Read pokoot YEREMIA 21 Bible Online

YEREMIA 21 - pokoot bible

YEREMIA 21

¹Kiyonï Sedekia, pöytoghinto Yuda Pasyur wero Malkia nko tïsin Sepania wero Maaseya, kïpka kïtepanïn

² lö, “Kaykay somwecha kingörokut ECHOTYON ompöwölo kikïsetï akikurik kanasyantenyo Nepukadnesa, pöytoghinto Papilon. Töptoy ana ighöy ECHOTYON töngönchin le wölo keghtoy su, kwigh Nepukadnesa kuyoda kegh kïpïstecha.”

³Atolapay kïlenchanïn ECHOTYON, mwochinö pïchoni köyonï Sedekia lö kölö ECHOTYON Tororöt pö Israel,

⁴“We Sedekia! Owöghökyininyi kïparinyi kariko lïkengu chï kepöronyi pöytoghinto Papilon nko lïko Papilonia chï mi sanypa kanasyan kurikinyi. Osupchinan kariko lïk löwïr kanasyan kwen.

⁵Oporyeghonekwa ante ompö owesyenyan kïmïkul nko nörekyenyan nko mïrmïryenyan nko köromnyenyan.

⁶Owongan chi anka tïkwïl nyo mi kanasyantanï, kö chi anta kö tyony ompö sömew nyo gha nyoman.

⁷Wölo otöninan, Sedekia pöytoghinto Yuda nko mötworichi nko pich cho köngötunö sömew nko chok nko kömöy, mori Nepukadnesa, pöytoghinto Papilon nko pungkökwa cho möro kong kïparakwa. Pörokwa nyu atoni Nepukadnesa ompö ngot nyo puryö kisyonchin akï puryö nyo ngötu.”

⁸Atolapay kïlenchanïn ECHOTYON lenchinö pïchoni lentöy ECHOTYON, “Atera, kotönön tawunkwa ara söpon nko ara meghat.

⁹Möngötunye chi anka tïkwïl nyo odongöy kanasyantanï. Megho chok nko kömöy nko sömew nyo gha. Wölo chi nyo chömöy kïlïtöy sany akutö kegh mori pipö Papilonia, chï kikurik kanasyantanï, kïmelö kïtïghöy wölo chïwïtöy akïsöp.

¹⁰Kyamwaghan ante ECHOTYON lö, onyoran kanasyantanï, oghchinan nyo gha nyoman, atönön mori pöytoghinto Papilon kïpela ma lökïr.”

¹¹Kilenchanïn ECHOTYON wïyö mwochinö pipö ka pöytoghinto Yuda lö,

¹²“Akwa pïchï pö ara Daudi, atere! Kamwaghan ante ECHOTYON lö, Agha man kïngeta nyini kayech, asörï pich cho mi nyarïl ompö mori pich cho nyörilöy chane Akwato maghakwa lenyoni kwighanïn tïkuchï ghach oghekwa anarek, angwanitï le ma nyo nöghöy, amönukonye.

¹³Konömchinyi lat we Yerusalem, oporyegheninyi! Nyi nyo imi ghat parak ompö ato syolote. Nyi nyo ilentöy, ‘Ekï ngo köny nyo muköy kungwïn akïlïtï möngencha nyo ripote, akï ngo nyo muköy kïporyeghenecha?’

¹⁴Kamwaghan ante ECHOTYON lö, Opelonan kayoni pö pöytoghin ma kuwit opelonan ma nyo metukönye kïgh anka tïkwïl.”