Read pokoot LAWIN 8 Bible Online

LAWIN 8 - pokoot bible

LAWIN 8

¹Kïlenchï ECHOTYON Musa,

²“Kurö Aron nko werkachi aicheng sïrokökwa nko mwagh nyo kiyiltoy aikötï egh nyo le ropöwonto ngokï nko mökol odeny nko köröp nyo mi makatina cho puryö mumar

³aikur pipö Israel löwïr kïghömïtyï kegh kuka Ema nyo mi ECHOTYON.”*

⁴Kwigh Musa lenyini kimwochï ECHOTYON akïghömïtyï pïchay kuka Emanay.

⁵Kïlenchï Musa pïchay, “Anyï kïgh nyo kamwa ECHOTYON kegh.”

⁶Atolapay kïkur nyinte Aron nko werkachi kïpka tagh akïmwata pögh.

⁷Atolapay kulokyï Aron koti nko sïra nyo kogh akïrötyï angwa mu akulokyï epod* kulum takat. Atolapay kukicha angwa mu nyo kikïnap nyo karam.

⁸Akulokyï sïra takat akutö Urim nko Tumim* ori.

⁹Atolapay kutö kopiyö mötïnyi akïnöpchï köpo koltin okumpö tokochu kopiyonay nyo poru lö kikengotyï Tororöt lenyini kimwochï ECHOTYON nyinte.

¹⁰Atolapay kïcheng Musa mwagh nyo kiyiltoy akuyila Ema nyo mi ECHOTYON nko tïkwïn löwïr cho mi ori akïngotyï ECHOTYON.

¹¹Kwisö mwada kareran kïnyïl mut nko odeny ato kïpelo amöros nko karichi löwïr kïnyïl mut nko odeny nko otupe nko kelyechi akïngotyï ECHOTYON.

¹²Kïmïlï mwaghay kiyiltoy kite kuyila möt pö Aron atökïngot nyinte.

¹³Atolapay kïkur werpö Aron kïpka tagh akulokyï kotin akirata angwoy kuwit mutïnekwa akulokyï kopïyen mötöwekwa lenyini kimwochï ECHOTYON nyinte.

¹⁴Atolapay kutötö eghay le ropöwonto ngokï, kukana Aron nko werkachi ewunekwa mötït.

¹⁵Kïyeng Musa eghay akïcheng kisönkö kareran ompö morichi akutö kuyo ato kïpelo amöros löwïr atökïngot ato kïpelo amöros. Atolapay kïmïlchï kisönkö cho köngötï kelyo ato kïpelo amöros. Kïlenyona kïngot atökulinyö.

¹⁶Kïcheng Musa sireto mu nko koghogh wölo karam nko söromoykö kwodeny kïmi nko sunetkökwa akïpel ompö ato kïpelo amöros.

¹⁷Wölo kïpela panye cho pö kirkït nko menyonte nko eghyante sanypa möngot, lenyini kimwochï ECHOTYON nyinte.

¹⁸Atolapay kutötö Musa makalu le amöros nyo kïpelöy, kukana Aron nko werkachi ewunekwa mötït.

¹⁹Atolapay kïyeng Musa makalunay akwisö kisönkö kïghömï ato kïpelo amöros.

²⁰Kïtanatan makalu akïpel mötït nko tanani nko sunetkö

²¹akïkaghta kwanka akuwunö kelye pögh akïpel makalu kïmïkul ompö ato kïpelo amöros le amöros nyo kïpelöy nyo ngutoy nyo anyïn ompö ECHOTYON, lenyini kimwochï ECHOTYON nyinte.

²²Atolapay kutötö makalu nyo pö odeny nyo pö ngotat, kukana Aron nko werkachi ewunekwa mötïto makal.

²³Kiyeng Musa makalunay akïcheng kisönkö kïnyïra walpa yit pö Aron okumpö tagh nko morïna okumpö tagh nyo wow nko morïne nyo wow nyo pö kel pö tagh.

²⁴Kïkur Musa werpö Aron tïkwïl kïpka tagh, atolapay kïnyïra kisön walisayi yitikwa cho pö okumpö tagh nko morikwa cho pö ewu tagh nko mori nko kelyön cho echön cho pö kelyo tagh. Atolapay kwisö kisönkö kïghömï ato kïpelo amöros.

²⁵Kïcheng sunetkö nko tore nko siro mu nko koghoghtö wölo karam nko söromoykö kwodeny kïmi nko sunetkökwa nko kïpes pö tagh.

²⁶Atolapay kïchengunö köröponay pö makatyan nyo puryö mumar nyo kikïngotyï ECHOTYON makatyan akonga nko anka nyo kikiyila mwagh nko anka nyo tawarar akukana paraku sunetchay nko kïpesnay.

²⁷Kutö omisye löwïr ewuno Aron nko werkachi tökuwiswis ompö ECHOTYON le ropöwon.

²⁸Atolapay kïchenga Musa chane akïpela ato kïpelo amöros nko amörostin cho kïpelöy tïkwïl le ropöw cho pö ngotat nyo ngutoy nyo karam ompö ECHOTYON.

²⁹Akïcheng Musa take akuwiswis ompö ECHOTYON le ropöwon. Nyoni kï kareranpa Musa ompö makal nyo pö ngotat, lenyini kimwochï ECHOTYON nyinte.

³⁰Atolapay kïcheng Musa mwaghay kiyiltoy kite nko kisön tïkwïte ompö ato kïpelo amöros akwisö Aron nko werkachi nko sïrokökwa. Kïlenyona kengot chane nko sïrokökwa.

³¹Atolapay kïlenchï Musa Aron nko werkachi, “Oghoghonekwa pentö kuka Ema nyo mi ECHOTYON ama atoni nko makatin cho mi köröpo ropöwo ngotat lenyini kamwa ECHOTYON.

³²Apel pentö nko makatine cho köngötï lömïs.

³³Amangeta atoni le kuka Ema nyo mi ECHOTYON ompö osis cho le mut nko odeny ntökïtenö kuwonyö asiswekwa cho pö ngotat.

³⁴Kimwa ECHOTYON kïgh nyo kakighacha asisete, atökelinyokwa nko nyinte.

³⁵Otöpïyokwa kuka Ema nyo mi ECHOTYON nangat nko pöghet agh kini mököy ECHOTYON, tömomeghö, ompöwölo kikïmwowanïn lenyoni.”

³⁶Kïlenyona kigh Aron nko werkachi lenyini kimwa ECHOTYON ompö kuti Musa.