Read pokoot LAWIN 6 Bible Online

LAWIN 6 - pokoot bible

LAWIN 6

¹Kïlenchï ECHOTYON Musa ngat,

²“Ato lïs chi pöröryenyi ompö kïgh nyo kakitö nyinte kïkaman anta nyo kikimönokyï anta nyo kakïchor anta mïrput

³anta ato nyorï tïkwïn cho kepotyö akï mïrput paraku tïkuchoni, anta wolwolisyö ompö putintön anta igh ngokï ompö ighisyewut walaka cho ighöy pich,

⁴kï kegh ngokï akïlel. Mïchini nyu kuyoda tïkuchini kachor anta cho kicheng kïmas anta nyo kikimönokyï nyinte anta tïkwïn cho kipotyö akinyorï

⁵anta kïgh anka nyo kiwolwolchï ompö putintön, kïmïchini kuyoda kïmïchï, akïtas akonga ompö mut akutö chito kïpö löwïr asiswanini tötoy ropöw cho kïghoktegho ngokï.

⁶Rechini nyinte tïsin makal anta kwagha nyo lïpop le ropöwon ompö ECHOTYON nyo kighoktegho ngokï. Kikipimo olyeto ropöwontononi ropïyeni osiswechoni.

⁷Ighöy tïsin lenyoni atökulinyö nko ECHOTYON atökelöstoghchï nyinte ompö kïgh anka tïkwïl nyo muköy chi kwigh akïnam ngokï.”

⁸Kïlenchï ECHOTYON Musa,

⁹“Mwochinö Aron nko werkachi lö, töpo amöros nyo kïpelöy ma kïyech ompö ato kïpelo amöros akewïkchini mat.

¹⁰Atolapay kulak nyu tïsin sïrenyi nyo pö katani nko sïra katani nyo kikörmön, atolapay kïramta aryonto mayay kakïpelo amöros ompö ato kïpelo amöros, akuyin kamasu ato kïpelo amöros.

¹¹Atolapay kïngwïs sïrokachï akulach walaka atökwip arechay kïlïtöy kiror wölo kikengot.

¹²Akewïkyï mat ompö ato kïpelo amöros kïnagh atömöma, tösyini tïsin kwen tökwoghö kïnomnyö akïtotyï amöros nyo kïpelöy akïpel sunet cho pö ropöwo pöghisyö.

¹³Kïwïkyini mat ompö ato kïpelo amöros kïnagh kïnomnyö, melö mïchini kïma.

¹⁴“Achï kirurut cho pö ropöwo pagh. Ipu tïsï ropöwo pagh akutö ECHOTYON ompö tawu ato kïpelo amöros.

¹⁵Chengöy tïsin pïsya römut akonga nko mwada nko tïkuchay ngutöy cho onyïn, atolapay kïpel le machey nyo pö pïsyechoni löwïr ompö ato kïpelo amöros, ngutogh nyo anyïn nyo mïlöy ECHOTYON.

¹⁶Atolapay kwam tïsï chinö köngötï le makatin cho puryö mumar ompö wölo tïlil. Omo chane sörömu Ema nyo mi ECHOTYON.*

¹⁷Meghönye chi akutö mumar kotönön chane kïlïkwï karerantangwa nyo pö amöros. Kïlïkwï kïgh nyo tïlil ompö ECHOTYON le ropöwonto ngokï nko nyo kïghoktegho ngokï.

¹⁸Omöy mïrönö anka tïkwïl nyo pö ara Aron. Lïku karerantanyi nyoni ompö omisyö nyo kitöni ECHOTYON kuwer ma ompö pïnwöy cho tökïpkonöy. Kïkïröy möswongönye chi anka tïkwïl omisyononi atömöma.”

¹⁹Akïlenchï ECHOTYON Musa,

²⁰“Ipchini chi anka tïkwïl nyo pö ara Aron ECHOTYON pïsya cho pö kilö akonga kïtenö osis kïngeta asisini kakïkïl nyinte kïlïkwï tïsin. Tötoy kareran tökwoghö, kuwanta kareranta anka nangat.

²¹Ikulkulyö pïsya nko mwagh aikela kerony, atolapay imïnchïran airopta. Nyoni kï ropöwonto pagh nyo ngutogh nyo anyïn nyo mïlöy ECHOTYON.

²²Ighöy le nyete chi anka tïkwïl nyo pö ara Aron nyo kïkïlöy kïlïkwï Tïsin nyo Wow* kïpelchï ECHOTYON ropöwonte lökïr.

²³Kipelöy ropöwo pagh löwïr cho pö tïsin. Melö mïchini kyomöy.”

²⁴Kïlenchï ECHOTYON Musa,

²⁵“Lenchinö Aron nko werkachi, ‘Achï kirurut cho pö ropöwo ngokï, kïpöröy ropöwonte ompö tawu ECHOTYON ompö atoni kïpörchini amöros nyo kïpelöy. Tïlil nyu ropöwontononi tya.

²⁶Omöy tïsin nyo roptoy ompö ato tïlil ompö sörömu Ema nyo mi ECHOTYON.

²⁷Möswongönye chi anka tïkwïl pentö, kïkïröy atömöma. Akwoto pechï kisönkö sïra, kïmwöto ato tïlil.

²⁸Kïtïghöy töronini kakighoghta wölo ato kighogha töro karïn, kesitöy akemwata pögh.

²⁹Omöy mïrönö anka tïkwïl nyo pö tïsï, ompöwölo tïlil tya.

³⁰Wölo ropöwo ngokï anka tïkwïl nyo kipu kisönkachi kïlïtu Ema nyo mi ECHOTYON atökegh linyot ompö Emanay kï melö kyomöy penyoni, kïpelöy lömïs.’ ”