Read pokoot LAWIN 24 Bible Online

LAWIN 24 - pokoot bible

LAWIN 24

¹Kilenchï ECHOTYON Musa,

²“Mwochinö pipö Israel kwipï mwaghpa orolwö nyo karam tökïpöyit kitömöwon, tökïnagh kïnomnyö ompö Ema nyo mi ECHOTYON.*

³Noghöy Aron kitömöwonte nangat akïkany kïnagh kïyech ompö ananka wölo mi Santuku Muma* okumpö sany ompö tawu ECHOTYON. Nyete kï kirurut ompö pïnwöy löwïr.

⁴Ripöy Aron kitömöwechoni ket pö koltin kïnöghyö kïnomnyö ompö tawu ECHOTYON.

⁵“Igh makatin taman nko odeny nyo pö akonga pïsya kilen odeny.

⁶Aitötyï mesa nyo kikiluma koltin kïpeghategha tororyon odeny. Mut nko akonga ompö wop anka tïkwïl.

⁷Atolapay itö tïkuchay ngutoy cho onyïn parakungwa tökïlïkwï machey nyo pö makatinechay löwïr atökeropchï ECHOTYON ompö Ema.

⁸Kipu makatine tawu ECHOTYON ompö asispa Sapato* anka tïkwïl, ighöy le nyete pipö Israel kokay akwompö muma* nyo kyam nko ECHOTYON.

⁹Pöyitu makatine Aron nko werkachi akyomo wölo tïlil, ompöwölo karerantangwa nyo pö omisyö cho kïropchini ECHOTYON ompö ma.”

¹⁰Kinget chi nyo kile chi pö Misri kwanta kï pö Israel yonyi nyo kikuro Syelomit chepö Dipri nyo pö ara Dan kisyal nko chi pö Israel. Akï nyini kitökïsyölöy kïchïp chichay kaynata ECHOTYON nyo tïlil, kïlenyona kemït nyinte wölo mi Musa.

¹²Kikïrötyï nyinte chela ntökïtenö kuporu ECHOTYON machatenyi wölo kidoy.

¹³Kïlenchï nyu ECHOTYON Musa,

¹⁴“Mïta chichay köchïpisyö kïlït kanasyan kiror aikany kukana ewunekwa mötïnyi pïchini löwïr kilïmöy kuchïmpisöy nyinte kuporï lö kilel nyinte atolapay ikany kïlökö tuyot kïmïkul nyinte koghïn.

¹⁵Atolapay ilenchï pipö Israel, chi anka tïkwïl nyo chïpöy Tororötïnyi kwomöy nyinte ngokichi.

¹⁶Nyinte nyo mwoghöy kaynata ECHOTYON ketïghöy kïma. Lökoy tuyo Israel nyinte koghïn. Ato chi anka tïkwïl nyo pö Israel anta nyo le ton nyo mwoghöy kaynata ECHOTYON nyo tïlil ketïghöy.

¹⁷“Ato tïghisyö chi ketïghöy nyinte.

¹⁸Ato par chi tepa chi anta aran, kutöktoy cho tenö chini, söpon ompö söpon.

¹⁹“Ato igh chi chitö anka kunyamïn, keghöy nyinte kunyamïn tïkwïl.

²⁰Ato mïregh chi kowo chitö anka, kemreghöy nyenyi, akwato rït chi konto chitö anka, kerïtöy kontanyi. Ato mïregh chi kelata chi, kemreghöy nyenyi. Otini kïnye kegh chi chitö anka kunyamïn, keghöy nyinte kunyamïn tïkwïl.

²¹Ato par chi tepa chi anta aran, kutöktoy cho tenö chini. Ato tïghisyö chi ketïghöy nyinte.

²²Karkegh kirurutyonï ompö pipö Israel nko ton tïkwïl. Ochan ECHOTYON Tororötïnkwa.”

²³Kïmwochï Musa pipö Israel lenyoni. Kumït nyu chichay kemwoghsyö kïlït kanasyan kiror atolapay kewira koghïn kïma. Kïlenyona kwigh pipö Israel lenyini kimwochï ECHOTYON Musa.