Read pokoot YEREMIA 31 Bible Online

YEREMIA 31 - pokoot bible

YEREMIA 31

¹Lentöy ECHOTYON, “Ompö osiswechoni, konyïtanïn kestoni pipö Israel löwïr lö ochan Tororötïngwa akïlïkwï chane piköchan.”

²Lentöy ECHOTYON, “Kyosyonchan pich cho kichïwïtyeghö meghat ompö surkwen. Ato kiyöröy Israel kimïny,

³ochumchan nyinte kïrkegh kyochan low. Kachaminyi ompö chomnyot nyo pö kokay, nka nyete mopïstonanye oporunyi chomnyenyan.

⁴Nyi Israel, chepkïltït nyo pïchigh, otekinyi ngat kïteka! Irötenyi ngat kwïrkwïrisköku ainyal ompö ngörekyö nyo wow.

⁵Ikötkötenyi ngat keti sapipun, ompö kutïngkoti Samaria. Kötkötöy ngorï, akïngörökyï kwam akwe.

⁶Pkonöy nyo mötïny osiswö cho kursïyi ripï ompö kutïngkoti Epraim lö, ‘Apkana kepe kepusa kutïng pö Sayon,* wölo mi ECHOTYON, Tororötïnyo.’ ”

⁷Ompöwölo lentöy ECHOTYON, “Otumö ompö ngörekyö akwompö Yakopo, olïlighchinö kor nyo awes kïtïl löwïr. Otumö tumwöyi sölut, amwatïta lö, ‘Kösorï ECHOTYON pikachi löwïr, pipö Israel cho kingötï.’

⁸Arosa, omïtunenan chane kor nyo mi okumpö löt. Oghömïtunenan söremwok pö ngwïny. Rotu löwïr puryö nyo dongöy, ngwïnöy chepkarot nko mwolöy. Pkonöy korï cho mirsyot nko cho kïghöy, mïlo söpïch nyo wow nyoman.

⁹Mïlisyot piköchan kïlokyonu, omïtunan osoghsoghonu chane, kuweranï lalwatïn cho mi pögh. Pegho or nyo tapulul nyo puryö kïgh nyo kwötöy chane, ompöwölo ochan papoto Israel, akï poretyenyan Epraim.

¹⁰“Akwa pipö koros, atera ngölyonto ECHOTYON. Amwatïtena kurel koros cho lowöch lö, ‘Ghömïtu pipö Israel nyinte nyo kitoyö chane akukaman le mösöwonto kechir.’

¹¹Ompöwölo ante ECHOTYON nyo kosörwan Yakopo, kosörunan nyinte mori kor nyo awes kïtïl nyinte.

¹²Pkonöy nyu pipö Israel kïtumöy ompö ngörekyö, ompö kutïng pö Sayon. Ngörokyini ropöw cho oropchinan chane Ropöwo pagh nko dipay* nko mwowöy cho pö kechir nko tïch nko kyaki walaka. Körökegh nyu atoni möngengwa nko par nyo mi pögh osis löwïr. Möminye kïgh nyo rörchini chane.

¹³Pkonöy monekwa cho le tipïn akïnyal ompö ngörekyö akwigh mïrön nko poy kïturonchö. Osoghsoghan chane, awaghach sönönötengwa kïlïkwï ngörekyö, owöghökan nyörilwokökwa kïlïkwï turönö.

¹⁴Opïghyongan tïsï ompö tïkwï cho okwoghöch amelö rörchini piköchan kïgh ompö köromnyenyan.” Mwoghöy ECHOTYON.

¹⁵ Lentöy ECHOTYON, “Kakïlïma rira Rama, kiriköt nyo pö ngwonïn. Lokyini Rael monechi amöchömönye kesoghsoghöy, ompöwölo mökïmicha

¹⁶Sisa amerire ngat, misa lokeku ompöwölo mepotönye ighisyengu, inyorunenyi ropöwon. Mwoghöy ECHOTYON. Mïlisyegho monekwa koro pung.

¹⁷Mi kikönöto köromnyö ompö osiswekwa cho pkonöy, Mïlisyot monekwa kïpkonöy kaw. Mwoghöy ECHOTYON.

¹⁸“Kyalïman Israel kïloköy lö, ‘ECHOTYON, kimunganinyi ntoghïtan lö chïs ompöwölo kyalatan egh nyo tomönye kïnagh mïchoki waghaka atowöghökwan kegh wölo imitenyi ompöwölo nyi nyo ichï ECHOTYON Tororötïnyan.

¹⁹Kikyopoton apïstö arengu, wölo kokötan Otini kinetaninyi osyonchan kegh, asöchan kegh arasï ompöwölo kirïpatanïn ngokichan cho kyaghan otini kyochan mïnïng.’

