Read pokoot YEREMIA 37 Bible Online

YEREMIA 37 - pokoot bible

YEREMIA 37

¹ Kitö Nepukadnesa, pöytoghinto Papilon Sedekia wero Yosia kïlïkwï pöytoghinto Yuda kuker Yeoyakin wero Yeoyakim.

²Wölo melö kiter Sedekia nko kintöghoghichi nko pipö Yuda kiruröto ECHOTYON nyo kimwowanïn lö mwochinö chane.

³Kiyokwï pöytoghin Sedekia Yeukal wero Syelemia nko tïsin Sepania wero Maaseya kïpka kïlenchanïn, “Kaykay soghwecha ECHOTYON, Tororötïnyo akwompö korenyo.”

⁴Kitomönye atoni ketorchanïn chela kïlenyona kitomukan owestö aryam nko pich.

⁵Kikurik atoni lïko Papilonia Yerusalem wölo otini kitï kut lö kikïsetï lïko Parao kïngetunö Misri, kuyoda kegh kïpegha Yerusalem.

⁶Atolapay kïlenchanïn ECHOTYON, Tororöt pö Israel,

⁷“Lenchinö Sedekia pöytoghinto Yuda nyona katepinyi lö soghwech ani, karich kuyoda kegh korengwa Misri lïko Parao nyo kisetï kungarakinyi.

⁸Yoku kegh ye nyu lïko Papilonia akïporyeghenekwa ntökïnam akïpel kanasyantanete.

⁹Kïlenyona omwowokwa ante ECHOTYON lö malïs kegh lö, pïstonekwa lïko Papilonia melö petöy nyonikïny.

¹⁰Akï kïrkegh alotakwa lïko Papilonia ntökelö pich cho le kot opïn cho köngötï kïghïtegho emenikwa, wölo ngetyot choni akïpela ma kanasyantanete kïnagh lö tïtu.”

¹¹Kiyoda kegh löt lïko Papilonia ompöwölo kimi or kïpkonöy lïko Parao.

¹²Kïlenyona olïtön sany owö koro Penchamen atacheng karerantanyu nyo pö tïkuko katancha.

¹³Wölo nyini kyatan Kuka Penchamen nyo pö kanasyanta Yerusalem, kïtorchanïn egh ripin nyo kïkuro Iriya, wero Syelemia, kuköto Anania. Atolapay kïlenchanïn, “Iminyi ipertoy isoröy lïko Papilonia!”

¹⁴Olenchan, “Put choni ngale. Melö kasoran lïko Papilonia.” Wölo melö kighan Iriya ngalechan. Kïlenyona kïnamanïn akwipanïn tawu kintöghoghï.

¹⁵Kïmunganïn akïmunganïn chane nyoman atolapay kïtorchanïn chela nyo kile kö pö Yonatan, kikirinto pöytoghin akï nyo kikïwaghach kïlïkwï chela.

¹⁶Kikïtorchanïn chela nyo mi kö pö ngwïny, atöpan wölini osis cho chang.

¹⁷Atolapay kïkuranïn pöytoghin Sedekia, akïtakanïn ompö katanyi. Kwipanïn kamas akïtepanïn lö, “Mi ngölyon nyo kamwa ECHOTYON nya?” Olenchan, “Mi nyoman aketöninyi mori pöytoghinto Papilon.”

¹⁸Atolapay atepan pöytoghin Sedekia lö, “Ayo, kyawunyi nko mötworiku nko pïchï mi yi ne nyo gha ntökïlïkwï nyi ketorchaninyi chela?

¹⁹Kunko ye werkoy chay kimwowunyi lö mengwïnönye pöytoghinto Papilon kïporyegheninyi akïporyeghö korengu?

²⁰Akï ye, we pöytoghin nyo konyïtot, osoghinyi aiterwo. Kaykay meyodanïn owö ngat chela nyo mi ka Yonatan ompöwölo omeghchinan wölini nyo mötïny ato ighanyi lenyoni.”

²¹Kïlenyona kïmwa pöytoghin Sedekia kekörchanïn kö pö ripï akepaghenanïn makatyan akonga chik nyo kikipuno kanasyan wölo kigho makatin. Kikïpaghanïn nyu lenyoni ntökïtenö kuwonyö makatin lö döng ompö kanasyan.