Read pokoot YEREMIA 34 Bible Online

YEREMIA 34 - pokoot bible

YEREMIA 34

¹Kingölonwanïn ECHOTYON ato kimi Nepukadnesa pöytoghinto Papilon nko lïkenyi nko lïkos pö koros cho kipöytoy nyinte kïporyegho Yerusalem nko kanastine walaka cho lekïtinö.

²Kilenchanïn ECHOTYON, Tororöt pö Israel, “Wïyö mwochinö Sedekia, pöytoghinto Yuda lö kamwaghan ante ECHOTYON lö, kyotönön kanasyantanï mori pöytoghinto Papilon akïwetöy kïpelo ma.

³Kïkany nyi Sedekia, melö ichïwïtenyi kïnöminyi akeretinyi wïyö Papilon nteryam aingalan nko pöytoghinto Papilon.

⁴Wölo nyi we Sedekia, pöytoghinto Yuda, teranïn lasiny. Möpörinyinye chi ompö poryot.

⁵Imeghenyi osiswe walaka ompö kalya akïpka pich kïpel tïkuchay ngutoy nyo karam asisoni kïrorinyi lenyini kikida papotïneku cho pö tagh cho kile pöytoghï kïtomö nyi. Lokyot pich asispa meghengu kïlentöy, ‘Heywey! Kameghenecha pöytoghintenyo.’ ” Mwoghöy ECHOTYON.

⁶Atolapay opchan Sedekia pöytoghinto Yuda ngölyontononi ompö Yerusalem

⁷otini kimi lïko Papilon kïporyegho kanasyanta Yerusalem nko Lakis nko Aseka, kanastin odeny cho kiwokot opïn ompö koro Yuda akï cho kitomönye kïnam Nepukadnesa, pöytoghinto Papilon.

⁸Kimi ato kicham pöytoghin Sedekia nko pipö Yerusalem lö kïpetöy ketyoköy

⁹sekey cho le pipö Eprania, kö mïrön anta kö kor atömakïmi chi nyo ighöy chi pö Yaudi anka sekeyon.

¹⁰Kïlenyona kïchomnyechï kintöghoghi nko pïchay löwïr lö wetöy chi anka tïkwïl kutyoktoy sekeyontenyi amökïminye chi nyo ighöy chi pö Yaudi anka sekeyon. Kutyak nyu chane sekeyikwa lenyini kimwa.

¹¹Wölo ato le löt kïwaghach chane kinonutkökwa akïpa kuyokwï ngat pïchay kikiketyak akwigh sekeyikwa ngat.

¹²Atolapay kïmwowanïn ECHOTYON,

¹³Tororöt pö Israel lö mwochinö pïchoni lö, “Atanya kyotyokunan papotïnekwa ompö sekeynön ompö koro Misri, kyaman muma* nko chane.

¹⁴Kyolenchan mïchini chi anka tïkwïl kutyak sekeyontenyi nyo le chi pö Eprania kïwechï kegh nyo kipöghisyechï nyinte könyis mut nko odeny. Wölo melö kiterwanïn papotïnekwa.

¹⁵Rose lö ompö nyete le oghi, kyowöghökisyökwa aghakwa kïrïp kegh nko ngölyontenyan otini kityak chi anka tïkwïl sekeyontenyi nyo le chi pö pipö Yaudi. Kyamakwa muma* ompö tawunyan ompö Kö pö Tororöt* wölini kïsoghenanïn.

¹⁶Wölo kowöghökisyökwa ngat apa oyokwï sekeyichay asïmnyonökwa kaynenyan.

¹⁷Kïlenyona omwoghan ante ECHOTYON lö, ompöwölo mokonyïtökwanye ngölyontenyan nyo komökenokwa atyaka pikökwo cho le sekey. Kanya nyu atyakekwa tïkwïl, owonyenö nyu ompö ngot nko sömew nko kömöy. Oghokwa pich cho ato sïwa pipö koros löwïr kwotyö.

¹⁸Oghchinan pïchoni kimökonyïtcha akïrïp ngala muma nyo kyaman nko papotïnekwa, le wölo kida eghay kikarer kwen akuwer kwenu panyechi.

¹⁹Chane kï yetïntino Yuda nko Yerusalem nko opisatino ka pöytoghin nko tïsï nko pich löwïr cho kiwer kwenu panya eghay kikïkar kïlïkwï odeny.

²⁰Otöninan chane mori pungkökwa cho mi kïpsach kïpar chane. Omöy nyu töritwö nko tïpö wudïn porwöyikwa.

²¹Otöninan tïkwïl Sedekia pöytoghinto Yuda nko mötworichi mori pung cho yöröy kïpar chane. Pung choni kï lïko pöytoghinto Papilon cho kiyoda kegh akuchal kïporyeghenokwa.

²²Arosa! Kamwaghan ante ECHOTYON lö, oyoktenan kut kuyokwï kegh lïkononi pö pöytoghinto Papilon. Pkonöy kïporyegho kanasyantanete akïnam akïpela ma. Oghan kanastina Yuda kïlïkwï surkwen nyo puryö chi nyo möngöy.” Mwoghöy ECHOTYON.