Read pokoot YEREMIA 20 Bible Online

YEREMIA 20 - pokoot bible

YEREMIA 20

¹Otini kilïmanïn tïsin Pasyur, wero Imer nyo kile yetïn pö Kö pö Tororöt* omwochinan pich ngalechete,

²kïmwa kemunganïn akerötyanïn Kö pö Tororöt ato lekïto kukat nyo kikuro Kuka Penchamen.

³Ato le asïyech tökwoghö, kungwïn nyinte kutyakanïn, akïkany kumuchö olenchan, “Melö tökïkurinyi ECHOTYON ngat lö, ‘Pasyur,’ wölo kurinyi lö, ‘Ghöyityö woptö tïkwïl.’

⁴Ompöwölo lentöy ECHOTYON, ‘Opunyi ghöyityö nko kongotïneku lömïs. Itupunenyi kong kïpöröy pung chane ompö poryot. Otöninan pipö Yuda löwïr mori pöytoghinto Papilon nyo rongöy walaka korenyi le pïnot, kïpar walaka.

⁵Opïsinan tïkwïl pung choni kïchengchï kegh sïkönöto kanasyantanete nko tïku lödo cho pö olyot nyo wow cho mi orinyi nko ropïyeni pöytoghi Yuda, akwip Papilon.

⁶Kïkany nyi Pasyur nko kongu kïmïkul, kïnömokwa akerangakwa le pïnot koro Papilon. Imeghchinenyi aketïpchinyi wölini nko kongotiku löwïr chanye kingorchinenyi ngala putintön.’ ”

⁷Kelïsaninyi we ECHOTYON alïsan kïlïsa! Ichinyi awes kïtïlanïn akilotaninyi. Kalïkwan chi nyo kïroröchini kwimön, mïnanïn chi anka tïkwïl.

⁸Ngalanenyan kï ngwïrngwïrönöt kwïle, kateghan olentöy, “Poryot nko kiwurat!” Ompöwölo otini kamwatïtan ngölyontengu kemïnanïn akeroröchanïn kwimön.

⁹Kïkany olan, “Mongölonenanye ECHOTYON, momwoghanye kïgh ompö kaynenyi,” kïnagh kïgh nyo mi orinyan le ma, ompöwölo lenye ngölyontengu ma nyo nöghöy ompö orinyan. Olan omukyï okörchï ori, wölo mamukanye kokay.

¹⁰Kacham pich löwïr kïlentöy, “Ghöyityö woptö tïkwïl! Kepe kemwochinö soch tökerwokï.” Mököy ompö chini le kongotichan achïntan! Lentöy chane, “Töptoy kïlïsöy nyinte atökemuka kerïntena aketökisyö.”

¹¹Wölo imitenyi, we ECHOTYON nko ani, ichinyi nyakan nyo kiwöghöy. Kïlenyona pïtyot kwïle pïchay chopanïn kong, amemukönye kïrïntanïn. Nömöy chane arasï nyo wow nyoman ompöwölo melö kitökumukisyö tötutkökwa Nömöy chane arasï nyo pö kokay, arasï nyo melö kïwutyegho.

¹²Nyi we ECHOTYON Kimuktoghin, nyo ikïtöy ainkïtï lö ngo nyo le chi pö man. Isïwïyenyi lö ne nyo mi mïkulöwu chi nko kïgh nyo nonöy. Nya asïwan nyu tökenyi pungköchan ompöwölo kyamantinyi kegh.

¹³Otumchinö ECHOTYON! Nya kïsala nyinte! Ompöwölo kösörunö chi nyo mi nyarïl mori mwokïyis.

¹⁴ Nya kïchïpö asis nyo kikïyiyanïn! Nya kupot ngörekyö nyo pö asisoni kiyiyanïn yonyan!

¹⁵Nya kïchïpö chi nyo kipchï paponyan kut akwigh nyinte kïturön, otini kïlenchï, “Kakïyiyunyi worö asete!”

¹⁶Nya kïkarkeyit chichoni nko kanastin cho kirultö ECHOTYON mesyonchï. Nya kïlïm nyinte rira kiwasan, akïlïm kikiköto poryot pöghetkwen,

¹⁷ompöwölo mötïghenanïnye nyinte muyeto yonyu, nyo kitö lïku muyeto yonyan pïrïmpenyan akïwowit muyenyi lenyoni kokay.

¹⁸Kilïkwï ne tölïtwan sany, olïtunan muyeto yonyu nya wey? Ayo, kyolïtwan so sany atonyorï nyarïl nko sönönöt, atolapay amang möngot nyo pö arasï?