Read pokoot LAWIN 4 Bible Online

LAWIN 4 - pokoot bible

LAWIN 4

¹Kïlenchï ECHOTYON Musa,

²“Lenchinö pipö Israel, ato lel chi kwigh ngokï ompö kirurut pö ECHOTYON amelö ompö kwötyin, kïrïp ngalechï.

³“Ato igh Tïsin nyo Wow* lelut akwipchï pich ngokï, kïlenyona kïmïchini kïpörchï ECHOTYON ngaryan nyo lïpop kïlïkwï ropöwonto ngokï.

⁴Kötöy nyinte ngaryante kuka Ema nyo mi ECHOTYON* akukana ewunyi mötït akïpara atoni.

⁵Atolapay kïcheng Tïsin nyo Wow kisönko ngaryantanay tïkwïte akwip kïlït Emanay.

⁶Akulut morïn kisönchay akwisö kïnyïl mut nko odeny. Ananka nyo kikingotyeghö wölo tïlil.

⁷Atolapay kutö kisönkö walaka kuyo ato kïpelo tïkwïn cho ngutoy cho onyïn ompö Ema nyo mi ECHOTYON. Atolapay kïcheng kisönkö chinö akïmïlchï kelyo ato kïpelo amöros ompö kuka Emanay.

⁸Akïcheng sunetkö löwïr cho pö ngaryantanay nko sireto mu,

⁹nko söromoykachi kwodeny nko sunetkö nko koghogh wölo karam.

¹⁰Le wölo idoy sunet pö ropöwo pöghisyö. Atolapay kïpel tïsin sunetchï ompö ato kïpelo amöros,

¹¹wölo sïtöy menyonteto ngaryan nko panyechi löwïr nko mötït nko ngortine nko mutïne nko eghyante,

¹²kutang kiror wölo le sirö ompö kanasyan, wölo kiyini aryonto amöros atökïpel.

¹³“Ato igh pipö Israel löwïr ngokï kïpeny kirurut pö ECHOTYON amelö ompö kwötyin, kï kinam ngokï,

¹⁴nyini kösöwï chane ngokikwa cho kegh, kïmïchini kïkötï ngaryan Ema nyo mi ECHOTYON le ropöwonto ngokï.

¹⁵Akukana poyikwa ewunekwa mötïto ngaryan akepara atoni.

¹⁶Atolapay kïcheng Tïsin nyo Wow kisönkö walaka akwip kïlït Ema nyo mi ECHOTYON.

¹⁷Akulut morïn kisönchay akwisö kïnyïl mut nko odeny ananka nyo kikingotyeghö Wölo Tïlil.

¹⁸Atolapay kutö kisönkö walaka kuyo ato kïpelo tïkwïn cho ngutoy cho onyïn ompö Ema nyo mi ECHOTYON. Atolapay kïcheng kisönkö chinö köngötï akïmïlchï kelyo ato kïpelo amöros ompö kuka Emanay.

¹⁹Chengöy nyinte sunetkö löwïr akïpel ompö ato kïpelo amöros

²⁰akwigh ngaryantanoni le wölay kida ngaryanta ropöwonto ngokï, kulinyö nyu tïsin chane nko ECHOTYON, atökelöstoghchï.

²¹Sïtöy nyinte ngaryantanay sanypa kanasyan akïpel le atay kipel ngaryante nyo tagh. Nyete kï ropöwonto ngokï.

²²“Ato igh kintoghintö ngokï kïpeny kirurut pö ECHOTYON amelö ompö kwötyin, kï kinam ngokï,

²³nyini kösöwï nyinte ngokichi, kïmïchini kurewï kwagha nyo lïpop le ropöwontenyi.

²⁴Akukana ewunyi mötïto kwagha akïpörchï atay kïpörchini amöros nyo kïpelöy ompö ECHOTYON. Nyete kï ropöwon nyo chengöy ngokï.

²⁵Atolapay kulut tïsin morïn kisön pö kwaghayay, akutö kuyo ato kïpelo amöros. Atolapay kïcheng kisönkö chinö kïngötï akïmïlchï kelyo ato kïpelo amöros.

²⁶Atolapay kïpel tïsin sunetkö löwïr ompö ato kïpelo amöros le wölo idoy sunet pö ropöwo tuyo pöghisyö. Ighöy tïsin lenyoni ompö ngoki kintöghoghin atökïlinyö nko ECHOTYON atökelöstoghchï.

²⁷“Ato igh chi anka kïtïkon ngokï kïpeny kirurut pö ECHOTYON amelö ompö kwötyin, kï nam ngokï,

²⁸nyini kösöwï nyinte ngokichi, kïmïchini kurewï aran nyo sakat nyo lïpop le ropöwontenyi.

²⁹Akukana ewunyi mötïto aran akïpörchï otini kïpörchini amöros nyo kïpelöy.

³⁰Atolapay kulut tïsin morïn kisön pö artanay akutö kuyo ato kïpelo amöros. Atolapay kïcheng kisönkö chinö kïngötï akïmïlchï kelyo ato kïpelo amöros.

³¹Chengöy nyu tïsin sunetkö löwïr le ato chengöy cho pö ropöwo pöghisyö. Atolapay kïpel ompö ato kïpelo amöros atökïlïkwï tïkwïn cho ngutoy cho onyïn ompö ECHOTYON. Ighöy tïsin lenyoni ompö ngoki chi, atökïlinyö nko ECHOTYON atökelöstoghchï.

³²“Ato tötoy kech le ropöwonto ngokï kurewï nyo sakat akïlïpop.

³³Akukana ewunyi mötïto kechanay akïpörchï otini kïpörchini amöros nyo kïpelöy.

³⁴Atolapay kulut tïsin morïn kisön pö kechanay akutö kuyo ato kïpelo amöros. Atolapay kïcheng kisönkö chinö kïngötï akïmïlchï kelyo ato kïpelo amöros.

³⁵Atolapay kïcheng nyinte sunetkö le cho pö kechanay pö ropöwonto pöghisyö akïpel ompö ato kïpelo amöros kimi nko ropöwe walaka cho kïpelöy ompö ECHOTYON. Ighöy tïsin lenyoni ompö ngokichi atökïlinyö nko ECHOTYON atökelöstoghchï nyinte.