Read pokoot YEREMIA 35 Bible Online

YEREMIA 35 - pokoot bible

YEREMIA 35

¹ Kilenchanïn ECHOTYON ato ki pöytoghinto Yuda Yeoyakim wero Yosia,

²“Wïyö kestoni pipö ara Rekap aingalan tïkwïl atolapay imïtï kïtïpï kö nyo mïnïng ompö Kö pö Tororöt.* Otini kötöpï ngwïny kumuchö, iropchï chane dipay* kïgha.”

³Owan lenyini amïtï Yasania wero Yeremia, kuköto Apasinia nko werkökwa nko monekwa, pipö ara Rekap kïmïkul.

⁴Kyomïtyan Kö pö Tororöt akepa ketïpi opis pö kinetan pö Anan, wero Idalya nyo le mötworinto Tororöt. Kilekïto opisnoni opistino pich cho echön akimi paraku opis pö Maaseya wero Syalum nyo kile wowïn pö Kö pö Tororöt.

⁵Atolapay otönön tawu pipö Rekap kikompen nko pakulin cho kikinyïghit dipay, alenchan, “Ogheghsyenö.”

⁶Wölo kuyokwanïn chane lö, “Melö kïgheghecha dipay ompöwölo kitaghenecha paponcha Yonadap wero Rekap nyo kilenchecha, okïr kegh maghegh dipay amochömchï monekwo tïkwïl kïgha.

⁷Motekyï kegh korïn amangor paren amakatkat sapipun anta al pareni sapipun. Omöngekwa emen osis tïkwïl atomöngisyenö könyis cho chang ompö koronï omikwa le rutoghot.

⁸Kikerïpacha ngalechoni kimwowecha kukötönyo Yonadap wero Rekap nyini kikïrenecha keghegha dipay. Kïlenyona melö kïgheghöcha dipay amögheghönye korucha nko monecha cho le wor nko tipïn tïkwïl.

⁹Melö kïtekyinecha kegh korïn cho kïmöngöy amelö kïtïngetecha pareni sapipun anta paren cho kïngoröy.

¹⁰Kïmöngecha emen lenyini kirurecha kukötöncha Yonadap.

¹¹Wölo otini kitor pöytoghin Nepukadnesa kïporyeghö korenete, keryöwucha kewïnga kegh Yerusalem ompöwölo kiwöghecha lïko pipö Papilonia nko nyo pö Sirya. Nka nyete ye nyu kïmöngecha kanasyanta Yerusalem.”

¹²Atolapay kïlenchanïn ECHOTYON Kimuktoghin, Tororöt pö Israel, “Wïyö mwochinö pipö Yuda nko Yerusalem lö katepan chane ante ECHOTYON lö, ompö ne tömoterökwa ngölyontenyan arïp kirurutköchan?

¹⁴Anetena kegh pipö ara Yonadap wero Rekap cho kiter akïrïp lenyini kikïmwochï lö maghegh dipay. Nyo pö nyoman melö mi ompö akong nyo kigha dipay kïngata osiswechoni nko nyete le ye. Kyongölonwokwa arurokwa kïnyïl cho chang wölo melö kyateranïkwa.

¹⁵Kyoyokwokwa mötworichan werkoy kïnyïl cho chang cho kipka kïmwowokwa lö opïstenö ortïnekwo cho ghach atolapay owöghökisyö agh man. Kimwowokwa lö orip kegh masagh amopöghisyechï tororötin walaka. Nyo ntökyarïpakwa ngalechoni kitomöngekwa kokay koronete kokonokwa atö tïkwïl papotïnekwa. Wölo nyu melö kyateranïkwa amelö kyayangakwa kïgh nyo kyamwaghan.

¹⁶Kiter akïrïp pipö ara Rekap ngölyontononi kukötöngwa Yonadap, wölo materanïkwanye chï le akwa.

¹⁷Kïlenyona, omwoghan ye ante ECHOTYON, Tororöt Kimuktoghin, Tororöt pö Israel lö, opchinan kiwurat pipö Yuda nko Yerusalem, nyo lata nyo kyamwaghan kutinyu lö onyorunekwa. Oghan lenyoni ompöwölo melö kyaterakwa ngal cho kyomwowekwa, kyokurokwa amongitönökwanye.”

¹⁸Atolapay omwochan pïchay pö ara Rekap lö kölö ECHOTYON Kimuktoghin, Tororöt pö Israel, “Ompöwölo kyarïpakwa agh lenyini kimwowokwa kukötönkwa Yonadap,

¹⁹oyomisokwa ante ECHOTYON Kimuktoghin, Tororöt nyo pö Israel lö, möminye ato potöy chi nyo pö ara Yonadap wero Rekap nyo pöghisyewanïn kokay.”