Read pokoot YEREMIA 2 Bible Online

YEREMIA 2 - pokoot bible

YEREMIA 2

¹Kingwïnchanïn ngölyonto ECHOTYON kilenchanïn,

²“Wïyö mwatïtena ompö Yerusalem lö lentöy ECHOTYON, Tononan lö kichinyi ghanate ato kitechinyi chumwak, kichömaninyi le chamanengu nyo pö kensyö airïpaninyi ompö surkwen, wölo möpitonye kïgh.

³Kichinyi atoni, we Israel nyo tïlil ompö tawunyan, kilatenyi paghechan cho tagh cho pö ilö. Kilel anka tïkwïl nyo kiswanginyi akïnyorï nyarïl nyo wow.” Mwoghöy ECHOTYON.

⁴Akwa monïngo Yakopo nko akwa pipö ortïna Israel, atera ngölyonto ECHOTYON!

⁵Lentöy ECHOTYON, “Ghöyïn ne nyo kisïwechanïn papotïnekwa, tökusïrar kegh akïsor kïsagh tororötin cho möle akïlïkwï chane kwïle nya?

⁶Mötepönye kegh chane ompö lö, ‘Mi onö ECHOTYON nyo kisörunenecha koro Misri, akuntöghoghwecha ompö surkwen, ompö koro pekat nko ngötutöy nko tuwïn nyo wow, kor wölo mewerönye pich amöminye chi nyo möngöy?’

⁷Kyamïtakwa kor nyo akwagh tongörökyinö akwechi nko tïkuchi walaka cho karamach. Wölo nyini kyatakwa anyarakwa korenyan, asïmnyonökwa kore nyini kyoyomiswokwa.

⁸Matepnye kegh tïsï lö, ‘Mi onö ECHOTYON nya?’ Melö kitökunkïtwanïn koneti kirurut, kïlïkwï pöytoghi penyï, kïngor werkoyi ngal ompö kayna Paal* akïsagh tororötino putintön cho melö tïng tösunöt.

⁹“Kïlenyona ogheghchinokwa aghechinan monekwa tïkwïl. Mwoghöy ECHOTYON.

¹⁰Oghyene nanam apa koro Kupro tasïwena, anta oyoktö pich koro Kedar kïkïtï lasiny ato mi weroptyö nyo pö ngölyontonï.

¹¹Ekïmi pipö koros cho kikïwaghach tororötinekwa nko melö kö pö man tagh nya wey? Kïlö ne nyu piköchan tökïpïstanïn nyo ochï ororyengwa akïsagh tororötin cho puryö tösunöt?

¹²Otöngönchinö nyu yïmwöy ngalechï! Otyeghchinö amïghyö nyoman. Mwoghöy ECHOTYON.

¹³Ompöwölo kegh piköchan ngokï kïnyïl odeny, köpïstanïn nyo ochï kompö pögho söpon atolapay kwighchï kegh kösïmöyikwa, kösïmöy cho kikïkörerisyö möroröy pögh.

¹⁴“Ayo, sekeyon so Israel, anta kikïyichï sekeynön nya? Kwompö ne nyu tökïkarkegh nko kïgh nyo sökosöy tïpö wudïn?

¹⁵Köpororchï nyinte ngötunywö, köpororchï ompö kut nyo wow. Kegh korenyi kïlïkwï surkwen, kalïkwï kanastinechi kïratis cho puryö möngot.

¹⁶Amelö choni opïn, kapka pipö Mempis nko Tapanes kïtïpinyi lömïs.

¹⁷Melö so keyörchinyi kegh ngalechoni löwïr? Kipïstaninyi nyo ochï ECHOTYON Tororötïngu, nyo ntöghoghchininyi ompö or!

¹⁸Akï ye köny, nyiwu ne ato iwenyi koro Misri? Kepïrchinyi wïyö ghegha pögho lalwa Nile? Anta nyiwu ne wïyö koro Asirya? Kepïrchinyi wïyö ghegha pögho lalwa Yuparet?

¹⁹Ichömchömenyi ompö ngokiku kegh akurwokyininyi penyatengu. Mïchini nkïtunö lö gha nyoman ato ipïstaninyi nyo ochï ECHOTYON Tororötïngu amökïminye oringu kiwaghata ECHOTYON. Mwoghöy Echotyon TORORÖT Kimuktoghin.

