Read pokoot LAWIN 3 Bible Online

LAWIN 3 - pokoot bible

LAWIN 3

¹“Ato tötoy chi tïch le ropöwo pöghisyo, kïmïchini kutötö egh anta tany nyo lïpop.

²Könoghöy nyinte ewunyi mötïto tany akïpörchï kuka Ema nyo mi ECHOTYON.* Atolapay kïcheng tïsï kisönkö akwisö kuwit kïghömï ato kïpelo amöros.

³Ipu nyinte tïkuchï le ropöwo pöghisyö ompö ECHOTYON, siro mu

⁴nko söromoykachi kwodeny nko sunetkö nko koghogh wölo karam.

⁵Atolapay kïpel tïsï tïkuchoni löwïr ompö ato kïpelo amöros le ropöwon nyo ngutoy nyo karam ompö ECHOTYON.

⁶“Tötoy chi kech anta aran nyo sakate anta nyo melö sakate, le ropöwo pöghisyö, wölo mïchini kïlïpopöch.

⁷Ato tötö kech

⁸kukönoghöy ewunyi mötïto kech akïpörchï kuka Ema nyo mi ECHOTYON. Atolapay kïcheng tïsï kisönkö akwisö kuwit kïghömï ato kïpelo amöros.

⁹Ipu nyinte tïkuchï le ropöwo pöghisyö ompö ECHOTYON: sunetkö nko tore kïmïkul nko siro mu

¹⁰nko söromoykachi kwodeny nko sunetkö nko koghogh wölo karam.

¹¹Atolapay kïpel tïsin tïkuchoni löwïr ompö ato kïpelo amöros le omisyö nyo kakitö ECHOTYON ompö ma.

¹²“Ato tötö aran,

¹³kukönoghöy ewunyi mötïto aran akïpörchï kuka Ema nyo mi ECHOTYON. Atolapay kïcheng tïsï kisönkö akwisö kuwit kïghömï ato kïpelo amöros.

¹⁴Ipu nyinte tïkuchï le ropöw ompö ECHOTYON: siro mu

¹⁵nko söromoykachi kwodeny nko sunetkö nko koghogh wölo karam.

¹⁶Atolapay kïpel nyu tïsin tïkuchoni löwïr ompö ato kïpelo amöros le omisyö nyo ngutoy nyo karam ompö ECHOTYON. Pö ECHOTYON sunetkö löwïr.

¹⁷Lïku nyete kirurut kokay ompö pïnwöy löwïr ompö wölini omöngekwa lö mam sunet anta kisön.”