Read pokoot YEREMIA 19 Bible Online

YEREMIA 19 - pokoot bible

YEREMIA 19

¹Kilenchanïn ECHOTYON, “Wïyö wölo mi ighinto tören aiyal tör. Atolapay imït poy nko tïsï cho le poy cho te

² apa awerata mpöghoghyo wero Inom olït apuke nyo kïkuro Tör nyo Kima. Akwotini korelökwa, amwatïta ngalechï owetan omwowokwa ye.

³Omwochinö lö, ‘Akwa we pöytoghi Yuda nko pipö Yerusalem atera ngölyonto ECHOTYON! Kölö ECHOTYON Kimuktoghin, Tororöt nyo pö Israel, otyorchinan koronï nyarïl nyo wow nyoman, nyo ato lïm chi kwotyot akïtangany.

⁴Oghan lenyoni ompöwölo kataghanïn piköchan akusïmnyon yete otï pelöy amörostin kïsoghöy tororötino putintön cho kimenkïtcha papotïnekwa nko pöytoghi Yuda akupïrirö yete kisön pö pich cho mötïng lelut

⁵ akïtek wölo pelchinegho Paal* amörostin atökïpela monekwa kïpelchï Paal le amöros. Melö kyomwochan amochömchanye chane kwigh lenyoni amelö kimi kinonutköchan kïgh nyo lata nyoni.

⁶Arosa nyu lö pkonöy osiswö cho mökekuronye yi Topet anta mpöghoghyo wero Inom, wölo kïkuro mpöghoghyo Pörchö. Mwoghöy ECHOTYON.

⁷“ ‘Oghan tötut pö Yuda nko Yerusalem kïlïkwï kwïle ompö yete. Opïsinan pungkökwa kïpar akïlot chane ompö poryot. Atolapay owirchan porwöyikwa törit nko tïpö wudïn kwam,

⁸anyaran kanasyantanete kwotyeghchï pich akupirpir möt chi tïkwïl nyo wetöy pantanyi.

⁹Oghan chane kwam monekwa cho le wor nko tipïn akwam chi tïkwïl pöröryenyi ompö kömöy nko nyarïl nko kirikat nyo kirik pung chane kuwit.’

¹⁰“Atolapay ighyösiy töronay ompö tawu pïchay kopetekwa tïkwïl

¹¹aimwochï chane lö, ‘Mwoghöy ECHOTYON Kimuktoghin lö, oghyösiyan pipö kanasyantanï le wölo meghtoy töro mönö nyo melö tökumuko ngat kegh kïlïkwï tör. Kïtïpchini pich koro Topet ompöwölo mökïminye karerana wölo töketïpchini pich.

¹²Omwowokwa nyo mötïny lö, oghchinan kanasyantanete nko pich cho möngöy ori le wölo kyoghchan kanasyanta Topet.

¹³Sïmnyonitu kori Yerusalem nko cho pö pöytoghi Yuda nko korïn löwïr cho kikïpela pörkö tïkwïn cho ngutoy cho onyïn kepelchï kokel cho mi yïm nko wölo kikïpightegha kumïn kepighchï tororötino putintön.’ ”

¹⁴Atolapay oweghan Topet owö wölo kikakïyontanïn ECHOTYON amwatïta ngölyontenyi. Kyowan oghyongö pighu Kö pö Tororöt,* amwochï pich löwïr lö,

¹⁵“Lentöy ECHOTYON Kimuktoghin, Tororöt pö Israel, Onyoran kanastinechete nko walaka cho lekïtinö, le wölo kamwaghan, ompöwölo kyoghïghöchitu pich mötöwö, amöterönye ngalechan.”