²⁰“Kogh ato kirïnganyi mïchokineku aichoghchinyi sïrïmtine wölo low, ailenchaninyi, ‘Melö topöghisyewunyi.’ Kisaghanyi tororötine walaka ompö kutïng anka tïkwïl nyo kogh, aikïtïngchinyi ompö rurwo ket anka tïkwïl nyo nyaril le chi nyo le cheporesyan.

²¹Wölo nyu kyakatkatinyi le sapipu nyo kyokïlchan kegh, sapipïyon nyo pö kösïghyon nyo karam. Kwompö ne nyu tewaghakenanyi inyara, ailïkwï sapipïyonto wuw?

²²Kïrkegh wunenö kegh paryan anta sapuni nyo wow kïtya, möngetonye kokay sïmnyonto ghöyityengu tawunyan. Mwoghöy Echotyon TORORÖT.

²³Ayo, imukenyi lö ne mwagha lö, ‘Melö ochan sïmnyon amelö karïpan asagh Paal?’ Nane ngokï cho kighanyi ompö wölnö le mpöghoghöy, ne nyaye kighanyi ompö wölini nya? Kilatenyi mösöru tamas nyo ngöröy,

²⁴le sïkïryo wuw nyo kikïnagh wudanyi, nyo otini kamar kirïk kïsyol sörun akïtap kïmïs. Ngo nyo olentöy omuköy opöpeköy otini köpïrchï kïmar kirïk nya? Mesusönye kegh kirïk nyo kömöröy nyinte, nyo ato kakwitïta, kïnyorchini otini.

²⁵Israel, mepara kegh or amekany kïyamïn sïghiny. Wölo kemwaghanyi lö, ‘Tökïsöpöne tagh nya, kyopïrchan arïp tororötine walaka amopïstenanye kokay.’

²⁶“Kïle wölo nömöy arasï chorin ato kïnömchï chorsyö, kïnömöy arasï pipö Israel. Nömöy pöytoghikwa nko yetïntinekwa nko tïsikwa nko werkoyikwa.

²⁷Pïchoni chay lenchini ket, ‘Ichinyi paponyan,’ akïlenchï kogh, ‘Nyi nyo keyiyanïn.’ Ompöwölo köpörchanïn chane patagh, melö kipörwanïn mu. Wölo ato chumchï nyarïl, kïrirchanïn kïlentöy, ‘Nyonö sörwecha wey!’

²⁸“Ayo, mi onö tororötineku chay keghchinyi kegh? Ne mapka kungarakinyi ato muköy otini kechumchinyi nyarïl nya? Olentan chang tororötineku nya, we Yuda, tenö kanastineku!

²⁹Ompö ne togheghchinanïkwa? Kyataghakwa löwïr ngalechan. Mwoghöy ECHOTYON.

³⁰“Kiwö kwïle sitenyan nyo kinyorï pikökwa, ompöwölo kicham lö kikelel. Kiwany chokengu werkoyköku le ngötïny nyo komï.

³¹Akwa we pïnwöy, atere ngölyonto ECHOTYON! Ayo, okörakegh so nko kor nyo le surkwen ompö Israel, anta kor nyo kinyïghï tuwïn? Kwompö ne nyu tökïlentöy piköchan, ‘Kighecha le wölo kakïchamta amökepkonechanye kokay wölo imitenyi!’

³²Ayo, muköy so työ kïwutyeghö karichi cho mino kegh, anta muköy mïraru kensyö kïwutyeghö sïrokachi? Wölo kiwutyeghanïn piköchan ompö osis cho meyitisyocha.

³³Ichinyi körom nyoman ompö rïpsetagh pö chaman! Imukenyi ompö tenet kor cho tïng otöptin cho ghach ortïneku.

³⁴Pröch sïroköku ompö kisönpö mey nko cho mötïngcha lelut, amelö ompöwölo kinyorunyi kïwiröy kongu. “Wölo ompö choni löwïr,

³⁵kïtelentenyi, ‘Kegh ngo ne nyo gha, nyo melö töngwanïn nörekyo ECHOTYON.’ Wölo orwokyininyi ompöwölo kelenyi, ‘Maghanye ngokï.’

³⁶Ompö ne tegha kegh chi nyo le kwïle, otï kewaghakananyi ortïneku le nyï? Rotinyi pipö Misri le wölo kiratïta pipö Asirya.

³⁷Akwotini imïleghonyi Misri, iyenonunyi kegh möt ompö arasï. Ompöwölo töghöy ECHOTYON pïchoni itwoytonyi kegh, amenyorchininyinye chane kingörokut nyonikïny.