Read pokoot LAWIN 7 Bible Online

LAWIN 7 - pokoot bible

LAWIN 7

¹“Achï kirurut cho pö ropöw cho kighoktegho ngokï, tïlil tya ropöwontononi.

²Kïpöröy ropöwonte ompö atoni kïpörchini amöros nyo kïpelöy, akesö kisönkö kuwit ato kïpelo amöros woptine löwïr.

³Kitötoy sunetkö löwïr nko tore kïmïkul nko siro mu

⁴nko söromoykachi kwodeny kïmi nko sunetkö nko koghogh wölo karam.

⁵Pelöy tïsin sunetchoni ompö ato kïpelo amöros ompö ECHOTYON. Ropöwon nyete nyo kïghoktegho ngokï.

⁶Omöy mïrönö anka tïkwïl nyo pö tïsï, wölo kyomo ato tïlil, ompöwölo tïlil tya.

⁷“Körökegh kirurut nyo pö ropöwonto ngokï nko nyo kïghoktegho ngokï, pöyitu pentö tïsin nyo ighöy kïlinyot.

⁸Chengöy tïsin menyonto amöros nyo kïpelöy nyo tötoy nyinte kïlïkwï nyenyi.

⁹Pöyitu tïsintononi tötoy ropöwo pagh walaka tïkwïl cho kïpelo ma anta kighogho tör anta kïkela kerony.

¹⁰Wölo kïchöghchini tïsi ara Aron löwïr pagh cho kakikulkulyö nko mwagh anta cho melö kakikulkulyö.

¹¹“Achï kirurut pö ropöwo pöghisyö cho kïropchini ECHOTYON.

¹²Ato tötoy chi ropöwon nyo pö sörö kutötoy ropöwontononi kïmi makatina cho puryö mumar cho kakikulkulyö nko mwaghpa orolwö nko makatina pïsya cho kakikulkulyö nko mwaghpa orolwö.

¹³Tötoy nyinte tïkwïl makatin cho mïnkech cho kakitö mumar.

¹⁴Atolapay kutötö ompö makatinechoni kareran anka le ropöwonto ECHOTYON. Pöyitu tïsintonini chengöy kisönko ropöwonto pöghisyö akwisö ato kïpelo amöros.

¹⁵Kyomöy pento ropöwontononi asisoni kitötoy Melö kituköy ntökïyech.

¹⁶“Kïlenyona, ato pö ropöwontenyi kiwalwalat anta kö pö chamat, kyomöy ropöwontononi asisini tötoy nyinte, wölo ato nyo köngötï kyomöy ato le asïyech.

¹⁷Kïpelöy lökïr pempö ropöwon anka tïkwïl nyo köpöghön osis sömök.

¹⁸Kïkïröy ato kyam pempö ropöwontononi asispa sömök, melö tökïchömöy Tororöt. Melö tökeyityini nyinte nyo tötoy, ompöwölo orus, chi nyo kam kite kïnye kï nömöy ngokï nyinte.

¹⁹“Melö kyomöy peny nyo kaswany kïgh anka tïkwïl nyo orus, kïpelöy lökïr, kïnyïl panye chinö walaka kwomöy chi anka tïkwïl nyo melö orus.

²⁰Wölo ato am chi nyo orus pempö ropöwonto pöghisyö nyo pö ECHOTYON, kepesyot nko pikachi.

²¹Ato swany chi kïtïkon kïgh nyo orus, ato kö chi anta tyony, atolapay kwam peny nyo pö ropöwontononi kepesyot chichoni nko pikachi.”

²²Kïlenchï ECHOTYON Musa,

²³“Mwochinö pipö Israel lö, motöp ntam sunet cho pö tïch anta kechir anta ngaror.

²⁴Momönye chi sunet pö kïgh nyo sapul nyo kama anta nyo kam tyompö wuw wölo kïpöghisyeghö ompö ortïn walaka.

²⁵Kipesyegho pikachi chi anka tïkwïl nyo omöy sunet pö tany nyo kitöni ECHOTYON le amöros,

²⁶molï kisön pö tarit anka tïkwïl anta kïgh nyo sapul nyo mi wöloni omöngekwa.

²⁷Ato marïpnye chi kirurutyonï, kepesyegho pikachi.”

²⁸Kïlenchï ECHOTYON Musa,

²⁹“Mwochinö pipö Israel lö, chi anka tïkwïl nyo tötoy ropöwo pöghisyö ompö ECHOTYON, kutötoy kareran kïlïkwï ropöwontenyi ompö ECHOTYON.

³⁰Ipuno ewunechi ropöwonto omisyö nyo kitöni ECHOTYON. Ipu sunetkö nko take atökewiswis ompö ECHOTYON le ropöwon.

³¹Atolapay kïpel tïsin sunetkö ompö ato kïpelo amöros, wölo pöyitu take tïsï.

³²Otöninekwa tïsin ropöwonte nyo roptoy kisönkö nko sunetkö kïpes pö okumpö tagh nyo pö ropöwonto pöghisyö.

³⁴Kachengan take nko chatït ompö ropöwo tuyo kalya cho ipu pipö Israel atönön tïsï le karerantangwa nyo ngwïno pipö Israel kokay.

³⁵Nyete kï kareranpa ropöw cho kïropchini ECHOTYON, cho kikïngotyï Aron nko werkachi asisini kikïkïl le tïsï cho pöghisyechini ECHOTYON.

³⁶Kimwochï ECHOTYON pipö Israel kutötö nyete kïlïkwï nyingwa kokay asisini kikïkïl chane.

³⁷“Achï kirurut pö amörostin cho kïpelöy nko ropöwo pagh nko ropöwo ngokï nko ropöw cho kïghoktegho ngokï nko ropöwo ngotat nko ropöwo pöghisyö

³⁸cho kiyomis ECHOTYON pipö Israel kwipchï nyinte ompö kutïng pö Sinay.”