Read pokoot YEREMIA 27 Bible Online

YEREMIA 27 - pokoot bible

YEREMIA 27

¹ Otini kitor Sedekia, wero Yosia kïpayta Yuda, kïlenchanïn ECHOTYON,

²“Yeremia, ighchinö kegh mchokyon ompö angwoy nko ket airötchï katïngu.

³Atolapay iyokchï kut pöytoghi Edom nko Moap nko Amon nko Tiro nko Sidon nyo ipöy pich cho keyokwï pöytoghichoni kïpka Yerusalem kïnyorï Sedekia, pöytoghinto Yuda.

⁴Mwochinö pïchoni ipöy kutinoni kïpa kïmwochï pöytoghikwa lö kamwaghan ante ECHOTYON Kimuktoghin, Tororöt pö Israel lö,

⁵ani nyo kyagh ngwïny nko pich nko tyonkïn cho söpsot cho mi ngwïny kïmïkul ompö owesyenyan nyo wow, atöninan chi owesyö lenyini kachaman.

⁶Nyete le ye, kotönön koroschï löwïr mori mötworintenyan Nepukadnesa, pöytoghinto Papilon kotönön tïkwïl morichi tïpö wudïn atökïpöghisyechï nyinte.

⁷Pöghisyechini koroswö löwïr nyinte nko werunyi nko kukötanyi ntökïtenö ato rulöy paytaghtanyi. Atoni nyu ato ighöy pöytoghï nko koros cho echön, Papilon kïlïkwï sekeyontengwa.

⁸“Wölo omungan kor anta paytagh anka tïkwïl nyo melutönye katïnyi möchokyo Nepukadnesa pöytoghinto Papilon akïpöghisyechï nyinte. Omungenan chane ngot nko kömöy nko sömew ntökïtenö awany lömïs ompö mori Nepukadnesa.

⁹Kïlenyona mater ngala werkoykökwa nko chepsoköytin nko kirwotïtoghï nko ponï cho mi kwenunkwa chona lenchinokwa mopöghisyechï pöytoghinto Papilon.

¹⁰Mi chane kïlïsokwa ompö ngalekwa, nyo ato aterakwa, kepokwa wölo low ompö korenkwa. Otulchinokwa wölo low, apekwa owonyö.

¹¹Wölo ato lut katïnyi chi pö kor anka tïkwïl möchokyo Nepukadnesa pöytoghinto Papilon akïpöghisyechï nyinte, opïsinan kïmöngisyö akïngor paren ompö korengwa.” Mwoghöy ECHOTYON.

¹²Kyomwochan tïkwïl Sedekia pöytoghinto Yuda ngalechoni kyolenchan, “Olutö katwayikwo möchokyo pöytoghinto Papilon, apöghisyechï nyinte nko pikachi atosöpchenö.

¹³Ompö ne temegha nko piköku ompö ngot anta kömöy anta sömew? Nka chete tïkwïn cho kimwa ECHOTYON lö ighisyot ompö kor anka tïkwïl nyo möchomönye kïpöghisyechini pöytoghinto Papilon.

¹⁴Mater ngala werkoy chona lenchinokwa, mopöghisyechï pöytoghinto Papilon ompöwölo putintön ngalechoni.

¹⁵Melö koyokwan chane wölo kamwa putintön ompö kaynenyan. Kïlenyona otulchinan chane wölo low, awonyan chane nko werkoychoni mwowokwa ngala putintön.”

¹⁶Atolapay omwochan tïsï nko pïchoni löwïr lö lentöy ECHOTYON, “Mater ngala werkoykökwa cho mwowokwa lö kiyoku nyete le lawel kari Kö pö Tororöt kïpkana Papilon, ompöwölo putintön choni.

¹⁷Mater ngalekwa. Opöghisyechinö pöytoghinto Papilon tosöpchenö ompö ne tachama kegh kanasyantanï kïlïkwï kïratyan nyo kirulyö korïn kutïkumö nya?

¹⁸Ato kö werkoy chane cho pö man akïtïng ngölyontenyan, kwompö ne tömösaghanïn, ECHOTYON Kimuktoghin, tömökip karïn cho kidong Kö pö Tororöt nko kö pö pöytoghinto Yuda nko kanasyanta Yerusalem kïpa koro Papilon.”

¹⁹Otini kirang pöytoghin Nepukadnesa, Yekonia wero Yeoyakim pöytoghinto Yuda nko pich cho echön ompö Yuda nko Yerusalem kïpa le pïnot, kimi tïkwïn cho kituk mepnye. Mepnye tïkwïn cho lata pchörin, töreni taghoy, nkaritin nko tïku walaka cho mi Kö pö Tororöt.

²¹Lentöy ECHOTYON Kimuktoghin ompö paraku kari chay kingötï Kö pö Tororöt nko kö pö pöytoghinto Yuda nko kanasyanta Yerusalem,

²²“Kipöy löwïr kugheghöy Papilon akïtïpïyot wölini ntökïtenö atoni kangwïnan asat. Atoni nyu ato oyokunan kïpka wölete. Kamwaghan ante ECHOTYON lenyoni.”