi nyo pö kiwalwalat anta nyo pö chamatenyi,

¹⁹kutötoy eghin anta kechir anta ngaror cho lïpopöch, atökecham.

²⁰Meropta kïgh nyo melö lïpop, ompöwölo melö chömöy ECHOTYON.

²¹Ato tötoy chi ropöwonto pöghisyö ompö ECHOTYON, atökupuntö kiwalwalatenyi anta nyo pö chamatenyi kutötoy kyak cho lïpop atökecham.

²²Motö ECHOTYON amöros pö kyak cho köryot anta cho ngwolyot anta cho kimïrisyö anta pkono pïrutït anta cho tïng nkwich anta kapomparen. Melö kitötoy kyakichoni le ropöwo omisyö ompö ato kïpelo amöros.

²³Omukekwa ntotötö egh anta wawa kech nyo tangogh por karerana anta kogh le ropöwonto chamat, wölo melö kïchömöy ato pö kipuntogh kiwalwalat.

²⁴Amoropchï ECHOTYON kyak cho kikilïwolïw kitïn anta kikïghyösigh anta cho lötot amagh kïgh nyo lata nyoni ompö korengwo.

²⁵Amoropchï Tororötïngwo kyak cho lata choni cho kyalekwa to le ropöwo omisyö. Melö kïchömöy, ompöwölo melö lïpopöch.”

²⁶Atolapay kïlenchï ECHOTYON Musa,

²⁷“Töpo mogh anta wawa kech anta nyo pö aran nko kame osis mut nko odeny. Wölo kïngeta asisto mut nko sömök kutang tagh, kechömöy kïlïku ropöwon nyo pö ECHOTYON.

²⁸Mepar tany nko modanyi anta kech nko wawenyi asisini le akonga.

²⁹Ato iropchinenyi ECHOTYON amöros nyo pö sörö iropta ompö or nyo chömeninyi ECHOTYON.

³⁰Akyomöy kuwonyö ompö asisini amöngötunye ntökwit tökwoghö. Ochan ECHOTYON.

³¹“Kïlenyona orip kirurutköchan agh lenyini mwoghöy. Ochan ECHOTYON.

³²Mosïmnyon kaynenyan nyo tïlil wölo mïchini kïtekanïn pipö Israel. Ochan ECHOTYON nyo otïlilokwa

³³nyo kyamïtunenekwa koro Misri atalïkwan Tororötïnkwa. Ochan ECHOTYON.”