Read pokoot LAWIN 27 Bible Online

LAWIN 27 - pokoot bible

LAWIN 27

¹Kilenchï ECHOTYON Musa,

²“Mwochinö pipö Israel lö, ato kitötö chi kïlïkwï nyo kipuntegho kiwalwalat ompö ECHOTYON, kumuko kyal kïrïp kegh nko olyenyi:

³“Ato mïrön nyo tïng könyis tömönut odeny ntökwit 60 kï ropïyeni silpa cho le tömönut mut.

⁴“Ato korka kï ropïyeni silpa cho le tömönut sömök.

⁵“Ato weri nyo tïng könyis mut ntökwit tömönut odeny kï ropïyeni silpa cho le tömönut odeny. “Ato cheptö kï ropïyen taman.

⁶“Ato weri nyo pö arawa akonga ntökwit könyis mut nko odeny kï ropïyeni silpa cho le mut. “Ato cheptö kï ropïyen sömök.

⁷“Ato poyon nyo tïng könyis 60 nko akonga kutoch kï röpïyen taman nko mut. “Ato kokönyon kï ropïyen taman.

⁸“Ato meywon nyinte nyo kewolwolsyö nyo memukönye olyononi kemïtyini tïsin tökupim wölo tenö olyenyi kïrïp kegh nko sïkönötenyi.

⁹“Ato pö kiwalwalate kïgh nyo sapul nyo chömunote ompö ECHOTYON le ropöwon, kï tïlil.

¹⁰Amemukönye nyinte ntökukera kïgh anka nyo sapul, ato waghach, kïpöyitu kyakichoni kwodeny ECHOTYON.

¹¹Ato sïmnyon kïyoni sapul nyo melö mïchini keropchï ECHOTYON, kwipu nyu chichoni kïyoni sapul wölo mi tïsin.

¹²Pimöy nyu tïsin atökïsïwa lö karam anta gha, lïku olyenyi lenyini keros tïsin.

¹³Wölo ato mököy chichoni kwolöy ngat kïtas akonga ompö mut nyo pö olyenyi.

¹⁴“Ato tïlilchï chi konyi ECHOTYON, kurosöy tïsin lö karam nya anta ewo. Lïku olyenyi lenyini keros tïsin.

¹⁵Ato mököy chichoni kwolöy konyi ngat, kïtas akonga ompö mut nyo pö olyenyi.

¹⁶“Ato tïlilchï chi ECHOTYON parenyi kareran, kïrïpöy kegh olyenyi nko pagh cho kïlechini ori, ato matay cho pö kilen tömönut odeny kï lïku olyenyi ropïyeni silpa cho le tömönut mut.

¹⁷Ato tïlilchï ECHOTYON parenyi kïngata könyi kilïngat, kighoktoy olye löwïr.

¹⁸Ato tïlilchï ECHOTYON ato le löt, kuyitöy tïsin olye kïrïp kegh nko könyis cho köngötï ntökwitïta könyi kilïngat.

¹⁹Ato mököy nyinte kwolöy parenyi ngat, kïtas akonga ompö mut nyo pö olyenyi.

²⁰Wölo ato olchï chi anka kïtomö kwala ECHOTYON, kï melö tökwolöy ngat.

²¹Wölo pöyitu ECHOTYON ompö könyi kilïngat nyo kitöni tïsï.

²²“Ato tïlilchï chi ECHOTYON parenyi nyo kyal nyo melö nyenyi,

²³kuyitöy tïsin olye kïrïp kegh nko könyis cho köngötï ntökwitïta könyi kilïngat. Konu nyinte ropïyeni asisini akïpöyitu ECHOTYON.

²⁴Nyini ketïta könyi kilïngat keyokchini chichay pö tagh parenyi anta monechi kïlïkwï nyingwa.

²⁵“Kiyitöy olyot kïrïp kegh nko ropïyeni osiswechoni.

²⁶“Pöyitu ECHOTYON poretya kïgh anka tïkwïl nyo sapul, kïlenyona möminye chi nyo tïlilchini ECHOTYON kyakichoni. Ato kö mogh anta wawa aran anta kech, kï pö ECHOTYON.

²⁷Wölo ato sïmnyon, kwolöy ngat nyinte akïtas akonga ompö mut nyo pö olyenyi. Ato mökyalnye kyolchini chi anka ompö olyenyi.

²⁸“Wölo moltonye chi anta al kïgh anka tïkwïl nyo kikengotyï ECHOTYON. Ato kö chi anta kïgh nyo sapul anta parenyi, kï tïlil tya akïpöyitu ECHOTYON kokay.

²⁹Möminye chi nyo kakïngotyï ECHOTYON nyo kimuköy ntökyal ngat, wölo kïtïghöy.

³⁰“Pöyitu ECHOTYON kareran akonga ompö taman cho pö tïkwïn löwïr cho rïro kor, ato kö pagh anta akwa. Choni kï tïlilöch ompö ECHOTYON.

³¹Ato mököy chi kwolöy ngat tïkuchoni kïtas akonga ompö mut nyo pö olyenyi.

³²Pöyitu ECHOTYON akonga ompö taman cho pö kyak walaka löwïr cho kitïlilchini nyinte.

³³Amelö tepöy chichoni lö karamach nya anta ewo. Amekerönye nko anka, ato waghach kïpöyitu ECHOTYON kwodeny amelö tökyolöy ngat.”

³⁴Chete kï kirurut cho kimwochï ECHOTYON pipö Israel kuwerï Musa ompö kutïng pö Sinay.