Read pokoot YEREMIA 24 Bible Online

YEREMIA 24 - pokoot bible

YEREMIA 24

¹ Kikany kwip Nepukadnesa, pöytoghinto Papilon Yekonia wero Yeoyakim, pöytoghinto Yuda nko pich cho le tïngan nko kitongï kïpa Papilon, kuporwanïn ECHOTYON. Köröpon odeny cho kimi makany ompö tawu Kö pö Tororöt.*

²Kimi makany cho kirïr nyo karam köröpe akonga, kïmi cho ghach akï cho memukönye chi kwam köröpe nyinö anka.

³Atolapay kïlenchanïn ECHOTYON, “Yeremia kesïwenyi ne?” Olenchan, “Kasïwan makany, makany cho karamach nko cho ghach nyoman cho memukönye chi kwam.”

⁴Atolapay kïlenchanïn ECHOTYON,

⁵“Kïlenyona kamwaghan ante ECHOTYON, Tororöt pö Israel lö, oyitan lö karamach le makanchï karamach pipö Yuda cho kyochömchan kep kïpa le pïnot koro Papilonia.

⁶Okomönan chane nyoman, awetan oyoku kïmïlisyö koronï. Oghan chane kïlïkwï akonga amorultonanye. Oghan chane kïpit le ket amokölöngtenanye.

⁷Otöninan chane mïkulögh nyo muköy kunkïtu lö ochan ECHOTYON. Lïku nyu chane piköchan, alïkwan Tororötïngwa ompöwölo yoku kegh chane kïpka wölo omitan ompö mïkuliskökwa kïmïkul.

⁸“Wölo oyitan Sedekia, pöytoghinto Yuda nko yetïntinechi nko pich cho kingötï Yerusalem nko cho kiwuchï koro Misri lö, karkegh nko makanyechay ghach nyoman mötïng kyam.

⁹Oghan chane kïlïkwï cho mïghyegho akwotyeghö pipö koros ompö ngwïny kïmïkul. Mïnöy akïroröchï pich chane. Ripöy chane chïpötö ompö wop tïkwïl wölini otulchinan.

¹⁰Atolapay otyorchan chane ngot nko kömöy nko korononi kyotönön papotïnekwa.”