Read pokoot YEREMIA 12 Bible Online

YEREMIA 12 - pokoot bible

YEREMIA 12

¹Iponyi man we ECHOTYON, kïrkegh opunyi ngwïrngwïryenyan. Wölo omochan opunyi teputyenyu. Ayo, ompö ne tökïsïköy mwokïyis kel nyo karam? Ompö ne tökuletöy tagh pkatis löwïr?

²Kikatkatanyi chane akïpityö, akïyetu kuyin akwa. Ngöloneninyi nyo karam ompö kut, wölo lowöch mïkuliskökwa ompö nyi.

³Wölo inkïtaninyi we ECHOTYON, isïwïyenyi lö töngunyi kinonutköchan. Ranga pïchï le kechir cho kïpetöy keyengöy körchinö akol ntökwït ato kïmutöy sïghinton.

⁴Nyörïlöy köro nko oyï ompö pekat? Köyomö suswö nyoman ompö paren! Kömeghö tïpö wudïn nko törit, ompö ngoki pïchï möngöy kore, pïchï lentöy, “Melö sïwïyi ECHOTYON tïkuchi kighecha.”

⁵Kïlenchanïn ECHOTYON, “Yeremia, ato ioghökenyi rïpe nko pich cho pegho kelyön, imukenyi lö ne rïpe nko angoletin? Ato ipïtonyi kor wölo löpo, ekwigho ne ato iminyi wuw pö Yordan?

⁶Rose ompö lö ighunyi cho ghach monekwa, chini pö konkwa. Kikuporï lö töghinyi chane. Kïlenyona meghan chane, kïrkegh kuti nyo anyïn.”

⁷Lentöy ECHOTYON, “Kopïstan Israel, kataghan pikachu cho kyokïlchï kegh. Kotönön Israel mori pungkachi.

⁸Köwöghökisyö piköchan kïtaghanïn, akïpororchanïn le ngötïny nyo mi wuw, nka nyoni nyu kataghan chane.

⁹Kakarkegh piköchan nko tarit nyo kerich sich tökïnam. Okurunö nyu tïpö wudïn löwïr kïpka kwam peny.

¹⁰Kewur pöytoghi punton cho chang parenyan nyo pö sapipun katyakatyak kunyar parenyan nyo pïchigh, ntökwanyï ye kalïkwï surkwen.

¹¹Kegh chane kore kïtïryalit nka nyï rirchinanïn. Kalïkwï kore surkwen, amelö mi chi nyo yongöy.

¹²Kepokï kiwurï kïghömï kutïngkot cho mi surkwen. Kopïswan ngot kungwïn kunyar kor kïmïkul, möminye chi nyo möngisïyi ompö kalya.

¹³Kingor chane nkanun, wölo kil kato. Kisïng chane nyoman wölo mönyorïcha kïgh. Ompö nörekyenyan nyo ngwan lakat, ilö nyo sïköy chane kï arasï kwïle.”

¹⁴Lentöy ECHOTYON, “Mi kïgh nyo omwoghan ompö pöröris pö Israel cho kinyar kor nyo kyotönön piköchan Israel. Okölöngenan chane korengwa atolapay osörwan Yuda ompö kwenungwa.

¹⁵Wölo otini kakalangan chane kumuchö, ongwïnan osyonchini chane ngat, ayokyinan kïmïlisyö korengwa.

¹⁶Kïkany ato cham chane kïrïp ortïna piköchan Israel akuwalwal ompö kaynenyan kïlentöy, ‘Kïle wölo söpöy ECHOTYON,’ le wölo kinet piköchan kuwalwal ompö kayna Paal,* kïlïku chane tïkwïl piköchan.

¹⁷Wölo ato möterwanïnye, okölöngtenan, awuran chane lömïs.” Mwoghöy ECHOTYON.