²⁰Melö so werïnyan Israel nyo le chaman? Montönyan nyinte nyini ochömonan kegh. Nka nyay mowutyeghenanye nyinte kïrkegh akutan. Soröy mïkulöwunyan wölo mi nyinte ompö köromnyö Osyonchinan nyinte nyo mötïny. Mwoghöy ECHOTYON.

²¹Tönö macheytin ortïneku aipölchï ket tömewutyeghö. Nana ngat or nyo kiwerenyi tagh. Nyi we Israel mïlena kaw aingwïn imang kanastineku cho kipïstenyi.

²²Ayo, otomtomönekwa nko oyï, pïchï motïng kighanat nya? Ompöwölo kaghan kïgh nyo rel nyo tomönye kesöchï ngwïnyinete, kelö ripöy korka mïrön.”

²³Lentöy ECHOTYON Kimuktoghin, Tororöt pö Israel, “Otini koyokwan pipö Israel kïpka korengwa, mwoghöy chane ngat ompö koro Yuda nko kanastinechi lö, ‘Nya kusoyönin ECHOTYON we kutïng pö Yerusalem nyo tïlil, Ichinyi kimpïr pö tïlilyö!’

²⁴“Möngisïyi nyu koro Yuda nko kanastinechi löwïr pich cho le ngorï nko cho wusöto kuyokwïyöy kyak.

²⁵Oyonan aghakat kïngeta chona kikwoghochö tökïlïmchï kegh nyo karam. Opïghyongan ntökïsïch owesyö chona könyörkölöchitunö kömöy.

²⁶Kïlenyona muköy chi osiswechoni kïmwa lö, ‘Korïwön akwotini kangetan olïmchan kegh nyo karam.’

²⁷“Omwoghan ante ECHOTYON lö pkonöy osiswö cho onyïghitan pich nko tïpö wudïn koro Israel nko Yuda.

²⁸Akwompö wölo onkïtön oyokwïyöy, ankïtï wölo kïsyortoy anta kewur anta kerultö anta kechop kong, okomönan tïkwïl, akatkat, atek chane.

²⁹Melö tökïmwoghöy pich osiswechoni ngat lö, ‘Kyam papotïnö sapipun cho mintïrïl akïrilyö kelat monïng.’

³⁰Wölo melö tökïlenyoni ye! Rilyot kelat chi anka tïkwïl nyo omöy sapipun cho mintïrïl. Meghöy chi anka tïkwïl ompö ngokichi kegh.”

³¹ Lentöy ECHOTYON, “Pkonöy osiswö cho oman muma* nyo rel nko pipö Israel nko Yuda,

³²akï muma nyo melö karkegh nko nyay kyaman köny nko papotïnekwa ato kyamïtunan chane koro Misri ompö owesyenyan. Kïrkegh kyochan komönintengwa, melö kikonyït konyït piköchan mumanoni kikyamacha tïkwïl.

³³ Muma nyo rel nyo owetan omöy nko pipö Israel kï lata nyï: Otöninan kirurutköchan oringwa, akörchan mïkuliskökwa. Olïkunan Tororötïngwa, kïlïkwï chane piköchan. Mwoghöy ECHOTYON.

³⁴ Mökïminye machata osiswechoni kenet chi lö, ‘Mïchininyi nkïtunö ECHOTYON,’ ompöwölo nkïtwanïn pich cho echön nko cho mïnkech. Mwoghöy ECHOTYON. Olöstoghchinan chane ngokikwa amononanye ngat.”

³⁵ECHOTYON nyo tötöy lö lïwu asis pöghet, akulïwï arawa nko kokel oghö. Nyinte nyo ighöy pögho nanam kïwïch akughum mïrtino pöghechï. Kaynenyi kï ECHOTYON Kimuktoghin.

³⁶Kiyomis nyinte lö, “Ato tökïmi kïgh anka tïkwïl lenyini pö su, kïtoyitan pipö Israel lö piköchan.”

³⁷Lentöy ECHOTYON, “Ntökemuko kepim lö tya yïmö atökekït lö ghyongo onö ngwïnya, kötemuko otiyan lö melö piköchan pipö Israel, ompö tïkwïn löwïr cho kigh chane.” Mwoghöy ECHOTYON.

³⁸Lentöy ECHOTYON, “Itïtöy ato kïteköy ngat Yerusalem, kanasyantenyan. Kiteköy kïngata köyay kiwö chak akekuro Ananel ntökwit kukat nyo mi otinö katankula teksyö.

³⁹Wetöy lenyoni sörömu teksyö ntökwit kutïng pö Karep akuwit ntökwit Koa.

⁴⁰Okonyïtökwa lö tïlil ompö tawunyan wölnö le mpöghoghyo mötöwöyi pich nko wölnö kïwirchini samï nko lalwa Kidron ntökwit Kuka Angoletin nyo mi okumpö kong asis otinö katankula teksyö. Mökïminye nyu kïgh nyo ngwïnöy ngat kunyoröy anta ngany kanasyantanï kokay.”