Read pokoot YEREMIA 28 Bible Online

YEREMIA 28 - pokoot bible

YEREMIA 28

¹ Kingölonwanïn werkoyon Anania, wero Asur nyo ngwïno kanasyanta Kipyon, könyinoni pö angwan, arawa mut kïngeta kutor Sedekia kïpayta Yuda. Kingölonwanïn ompö Kö pö Tororöt ompö tawu tïsï nko pich löwïr lö,

²lentöy ECHOTYON Kimuktoghin, Tororöt pö Israel, “Oriyan owesyo pöytoghinto Papilon.

³Kïtomö kuwonyö könyiswö odeny owetan oyoku karichay pö Kö pö Tororöt kip Nepukadnesa, pöytoghinto Papilon korenyi.

⁴Oyokunan tïkwïl kïmïlisyö pöytoghinto Yuda, Yekonia wero Yeoyakim nko pipö Yuda löwïr cho kipa Papilon le pïnot. Ompöwölo oriyan owesyo pöytoghinto Papilon.” Mwoghöy ECHOTYON.

⁵Atolapay ongölonchan Anania ompö tawu tïsï nko pich löwïr cho kighyongöy ompö Kö pö Tororöt. Kyolenchan,

⁶“Amen!* Nya kwigh ECHOTYON lenyoni! Nya kïpïntö ngalechoni. Kemwaghanyi, lö kiyoku kari Kö pö Tororöt akïmïlisyö pïchay löwïr kipa Papilon le pïnot.

⁷Wölo tera nyu omwowun ngölyon kïlïmöy pïchï löwïr.

⁸Kingor werkoy cho pö könyisyok cho kinyaghech, ani nko nyi, lö ngwïnchini pörsyö nko kömöy nko sömewut koros nko pöyunötin cho owesöch cho chang

⁹Wölo ato ngor werkoyonta anka tïkwïl lö ngwïnöy kalya, akïpïntö lenyini kangor, kemuköy kenkïtï man lö köyoni nyinte ECHOTYON.”

¹⁰Atolapay kïcheng Anania möchokyon ompö katïnyan akuriy kïmutmuta.

¹¹Akïngalan ompö tawu pïchay löwïr lö, “Lentöy ECHOTYON, oriyan lenyoni möchokyonto Nepukadnesa pöytoghinto Papilon nyo körötyï kotwoni koros löwïr. Oghan lenyoni kïtomö kuwonyö könyiswö odeny.” Wölo nyini kiwany kïmwa lenyoni, owechan kegh.

¹²Ato le löt, kïtenö kuriy Anania möchokyon ompö katïnyan, kïyontanïn ECHOTYON

¹³owö omwochï Anania lö, “Lentöy ECHOTYON keriyönyi möchokyonto ket wölo oghan ye nyu anka nyo pö karïn.

¹⁴Kamwaghan ante ECHOTYON Kimuktoghin, Tororöt pö Israel lö, orötinan kotwoni koroschï löwïr mïchoktino körin kïlïkwï sekeyi Nepukadnesa, pöytoghinto Papilon. Oghan tïpö wudïn tïkwïl kïpöghisyechi nyinte.”

¹⁵Atolapay owan omwochï Anania lenyoni, atasan olenchï, “Tera we Anania! Melö köyonunyi ECHOTYON, akwanyï ye keghanyi pïchï kughan putintön.

¹⁶Kïlenyona lentöy ECHOTYON oghinyi pakadena sany. Imeghönyi könyinete ompöwölo keghanyi pich kïtagh kïrïp ngalechi.”

¹⁷Kïma Anania arawa mut nko odeny nyo pö könyinoni.